Last updated on December 14th, 2025 at 07:55 am
ಬೆಂಗಳೂರು, ಡಿ. 14: 12 ವರ್ಸೊದ ಮಗೆ ಇತ್ತ್ಂಡಲಾ ಪೊಂಜೊವು ಒರ್ತಿ ಪೊಲೀಸ್ದಾಯನ ಒಟ್ಟುಗು ಬಲ್ತಿನ ನಡಕೆ ಬೊಲ್ಪುಗು ಬೈದ್ಂಡ್. ಮೈಸೂರ್ ಮೂಲೊದ ಮೋನಿಕಾ ಪನ್ಪಿನ ಪೊಂಜೊವು ಉತ್ತರ ಕರ್ನಾಟಕ ಮೂಲೊದ ಪೊಲೀಸ್ ಕಾನ್ಸ್ಟೇಬಲ್ ರಾಘವೇಂದ್ರನ ಒಟ್ಟುಗು ಬಲ್ತ್ದಲ್.
ಮೋನಿಕಾಗ್ ದುಂಬೇ ರಡ್ಡ್ ಮದಿಮೆ ಆದಿತ್ತ್ದ್, ಇತ್ತೆ ಪೊಲೀಸ್ ಕಾನ್ಸ್ಟೇಬಲ್ನ್ ಚಙ್ಗಾಯಿ ಮಲ್ತೊಂದಲ್ಗೆ. ಸುರುತ ಕಂಡನ್ಯನ್ ಬುಡ್ದು, ರಡ್ಡನೇ ಮದಿಮೆ ಆದಿತ್ತಿನ ಮೋನಿಕಾ, ಒಂತೆ ದಿನ ಸಂಸಾರ ಮಲ್ತ್ದ್, ಇತ್ತೆ ರಡ್ಡನೇ ಕಂಡನ್ಯನ್ಲಾ ಬುಡ್ತಲ್. ಜೂನ್ಡ್ ಹೆಚ್ ಎಸ್ ಆರ್ ಸ್ಟೇಶನ್ದ ಹೊಯ್ಸಳ ಡ್ರೈವರ್ ರಾಘವೇಂದ್ರಗ್ ಬೊಕ್ಕ ಮೋನಿಕಾ ಇನ್ಸ್ಟಾಗ್ರಾಮ್ಡ್ ಗುರ್ತ ಆತ್ಂಡ್. ಗುರ್ತ ಆಯಿ ಬೊಕ್ಕ ಫೋನ್ ನಂಬರ್ ಎಕ್ಸ್ಚೇಂಜ್ ಮಲ್ತೊಂದು, ದಿನೋಲ ಪಾತೆರೊಂದಿತ್ತೆರ್ಗೆ. ಇಂಚೆನೇ ಇರ್ವೆರೆ ನಡುಟು ಮೋಕೆ ಪುಟ್ಟುದುಂಡು. ಮೂಜಿ ತಿಂಗೊಲು ಕರಿದ್ ಮೋನಿಕಾ ರಡ್ಡನೇ ಕಂಡನ್ಯನ ಮಿತ್ತ್ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದಲ್. ಎನ್ನ ಜೂವನ ಕಟ್ಟೊನರೆ ಯಾನ್ ಪೋವೊಂದುಲ್ಲೆ, ಎನ್ನ ಕಂಡನ್ಯನ್ ಲೆಪ್ಪುಡಾದ್ ಬುದ್ದಿ ಪನ್ಲೆ ಪನ್ದ್ ಒಯಿಲ್ಡ್ ತೆರಿಪಾದಲ್.
ಮೋನಿಕಾ ಒಯಿಲ್ ಬರೆಪಾದಿನ ಬೆರಿಟೇ ಚಂದ್ರಲೇಔಟ್ ಪೊಲೀಸೆರ್ ಕಂಡನ್ಯನ್ ಕಾಲ್ ಮಲ್ತ್ದ್ ಲೆಪ್ಪುಡಾದೆರ್. ಇಂಚಿರ್ದ್ ಕಂಡನೆ ಪೊಲೀಸ್ ಸ್ಟೇಶನ್ಗ್ ಪೋವೊಂದಿತ್ತಿಲೆಕನೆ ಮೋನಿಕಾ ಇಲ್ಲರ್ದ್ 160 ಗ್ರಾಂ ಪದ್ದೈ ಬಂಗಾರ್, 1.80 ಲಕ್ಷ ಕಾಸ್ ಪತೊಂದು ಪದ್ರಾಡಾತಲ್. ಪೊಲೀಸ್ ಸ್ಟೇಶನ್ಡ್ ಕಂಡನ್ಯನ್ ಪೊಲೀಸೆರ್ ವಿಚಾರಣೆ ಮಲ್ತ್ದೆರ್. ಪೊಲೀಸ್ ಸ್ಟೇಶನ್ರ್ದೇ ಮೋನಿಕಾಗ್ ಕಂಡನ್ಯೆ ಫೋನ್ ಮಲ್ತ್ದೆ. ಆಂಡ ಮೋನಿಕಾ ಫೋನ್ ದೆತ್ತ್ದಿಜಲ್. ಈ ಬಗೆಟ್ ಅನುಮಾನ ಬತ್ತ್ದ್ ಮೋನಿಕಾನ ಕಂಡನೆ ಚಂದ್ರಲೇಔಟ್ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆ. ಬೊಕ್ಕ ಮೋನಿಕಾ ಪೊಲೀಸ್ ಕಾನ್ಸ್ಟೇಬಲ್ ರಾಘವೇಂದ್ರನ ಒಟ್ಟುಗು ಬಲ್ತ್ದಲ್ ಪನ್ದ್ ತೆರಿಯೊಂದಿತ್ತಿಲೆಕನೆ ಪೆರಿಯ ಅಧಿಕಾರಿಲು ರಾಘವೇಂದ್ರನ್ ಸಸ್ಪೆಂಡ್ ಮಲ್ತ್ದೆರ್.