Last updated on November 9th, 2025 at 11:53 am
ಬೊಲ್ತೇರ್, ನ. 09: ಮಿತ್ತಬಾಕಿಲ್ ಗ್ರಾಮೊಡು ಕಾಡಾನೆಲೆನ ದಂಡ್ ಅಪಗಪಗ ಓಜಿದ್ಬರೊಂದಿತ್ತ್ದ್, ಊರುದಕ್ಲೆಗ್ ಮಂಡೆಬೆಚ್ಚ ಸುರು ಆತ್ಂಡ್. ಊರುದಕ್ಲೆನ ಪ್ರಕಾರ, ರಡ್ಡ್ ಕಿನ್ನಿಲು ಸೇರ್ದ್ ಒಟ್ಟು 13 ಆನೆಲು ನೆಟೆ ತಿರ್ಗೊಂದುಲ್ಲಗೆ.
ನವೆಂಬರ್ 8 ದಾನಿ ಬಯ್ಯಡ್, ಮಲೆಜೋಡಿ ಜಾಗೆಡ್ ಕಿನ್ನಿಲು ಸೇರ್ದ್ ಎಣ್ಮ ಆನೆಲು ತೋಜಿದ್ ಬತ್ತಿತ್ತ. ಬೊಕ್ಕ, ಕುಲು ಒಟ್ಟುಗೋಡ್ಯೊಂದು, ಅಮೈ, ಕೂಡಾಲ ಬೊಕ್ಕ ಬೆಡಿಗುತ್ತು ಡೆ ಆದ್ ಪೋದಿತ್ತ. ಅರಣ್ಯ ಇಲಾಖೆದ ಅಧಿಕಾರಿಲು ಊರುದಕ್ಲೆನ ಸಹಕಾರೊಡು ಆನೆಲೆನ್ ಯಶಸ್ವಿಯಾದ್ ಗಿಡತ್ದೆರ್. ಈತ್ನೇಟ ಒವ್ವೇ ಬುಲೆ ಹಾನಿ ಆತಿನ ಬಗೆಟ್ ವರದಿ ಆತಿಜಿ.
ಮಿತ್ತಬಾಕಿಲ್ ಗ್ರಾಮ ಪಂಚಾಯತ್ ಊರುದಕ್ಲೆಗ್ ಎಚ್ಚರ್ಗೆ ಕೊರ್ದಿತ್ತ್ದ್, ಕಾಡ್ಗ್ ಪೋವಂದಿಲೆಕ ಅಂಚೆನೇ ಎಚ್ಚರ್ಗೆಡ್ ಇಪ್ಪುಲೆಕ ಸೂಚನೆ ಕೊರ್ತುಂಡು.
ಉಂದೇ ಪೊರ್ತುಡು, ಸನಿಯಾರ ಬಯ್ಯ 4 ಗಂಟೆದ ಅಂದಾಜಿಗ್ ಕುಡುಮದ ಮುಳಿಕ್ಕಾರ್ದ ಕೈತಲ್ ಒಂಜಿ ಆನೆ ತೂಯೆರ ತಿಕ್ಕ್ದಿತ್ತ್ಂಡ್. ಒವ್ವೇ ಹಾನಿ ವರದಿ ಆದಿಜ್ಜಿಂಡಲಾ, ಆ ಆನೆ ಬೊಕ್ಕ ಬೊಳ್ಮನಾರ್ ಬೊಕ್ಕ ಪೆರಿಯಡ್ಕ ದಂಚಿ ಪೋತುಂಡು ಪದ್ದ್ ಅರಣ್ಯ ಇಲಾಖೆದ ಮೂಲೊಲು ತೆರಿಪಾದ. ಕುಡೊಂಜಿ ಆನೆ ಪದವು ಮರ್ಗಿಲ್ಡ್ ಉಂಡು ಪನ್ದ್ ವರದಿ ಆತ್ಂಡ್ .