Last updated on November 20th, 2025 at 10:14 am
ಬೆಂಗಳೂರು, ನ. 20: ಟೂವೀಲರ್ ಗಾಡಿಲೆಡ್ ಜೋಕುಲು ಪಿರವು ಕುಲ್ಲುದು ಇಪ್ಪುನಗ ಏತ್ ಬೀಸಡ್ ಪೋವೊಡು ಪನ್ದ್ ಸೂಚಿಪುನ ಕೇಂದ್ರ ಮೋಟಾರು ವಾಹನ (ರಡ್ಡನೇ ತಿದ್ದುಪಡಿ) ನಿಯಮೊಲು, 2022 ತ ನಿಯಮ 138 (7) ದ ಅನುಷ್ಠಾನೊಗು ಇತ್ತೆಗ್ ಇತ್ತೆನೇ ಕ್ರಮ ಗೆತೊನರ ಕರ್ನಾಟಕ ಹೈಕೋರ್ಟ್ ಬುಧವಾರ ರಾಜ್ಯೊಗು ನಿರ್ದೇಶನ ಕೊರ್ತುಂಡು.
ಮುಖ್ಯ ನ್ಯಾಯಮೂರ್ತಿ ವಿಭು ಬಖ್ರು ಬೊಕ್ಕ ನ್ಯಾಯಮೂರ್ತಿ ಸಿ ಎಂ ಪೂಣಚ್ಚ ಮೊಕಲೆನ ವಿಭಾಗೀಯ ಪೀಠೊ ಈ ವಿಚಾರಣೆ ನಡಪಾದಿತ್ತ್ದ್, “ಕೇಂದ್ರ ಮೋಟಾರ್ ವಾಹನ ನಿಯಮೊಲೆನ್ ಜಾರಿ ಮಲ್ಪುನ ದಿಟ್ಟಿಡ್ ರಾಜ್ಯ ಅಧಿಕಾರಿಲು ಕೆಲ ಕ್ರಮೊಕ್ಲೆನ್ ಗೆತೊಂದಿತ್ತ್ಂಡಲಾ, ವಾಸ್ತವವಾದ್ ಈ ನಿಯಮೊಲು ನನಲಾ ಜಾರಿ ಆತಿಜ. ಈ ನಿಯಮೊಲೆನ್ ಜಾರಿಗ್ ಕನವೊಡು ಪನ್ಪಿನೆಟ್ ಒವ್ವೇ ಅನುಮಾನ ಇಜ್ಜಿ ಪನ್ಪಿನ ಸ್ಪಷ್ಟ ಆದುಂಡು. ಅಂಚಾದ್, ಈ ನಿಯಮೊನು ಜಾರಿಗ್ ಕನಯೆರೆ ರಾಜ್ಯ ಇತ್ತೆ ಪರಿಣಾಮಕಾರಿ ಕ್ರಮೊಕ್ಲೆನ್ ಗೆತೊನೊಡಾಪುಂಡು. ಈ ನಿಯಮೊನು ಜಾರಿಗ್ ಕನಯೆರೆ ಇತ್ತೆಗ್ ಇತ್ತೆನೇ ಕ್ರಮ ಗೆತೊನ್ಲೆ ಪನ್ದ ರಾಜ್ಯೊಗು ನಿರ್ದೇಶಿಪುನ ಮುಕೇನ ಎಂಕ್ಲ ಅರ್ಜಿದ ವಿಲೇವಾರಿ ಮಲ್ತ್ದ” ಪನ್ದ್ ಪನ್ಡೆರ್.
9 ತಿಂಗೊಲು ಪ್ರಾಯೊರ್ದು ತೊಡಂಗುನ ಜೋಕುಲೆನ ಸುರಕ್ಷತಾ ಹೆಲ್ಮೆಟ್ಲು ಬೊಕ್ಕ ಜೋಕುಲೆನ ಸುರಕ್ಷತಾ ಸೊತ್ತುಲು ಸಮ ತಿಕ್ಕುಲೆಕ ನಿರ್ದೇಶನ ಕೊರ್ಯೆರ ಕೇನ್ದ್ ಡಾ. ಅರ್ಚನಾ ಭಟ್ ಕೆ ಸಂದಾದಿನ ಅರ್ಜಿಗ್ ಈ ನಿರ್ದೇಶನ ಕೊರ್ತೆರ್.
ನಿಯಮ 138 “ಮೋಟಾರ್ ಗಾಡಿಲೆಗ್ ಸಿಗ್ನಲ್ ಬೊಕ್ಕ ಎಚ್ಚಿಗೆ ಸುರಕ್ಷತಾ ಕ್ರಮೊಕುಲೆನ್” ಫಿಕ್ಸ್ ಮಲ್ಪುಂಡು. ತಿದ್ದುಪಡಿ ನಿಯಮೊಲೆಡ್ ಗೋಡ್ಯಾದಿನ ಉಪ-ಷರತ್ತು (7) ಇಂಚ ಪನ್ಪುಂಡು: “ಕೇಂದ್ರ ಮೋಟಾರ್ ವಾಹನ (ರಡ್ಡನೇ ತಿದ್ದುಪಡಿ) ನಿಯಯೊಲು, 2022 ತ ಪ್ರಕಟಣೆ ದಿನೊರ್ದು ಒಂದು ವರ್ಸೊರ್ದು ಬೊಕ್ಕ, ಮೋಟಾರ್ಸೈಕಲ್ಲೆನ ರೈಡರ್ ಒರ್ಮ್ಬ ತಿಂಗೊಲುರ್ದ್ ನಾಲ್ ವರ್ಸೊದ ಉಲಯಿದ ಬಾಲೆನ್ ಗಾಡಿಡ್ ಪಿರವು ಕುಲ್ಲಾವೊಂದು ಪೋನಗ ಈ ತಿರ್ತ್ದ ಸುರಕ್ಷತಾ ಕ್ರಮೊಕ್ಲೆನ್ ಪಾಲಿಪೊಡು,
1. ನಾಲ್ ವರ್ಸೊರ್ದು ಕಮ್ಮಿ ಪ್ರಾಯೊದ ಜೋಕುಲೆಗ್, ಅಕ್ಲೆನ್ ಮೋಟಾರ್ಸೈಕಲ್ದ ರೈಡರ್ಗ್ ಕಟ್ಯೆರ ಬೋಡಾಪಿನ ಸುರಕ್ಷತಾ ಸೊತ್ತುಲೆನ್ (ಹಾರ್ನೆಸ್) ಗಲಸೊಡು.
2. ಕ್ರ್ಯಾಶ್ ಹೆಲ್ಮೆಟ್
3. ನಾಲ್ ವರ್ಸೊದುಲಯಿದ ಬಾಲೆ ಗಾಡಿಡ್ ಪಿರವು ಕುಲ್ಲುದಿಪ್ಪುನಗ ಟೂವೀಲರ್ದ ಸ್ಪೀಡ್ 40kmph ರ್ದ್ ಎಚ್ಚ ಪೋಯೆರ ಬಲ್ಲಿ.
ಜೋಕುಲೆನ ಸುರಕ್ಷತೆ, ಹಾರ್ನೆಸ್ ವ್ಯವಸ್ಥೆಲೆನ್ ಪಾಡೊನುನು ಬೊಕೂ ಕ್ರ್ಯಾಶ್ ಹೆಲ್ಮೆಟ್ಲೆನ ಬಗೆಟ್ ಜಾಗೃತಿ ಪುಟ್ಟಾವುನ ಕಾರ್ಯಕ್ರಮೊಕ್ಲೆನ್ ಮಲ್ಪೆರ ಕ್ರಮ ಗೆತೊಂದ ಪನ್ದ್ ರಾಜ್ಯ ಸರ್ಕಾರ ಪನ್ತ್ಂಡ್