Last updated on November 23rd, 2025 at 09:55 am
ಕಾರ್ಲ, ನ. 23: ಕಾಶ್ಮೀರರ್ದ್ ಕುಡ್ಲಗ್ ಆ್ಯಪಲ್ ಕೊನೊವೊಂದಿತ್ತಿನ ಲಾರಿ ಕುದುರೆಮುಖ- ಮಾಳ ಘಾಟಿಡ್ ಪೊತ್ತುದು ಪೋತಿನ ನಡಕೆ ನ.22ತ ಶನಿವಾರ ಕಾಂಡೆ ನಡತ್ದ್ಂಡ್.
ಸುಮಾರ್ 2 ಗಂಟೆದ ಅಂದಾಜಿಗ್ ಲಾರಿದ ಪಿರವುದ ಎಡ ಮೆಯಿತ ಟಯರ್ ಪುಡದ್, ಅಪಗನೇ ಸೂ ಪತೊಂದುಂಡು. ಘಾಟಿ ಸಾದಿಡ್ ನಡತಿನ ಈ ನಡಕೆ ಒಂತೆ ಪೊರ್ತು ಆತಂಕೊದ ವಾತಾವರಣ ಉಂಡು ಮಲ್ತಿತ್ತ್ಂಡ್.
ಟಯರ್ ಪುಡದ್ ಬೊಕ್ಕ ಲಾರಿದ ಪಿರವು ಮೆಯಿಟ್ ತೋಜಿದ್ ಬತ್ತಿನ ಸೂ ಒರ್ಮೆಲಾ ಪಗರ್ದ್, ಇಡೀ ಲಾರಿಗ್ ಪತೊಂದುಂಡು. ಆ್ಯಪಲ್ ದಿಂಜಿನ ಲಾರಿ ಸೂ ಕ್ ಆಹುತಿ ಆದ್ ಇತ್ತಿನ ಮಾತಾ ಸಾಮಾನ್ ನಾಶ ಆತ್ಂಡ್. ಲಕ್ಷಗಟ್ಲೆ ರೂ. ನಷ್ಟ ಆತ್ಂಡ್ ಪನ್ದ್ ಅಂದಾಜಿ ಮಲ್ದೆರ್.
ನಡಕೆದ ಪೊರ್ತುಡು ಲಾರಿಡ್ ಇತ್ತಿನ ಡ್ರೈವರ್ ಬೊಕ್ಕ ಕ್ಲೀನರ್ನಕುಲು ಗಾಡಿರ್ದ್ ಪಿದಯಿ ಬತ್ತಿನೆರ್ದಾವರ ಒವ್ವೇ ಪ್ರಾಣಹಾನಿ ನಡತ್ದಿಜಿ.
ನಡಕೆದ ಒಲವು ತಿಕ್ಕಿನೇ ಕಾರ್ಕಳ ಅಗ್ನಿಶಾಮಕ ದಳ ಜಾಗೆಗ್ ಪೋದು ಬಾರೀ ಬಂಙ ಬತ್ತ್ದ್ ಸೂ ತೆಕ್ಕಾದೆರ್. ಸಕಾಯಕ ಅಗ್ನಿಶಾಮಕ ಠಾಣಾಧಿಕಾರಿ ಚಂದ್ರಶೇಖರ್ ಮೆರೆನ ಮುತಾಲಿಕೆಡ್ ಸಿಬ್ಬಂದಿಲು ಅಚ್ಯುತ ಕರ್ಕೇರ, ಹರಿಪ್ರಸಾದ್ ಶೆಟ್ಟಿಗಾರ್, ಮಹಮ್ಮದ್ ಮುಝಾಂಬಿಲ್, ದಿನೇಶ್ ಬೊಕ್ಕ ನಿತ್ಯಾನಂದ ಕಾರ್ಯಾಚರಣೆಡ್ ಪಾಲ್ಪಡೆದಿತ್ತೆರ್.