Last updated on November 18th, 2025 at 10:39 am
ಕಾರ್ಲ, ನ. 18: ವಿದ್ಯಾರ್ಥಿಲೆನ ಜನಿವಾರ ದೆಪ್ಪಾಯಿನ ಆರೋಪಡ್ ಮಾಸ್ಟ್ರೆನ್ ಬೇಲೆರ್ದ್ ದೆತ್ತಿನ ನಡಕೆ ನ. 17ತಾನಿ ಮಿಯ್ಯಾರ್ ಮೊರಾರ್ಜಿ ದೇಸಾಯಿ ವಸತಿ ಶಾಲೆಡ್ ನಡತ್ದ್ಂಡ್.
ಮೂಲತಃ ಕಲಬುರಗಿ ನಿವಾಸಿ, ದೈಹಿಕ ಶಿಕ್ಷಣ ಶಿಕ್ಷಕೆ ಮದರಶಾ ಎಸ್.ಮಕಾಂದರ್ ಬೇಲೆ ಕಲೆವಂದಿನ ಶಿಕ್ಷಕೆ. ಈ ಶಿಕ್ಷಕೆ 2025ತ ಜೂನ್ ತಿಂಗೊಲುಡು ದೈಹಿಕ ಶಿಕ್ಷಣ ಕಲ್ಪಾಯೆರ ಅತಿಥಿ ಶಿಕ್ಷಕೆ ಆದ್ ಇಡೆಗ್ ಸೇರ್ದಿತ್ತೆರ್.
ವಿದ್ಯಾರ್ಥಿಲೆಗ್ 200 ಬಸ್ಕಿ ಆಕಾವುನು, ಧಾರ್ಮಿಕ ಭಾವನೆಗ್ ತೆಟ್ಟಾಪಿಲೆಕ ಜನಿವಾರ ಬೊಕ್ಕ ಕೈಕ್ ಕಟ್ಟಿನ ನೂಲು ದೆಪ್ಪೆರೆ ಪನ್ಪುನು ಇಂಚ ಬೇತೆ ಬೇತೆ ಶಿಕ್ಷೆಲೆನ್ ಕೊರೊಂದಿತ್ತೆರ್ ಪನ್ದ್ ಜೋಕುಲು ಬೊಕ್ಕ ಅಕ್ಲೆನ ಅಪ್ಪೆಅಮ್ಮೆ ಆರೋಪ ಮಲ್ತ್ದೆರ್.
ಜೋಕ್ಲೆನ ಒಯಿಲ್ದ ಮಿತ್ತ್ ಅಪ್ಪೆಅಮ್ಮೆ, ಊರುದಕುಲು ಶಾಲೆಗ್ ಬತ್ತ್ದ್ ಶಿಕ್ಷಕನ್ ತರಾಟೆಗ್ ಗೆತೊಂದೆರ್.
ಮಕಾಂದರ್ಗ್ ಈ ಬಗೆಟ್ ಉಂದೆಕ್ ದುಂಬೇ ಪಾಕ ಸರ್ತಿ ಎಚ್ಚರ್ಗೆ ಕೊರ್ದಿತ್ತ್ಂಡಲಾ ಸುದಾರಿದಿಜೆರ್ ಪೋಷಕೆರ್ ಆಕ್ರೋಶ ತೂಪಾಯಿನ ಬೆರಿಟೇ ಮಕಾಂದರ್ನ್ ಪ್ರಿನ್ಸಿಪಾಲ್ ಶಾಲೆದ ಬೇಲೆರ್ದ್ ದೆತ್ತ್ದೆರ್.
ಮಿಯ್ಯಾರ್ದ ಮೊರಾರ್ಜಿ ದೇಸಾಯಿ ಶಾಲೆ ಎಡ್ಡೆ ಫಲಿತಾಂಶ ಗೆತೊನ್ನ ಶಾಲೆ. ಬೇತೆ ಬೇತೆ ಕಡೆರ್ದ್ ಬತ್ತಿನ ಜೋಕುಲು ಮುಲ್ಪ ಉಲ್ಲೆರ್. ಮುಲ್ಪದ ದೈಹಿಕ ಶಿಕ್ಷಣ ಶಿಕ್ಷಕೆ ಮಕಾಂದರ್ ಜೋಕುಲೆಗ್ ಬಸ್ಕಿ ಆಕಾವುನು, ಜನಿವಾರ ಬೊಕ್ಕ ಕೈಕ್ ಕಟ್ಟಿನ ನೂಲುಲೆನ್ ದೆಪ್ಪೆರೆ ಪನ್ತೆರ್. ಜನಿವಾರ ದೆಪ್ಪಾವುನವು ಒಂಜಿ ಧರ್ಮೊಗು ಬೇನೆ ಮಲ್ಪುನ ವಿಚಾರ. ಆಂಡ ಈ ಬಗೆಟ್ ಮಕಾಂದರ್ ಡ ಕೇನ್ನಗ ಜನಿವಾರ ಪನ್ಡ ದಾದ ಪನ್ದ್ ಜವಾಬು ಕೊರ್ಪೆ. ಮಿಯ್ಯಾರ್ಡ್ ಎಂಕ್ಲ ಮಾತಾ ಧರ್ಮೊದಕುಲುಲಾ ಎಡ್ಡೆಡ್ ಉಲ್ಲ. ಆಂಡ, ಮಕಾಂದರ್ ನ ಇಂಚಿನ ವರ್ತನೆ ಧರ್ಮೊಲೆನ ನಡುಟು ವೈಮನಸ್ಯ ಉಂಡು ಮಲ್ಪುಂಡು. ನನ ದುಂಬಗ್ ಇಂಚಿನ ನಡಕೆ ಒಲ್ಪಲಾ ನಡಪರೆ ಬಲ್ಲಿ ಪನ್ದ್ ಊರುದಕುಲು ಆಕ್ರೋಶ ತೂಪಾದೆರ್.