Last updated on December 15th, 2025 at 09:10 am
ಕುಡ್ಲ, ಡಿ. 15: ಕೈಟ್ ತಲ್ವಾರ್ ಪತೊಂದು ಡ್ಯಾನ್ಸ್ ಮಲ್ತ್ದ್, ಅವೆತ ವಿಡಿಯೋನ್ ಸಾಮಾಜಿಕ ಬಲೆತ್ತಾನ ಫೇಸ್ಬುಕ್ಡ್ ಅಪ್ಲೋಡ್ ಮಲ್ತಿನ ಆರೋಪಡ್ ಇರ್ವೆರೆನ್ ಕಾವೂರು ಸ್ಟೇಷನ್ ಪೊಲೀಸೆರ್ ಕೈದ್ ಮಲ್ತ್ದೆರ್.
ಕೈದಾತಿನಕ್ಲೆನ್ ಬಂದರ್ ಜೆ.ಎಂ. ರೋಡ್ ನಿವಾಸಿ ಅಮೀರ್ ಸುಹೇಲ್ (28) ಬೊಕ್ಕ ಕಾವೂರು ಪಂಜಿಮೊಗೇರ್ ಉರುಂದಾಡಿ ಗುಡ್ಡೆ ನಿವಾಸಿ ಸುರೇಶೆ (29) ಪನ್ದ್ ಗುರ್ತ ಪತ್ತ್ದೆರ್.
“Suresh Psy” ಪನ್ಪಿ ಪುದರ್ದ ಫೇಸ್ ಬುಕ್ ಅಕೌಂಟ್ ಇಪ್ಪುನ ಸುರೇಶೆ ಡಿಸೆಂಬರ್ 13ತಾನಿ ತನ್ನ ಫೇಸ್ ಬುಕ್ ಅಕೌಂಟ್ಡ್ ಅಮೀರ್ ಸುಹೇಲ್ ತಲ್ವಾರ್ ಪತೊಂದು ಡ್ಯಾನ್ಸ್ ಮಲ್ತಿನ ವೀಡಿಯೋದ ಮಿತ್ತ್ ವೈಬ್ಸ್ ಬೊಕ್ಕ ಬೊಲ್ದು ರಂಗ್ದ ಹೃದಯೊದ ಎಮೋಜಿ ಪಾಡ್ದ್ ಸ್ಟೋರಿ ಪಾಡ್ದಿತ್ತೆ.
ಸಾಮಾಜಿಕ ಬಲೆತ್ತಾನೊದ ಪರಿಶೀಲನೆ ಮಲ್ಪುನಗ ಉಂದೆನ್ ತೂಯಿನ ಪೊಲೀಸೆರ್, ಸಾಮಾಜಿಕ ಬಲೆತ್ತಾನೊದ ಮುಕೇನ ಸಾರ್ವಜನಿಕೆರೆಗ್ ಪೋಡಿಗೆ ಪುಟ್ಟಾವುನ ಬೇಲೆ ಮಲ್ತಿನ ಅಮೀರ್ ಸುಹೇಲ್ ಬೊಕ್ಕ ಸುರೇಶನ ಮಿತ್ತ್ ಕಾವೂರು ಪೊಲೀಸ್ ಸ್ಟೇಶನ್ಡ್ ಭಾರತೀಯ ನ್ಯಾಯ ಸಂಹಿತೆ 2023 ಒಟ್ಟುಗು ಭಾರತೀಯ ಶಸ್ತ್ರಾಸ್ತ್ರ ಕಾಯ್ದೆ ಕಲಂ 4.25(1ಬಿ) ಬೊಕ್ಕ ಐ.ಟಿ. ಕಾಯ್ದೆ 66 ದ ಪ್ರಕಾರ ಪ್ರಕರಣ ದಾಕಲ್ತೊಂದೆರ್.
ಆರೋಪಿಲೆನ್ ಕೈದ್ ಮಲ್ತ್ದ್, ರೀಲ್ಸ್ ಮಲ್ಪೆರೆ ಗಲಸ್ದಿನ ತಲ್ವಾರ್ ಬೊಕ್ಕ ಸಾಮಾಜಿಕ ಬಲೆತ್ತಾನೊಡು ಪಟ್ಟೊನರೆ ಗಲಸ್ದಿನ ಮೊಬೈಲ್ ಫೋನ್ಲೆನ್ ಜಪ್ತಿ ಮಲ್ತೊಂದೆರ್.