Last updated on December 31st, 2025 at 04:12 pm
ಕಾರ್ಲ, ಡಿ. 31: ಆಜಿ ತಿಂಗೊಲುಗು ದುಂಬು ಡಾಕ್ಟರ್ನಕ್ಲೆನ ಗೋಸ್ಮರಿರ್ದಾವರ ಪೊಂಜೊವು ಒರ್ತಿ ತೀರ್ದಿನ ನಡಕೆದ ಬಗೆಟ್ ಒಡಿಪು ಜಿಲ್ಲಾ ಸರ್ಜನ್ ಸಂದಾದಿನ ವರದಿದ ಆಧಾರೊಡು ಕಾರ್ಲ ಖಾಸಗಿ ಆಸ್ಪತ್ರೆದ ಮೂವೆರ್ ಡಾಕ್ಟ್ರೆನ ವಿರುದ್ಧ ಕಾರ್ಲ ನಗರ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.
ತಡೆಯೆರಾವಂದಿ ಬಂಜಿಬೇನೆ ಬತ್ತಿನೆಕ್ ಝಬೇದಾ (52) ಪನ್ಪಿನಾರ್ ಮೇ 10ತಾನಿ ಕಾರ್ಲ ಖಾಸಗಿ ಆಸ್ಪತ್ರೆಗ್ ಪೋದಿತ್ತ್ದ್, ಅಲ್ಪ ಪರೀಕ್ಷೆ ಮಲ್ತಿನ ಡಾಕ್ಟರ್ ಡ್ರಿಪ್ಸ್ ಪಾಡ್ದೆರ್. ಈ ಪೊರ್ತುಡು ಡಾಕ್ಟರ್ ಬತ್ತ್ದ್ ಪರಿಶೀಲನೆ ಮಲ್ಪೆರೆ ಝುಬೇದಾ ರೆನ ಮಗಲ್ ಮುಬೀನಾ ಕೇನೊನ್ದೆರ್.
ಬೊಕ್ಕ ಬತ್ತಿನ ಡಾ.ನಾಗರತ್ನಾ ಇತ್ತೆನೇ ಆಪರೇಷನ್ ಮಲ್ಪೊಡು. ಝುಬೇದಾನ ಜೂವೊಗು ಪಡಾಯಿ ಉಂಡು ಪನ್ದ್ ಪನ್ತೆರ್. ಬೊಕ್ಕ ಆರೆನ್ ಆಸ್ಪತ್ರೆದ ಆಪರೇಷನ್ ಥಿಯೇಟರ್ಗ್ ಲೆತೊಂದು ಪೋದಿತ್ತ್ದ್, ಡಾ.ನಾಗರತ್ನ, ಡಾ.ರಹತುಲ್ಲಾ ಬೊಕ್ಕ ಡಾ.ತುಷಾರ ಥಿಯೇಟರ್ದ ಉಲಯಿ ಇತ್ತೆರ್. ಬೊಕ್ಕ ಪಿದಯಿ ಬತ್ತಿನ ಡಾ.ರಹತುಲ್ಲಾ, ಝುಬೇದಾ ತೀರ್ದೆರ್ ಪನ್ದ್ ತೆರಿಪಾದೆರ್ಗೆ.
ಝಬೇದಾಗ್ ವೈದ್ಯಾಧಿಕಾರಿಲು ಪೊರ್ತುಗು ತಕ್ಕ ಮರ್ದ್ ಕೊರಂದೆ ಅಂಚೆನೇ ಸಮ ಪರೀಕ್ಷೆ ಮಲ್ಪಂದೇ ಗೋಸ್ಮರಿ ಮಲ್ತ್ದ್ ಆಪರೇಷನ್ ಮಲ್ತ್ದೆರ್ ಪನ್ದ್ ಆರೋಪ ಮಲ್ತ್ದ್ ಮಗಲ್ ಮುಬೀನಾ ಬರೆಪಾದಿನ ಒಯಿಲ್ದ ಪ್ರಕಾರ ಕಾರ್ಕಳ ನಗರ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ಂಡ್.
ಈ ಪ್ರಕರಣೊಡು ಝಬೇದಾ ತೀರ್ದಿನ ಬಗೆಟ್ ಅಂಚೆನೇ ವೈದ್ಯಾಧಿಕಾರಿಲೆನ ಗೋಸ್ಮರಿದ ಬಗೆಟ್ ವಿಚಾರಣೆ ಮಲ್ತ್ದ್ ವರದಿ ಕೊರ್ಯೆರ ಜಿಲ್ಲಾಧಿಕಾರಿಗ್ ಬಿನ್ನಪು ಮಲ್ತಿತ್ತೆರ್. ಈ ಬಗೆಟ್ ಒಡಿಪು ಜಿಲ್ಲಾಸ್ಪತ್ರೆದ ಸರ್ಜನ್ ಡಾ.ಎಚ್.ಅಶೋಕ್ ಪರಿಶೀಲನೆ ಮಲ್ತ್ದ್ ವರದಿ ಸಂದಾದೆರ್.
ಈ ವರದಿಡ್ ಆರೋಪಿ ವೈದ್ಯಾಧಿಕಾರಿಲು ಆಪರೇಶನ್ ಮಲ್ಪೆರ್ದುಂಬು ಗೆತೊನೊಡಾಯಿನ ದುಂಬೆಚ್ಚರ್ಗೆದ ಕ್ರಮ ಗೆತೊನಂದಿನ, ಬೋಡಾಯಿನಾತ್ ಪೊರ್ತು ಇತ್ತ್ಂಡಲಾ ರೋಗಿನ ಸ್ಥಿತಿಗತಿತ ಬಗೆಟ್ ರೋಗಿನ ಇಲ್ಲದಕುಲೆಗ್ ಒಲವು ಕೊರಂದಿನ ತೋಜಿದ್ ಬೈದ್ಂಡ್.
ಅಂಚೆನೇ ರೋಗಿ ಆಪರೇಷನ್ ಆನಗನೇ ತೀರ್ದಿನ ವೈದ್ಯಾಧಿಕಾರಿಲೆನ ರಿಟನ್ ಸ್ಟೇಟ್ಮೆಂಟ್ಡ್ ದೃಢ ಆತ್ಂಡ್. ಆ ಪ್ರಕಾರ ಸರ್ಜರಿ ಮಲ್ತಿನ ಡಾಕ್ಟ್ರೆನ ಗೋಸ್ಮರಿ ಮಿತ್ತ್ರ್ದ್ ತೂನಗ ತೋಜಿದ್ ಬೈದ್ಂಡ್ ಪನ್ದ್ ಈ ವರದಿದ ಅಭಿಪ್ರಾಯ. ಆ ಪ್ರಕಾರ ಕಾರ್ಕಳ ನಗರ ಪೊಲೀಸ್ ಸ್ಟೇಶನ್ಡ್ ಮೂವೆರ್ ಡಾಕ್ಟ್ರೆನ ಮಿತ್ತ್ ಪ್ರಕರಣ ದಾಕಲಾತ್ಂಡ್.