Last updated on December 10th, 2025 at 03:11 pm
ಕುಡ್ಲ, ಡಿ. 10: ಕುಡುಮಡ್ ಪಾಕ ಪುನೊಕ್ಲೆನ್ ಕೌಂತ್ದೆ ಪನ್ದ್ ಮಾಸ್ಕ್ಮ್ಯಾನ್ ಚಿನ್ನಯ್ಯ ಆರೋಪ ಮಲ್ತಿನೆರ್ದಾವರ ಜಡ್ತೆ ಸುರು ಮಲ್ತಿತ್ತಿನ ಎಸ್ಐಟಿ ಗ್ ಇತ್ತೆ ಸ್ಫೋಟಕ ಒಲವು ತಿಕ್ಕ್ದ್ಂಡ್. ಧರ್ಮಸ್ಥಳದ ಮಿತ್ತ್ ಬುರುಡೆ ಗ್ಯಾಂಗ್ದ ಷಡ್ಯಂತ್ರ ಪ್ರಾಥಮಿಕ ಜಡ್ತೆಡ್ ಸಾಬೀತಾತ್ಂಡ್. ಚಿನ್ನಯ್ಯೆ, ಮಹೇಶ್ ತಿಮರೋಡಿ, ಗಿರೀಶ್ ಮಟ್ಟಣ್ಣನವರ್, ವಿಠ್ಠಲ ಗೌಡೆ, ಟಿ. ಜಯಂತ್ ಬೊಕ್ಕ ಸುಜಾತಾ ಭಟ್ ಸೇರ್ದ್ ಆಜಿ ಆರೋಪಿಲುಲಾ ಅಪರಾಧ ಕೃತ್ಯೊಡು ಪಾಲ್ಪಡೆತಿನ ಬಗೆಟ್ ಎಸ್ಐಟಿ ದೃಢ ಮಲ್ದ್ಂಡ್.
ಕಾಸ್ದ ಆಸೆಗ್ ಬೂರ್ದ್ A1 ಚಿನ್ನಯ್ಯೆ ಪುನ ಕೌಂತಿನ ಕತೆ ಕಟ್ಟ್ದಿತ್ತೆ. ಬುರುಡೆ ಗ್ಯಾಂಗ್ ಚಿನ್ನಯ್ಯಗ್ ಕಾಸ್ ಕೊರ್ದು ಗೊಬ್ಬಾದಿತ್ತ್ಂಡ್. ಪಾಕ ಪುನೊಕ್ಲೆನ್ ಕೌಂತ್ದೆ ಪನ್ದ್ ಚಿನ್ನಯ್ಯಡ ಕಲು ಪನ್ಪಾದ್ ವಿಡಿಯೋ ರೆಕಾರ್ಡ್ ಮಲ್ತಿತ್ತೆರ್. ಚಿನ್ನಯ್ಯಗ್ ದುಂಬುರ್ದೇ ಗುರ್ತ ಇತ್ತಿನ ವಿಠ್ಠಲಗೌಡೆ, ಮಹೇಶ್ ತಿಮರೋಡಿನ ಇಲ್ಲಗ್ ಆಯನ್ ಲೆತೊಂದು ಪೋದಿತ್ತೆ. ತಿಮರೋಡಿನ ಇಲ್ಲಡ್ ನಡತಿನ ಇನಯೊಡು ಮಟ್ಟಣ್ಣನವರ್, ಜಯಂತ್, ವಿಠ್ಠಲಗೌಡೆ ಪಾಲ್ಪಡೆದಿತ್ತ್ದ್, ಧರ್ಮಸ್ಥಳ ಮೇಲ್ವಿಚಾರಕೆರೆ ಮಿತ್ತ್ ಪಿತೂರಿಗ್ ಪ್ಲ್ಯಾನ್ ಆದಿತ್ತ್ಂಡ್. ಆ ಪ್ರಕಾರ ಮಂಡೆ ಒಂಜೆನ್ ಚಿನ್ನಯ್ಯಗ್ ಕೊರ್ದು ಪೊಲೀಸೆರೆಡ ಒಯಿಲ್ ಬರೆಪಾದೆರ್. ನ್ಯಾಯಾಧೀಶೆರ ಎದುರು ಚಿನ್ನಯ್ಯೆ ಈ ಪಾತೆರ ಪನ್ಪುಲೆಕ ಗಾಳಿ ಪಾಡ್ದೆರ್.
ಧರ್ಮಸ್ಥಳ ಪ್ರಕರಣೊಗು ಸಂಬಂಧಿತ್ದ್ ಇಂಚಿಪ ಸ್ವಾಮೀಜಿ ಒರ್ಯನ ಪುದರ್ನ್ ಮಹೇಶ್ ಶೆಟ್ಟಿ ತಿಮರೋಡಿ ಉಲ್ಲೇಖ ಮಲ್ತಿತ್ತೆರ್. ಯಾನ್ ಬೊಕ್ಕ ಚಿನ್ನಯ್ಯೆ ಆ ಮಠೊಕು ಪೋತಿನ ಸತ್ಯ. ಎಂಕ್ಲೆನ ಒಟ್ಟುಗು ಸೌಜನ್ಯನ ಇಲ್ಲದಕುಲ್ಲಾ ಬತ್ತಿತ್ತೆರ್. ಆ ಪೊರ್ತುಡು ಸ್ವಾಮೀಜಿನ ಎದುರು ಒಂಜರೆ ಗಂಟೆದಾತ್ ಪೊರ್ತು ಚಿನ್ನಯ್ಯೆ ಮಾತೆನ್ಲಾ ಪನ್ತೆ. ಏರ್ ಮಾತಾ ಅತ್ಯಾಚಾರ ಮಲ್ತ್ದೆರ್, ಮಲ್ಪಾದೆರ್ ಪನ್ಪಿನೆನ್ ಆಯೆ ಪನ್ದಿತ್ತೆ ಪನ್ದ್ ತೆರಿಪಾದಿತ್ತೆರ್. ಕುಡೊಂಜಿ ಕಡೆಟ್ ಮಾಸ್ಕ್ ಮ್ಯಾನ್ ಚಿನ್ನಯ್ಯಗ್ ಕೋರ್ಟ್ ಜಾಮೀನ್ ಕೊರ್ನ್ಡಲಾ ಬುಡುಗಡೆ ಭಾಗ್ಯ ಮಾತ್ರ ತಿಕ್ಕ್ದಿಜಿ. ನವೆಂಬರ್ 26 ತಾನಿ ಚಿನ್ನಯ್ಯಗ್ ನ್ಯಾಯಂತಡೆ ಜಾಮೀನ್ ಮಂಜೂರ್ ಮಲ್ತಿತ್ತ್ಂಡ್. ಇರ್ವೆರ್ ಜಾಮೀನ್ದಾರೆರ್, 1 ಲಕ್ಷ ಸೆಕ್ಯೂರಿಟಿ ಬಾಂಡ್ ಕೊರ್ಯೆರ ಕೋರ್ಟ್ ಆದೇಶ ಮಲ್ತಿತ್ತ್ಂಡ್. ಆಂಡ, ಏರ್ಲಾ ಜಾಮೀನ್ ಬೊಕ್ಕ ಸೆಕ್ಯೂರಿಟಿ ಕಾಸ್ ಡೆಪಾಸಿಟ್ ಮಲ್ಪಂದಿನೆರ್ದಾವರ ನನಲಾ ಚಿನ್ನಯ್ಯೆ ಶಿವಮೊಗ್ಗದ ಕರ್ಪಿಲ್ಲ್ಡ್ ಇಪ್ಪುಲೆಕ ಆತ್ಂಡ್.