Last updated on December 15th, 2025 at 10:37 am
ಸುಳ್ಯ, ಡಿ. 14: ದೇವಚಳ್ಳ ಗ್ರಾಮೊದ ಮುಂಡೋಡಿಡ್ ಅಕ್ರಮವಾದ್ ಕಡ್ತ್ದ್ ಕೊನೊವೊಂದಿತ್ತಿನ ಅಂದಾಜಿ 10 ಲಕ್ಷ ರೂ. ಮೌಲ್ಯೊದ ಮರ ಬೊಕ್ಕ ಕೊನೊಯೆರ ಗಲಸ್ದಿನ ಗಾಡಿನ್ ಡಿಸೆಂಬರ್ 13 ತಾನಿ ಅರಣ್ಯ ಇಲಾಖೆ ಅಧಿಕಾರಿಲು ನಡಪಾಯಿನ ವಿಶೇಷ ಕಾರ್ಯಾಚರಣೆಡ್ ವಶೊಕು ಗೆತೊಂದೆರ್.
ಮುಂಡೋಡಿದ ನಾಗೇಶ್ ಪನ್ಪಿನಾರೆಗ್ ಸೇರ್ದಿನ ಜಾಗೆರ್ದ್ ಒಂಜಿ ಪೆಜತ ಮರ ಬೊಕ್ಕ ಒಂಜಿ ಕುಕ್ಕುದ ಮರೊನು ಅಕ್ರಮವಾದ್ ಕಡ್ತ್ದ್ ಕೊನೊವೊಂದುಲ್ಲೆರ್ ಪನ್ಪಿನ ಪತ್ತ ಒಲವು ಇತ್ತ್ದ್ ಉಪ ವಲಯ ಅರಣ್ಯಾಧಿಕಾರಿ ಸೌಮ್ಯಾ ಪಿ. ಎನ್. ಮೆರೆನ ಮುತಾಲಿಕೆಡ್ ನೆಲ್ಲೂರು-ಕೆಮ್ರಾಜೆ ವಲಯೊದ ಅಧಿಕಾರಿಲು ಜಾಗೆಗ್ ದಾಳಿ ಮಲ್ತ್ದೆರ್. ಕಾರ್ಯಾಚರಣೆದ ಪೊರ್ತುಡು, ಕೂಟ ಪೆಜ ಬೊಕ್ಕ ಕುಕ್ಕುದ ಮರೊತ 10 ಕುಂಟೆಲೆನ್ ಅಂಚೆನೇ ಮರ ಕೊನೊಯೆರ ಗಲಸ್ದಿನ ಲಾರಿ ಬೊಕ್ಕ ಕ್ರೇನ್ ನ್ ವಶೊಕು ಗೆತೊಂದೆರ್.
ಜಾಗೆದ ದನಿ ನಾಗೇಶ್ ಬೊಕ್ಕ ಪ್ರಮುಖ ಆರೋಪಿ ಮರತ ವೈವಾಟ್ದ ಬೊಕ್ಕ ಕ್ರೇನ್ದ ದನಿ, ಸುಳ್ಯ ಕಸಬಾ ನಾವೂರು ನಿವಾಸಿ ಮಹಮ್ಮದ್ ಅಶ್ರಫ್ ಡಿ. ಎಂ. ಪನ್ಪಿನಕ್ಲೆನ್ ವಶೊಕು ಗೆತೊಂದು ವಿಚಾರಣೆ ಮಲ್ತ್ದೆರ್. ಅವೆರ್ದ್ ಬೊಕ್ಕ ಅಕಲೆನ್ ಬುಡ್ತೆರ್ ಪನ್ದ್ ತೆರಿದ್ ಬೈದ್ಂಡ್.
ಉಪ ಅರಣ್ಯ ಸಂರಕ್ಷಣಾಧಿಕಾರಿ ಆಂಟೋನಿ ಎಸ್. ಮರಿಯಪ್ಪ ಮೆರೆನ ನಿರ್ದೇಶನೊಡು, ಸಕಾಯಕ ಅರಣ್ಯ ಸಂರಕ್ಷಣಾಧಿಕಾರಿ ಪ್ರಶಾಂತ್ ಕುಮಾರ್ ಪೈ ಮೆರೆನ ಮಾರ್ಗದರ್ಶನೊಡು ವಲಯ ಅರಣ್ಯಾಧಿಕಾರಿ ಮಂಜುನಾಥ್ ಮೇರ್ ಎಚ್ಚಿನ ಜಡ್ತೆ ಮಲ್ತೊಂದುಲ್ಲೆರ್.