Last updated on January 27th, 2026 at 03:05 pm
ಕುಡ್ಲ,ಜ. 27: ಅಕ್ರಮ ಬ್ಯಾನರ್ ದೆಪ್ಪಾವುನ ವಿಚಾರೊಡು ಶಿಡ್ಲಘಟ್ಟ ನಗರಸಭೆತ ಪೌರಾಯುಕ್ತೆದಿ ಅಮೃತಾ ಗೌಡಗ್ ಪೋಡಿಕಟ್ಟಾದ್ ಪೆದಂಬು ನೆರ್ತಿನ ಪ್ರಕರಣೊಗು ಸಂಬಂಧಿತ್ದ್ ಕಾಂಗ್ರೆಸ್ ಮುಖಂಡೆ ರಾಜೀವ್ ಗೌಡನ್ ಚಿಕ್ಕಬಳ್ಳಾಪುರ ಪೊಲೀಸೆರ್ ಅರೆಸ್ಟ್ ಮಲ್ತ್ದೆರ್. ಈ ನಡುಟು ರಾಜೀವ್ ಗೌಡಗ್ ದೆಂಗ್ತಪ್ಪಾಯೆರ ಸಕಾಯ ಮಲ್ದಿನ ಆರೋಪಡ್ ಕುಡ್ಲದ ಉದ್ಯಮಿ ಒರಿಯನ್ ಪೊಲೀಸೆರ್ ಅರೆಸ್ಟ್ ಮಲ್ತ್ದೆರ್ ಪನ್ದ್ ವರದಿ ಆತ್ಂಡ್.
ಕೈದಾತಿನಾಯನ್ ಮೈಕಲ್ ಜೋಸೆಫ್ ರೇಗೊ ಪನ್ದ್ ಗುರ್ತ ಪತ್ತ್ದೆರ್. ಮೈಕಲ್ ಕುಡ್ಲ ಮೂಲೊದ ಉದ್ಯಮಿ. ಇರ್ವೆರೆನ್ಲಾ ಪೊಲೀಸೆರ್ ಕೇರಳ ಗಡಿರ್ದ್ ಲೆತೊಂದು ಬತ್ತ್ದೆರ್. ರಾತ್ರೆ ಇರ್ವೆರೆನ್ಲಾ ಪೊಲೀಸೆರ್ ಚಿಕ್ಕಬಳ್ಳಾಪುರಗ್ ಲೆತೊಂದು ಪೋತೆರ್. ಇನಿ ಮೊಕಲೆನ್ ಕೋರ್ಟ್ದ ಎದುರು ಲೆತೊಂದು ಪೋಯೆರ ಉಲ್ಲೆರ್.
ಮೈಕಲ್ ಜೋಸೆಫ್ ರೇಗೊಗ್ ಪಚ್ಚನಾಡಿಡ ಫಾರ್ಮ್ ಹೌಸ್ ಉಂಡು. ಆತೇ ಅತ್ತಂದೆ, ಕುಡ್ಲದ ಫಳ್ನೀರ್ಡ್ ಫರ್ನಿಚರ್ ಶೋರೂಮ್ ಉಂಡುಗೆ. ಇತ್ತೆ ಚಿಕ್ಕಬಳ್ಳಾಪುರ ಪೊಲೀಸೆರ್ ವಿಚಾರಣೆಗ್ ಲೆತೊಂದು ಪೋತೆರ್.
ಶಿಡ್ಲಘಟ್ಟ ಕೋರ್ಟ್ದ ಎದುರು ಆರೋಪಿಲೆನ್ ಲೆತೊಂದು ಪೋಯೆರೆ ಇಪ್ಪುನ ಪೊಲೀಸೆರ್ ರಾಜೀವ್ ಗೌಡನ್ ಮಾತ್ರ ಪೊಲೀಸ್ ಕಸ್ಟಡಿಗ್ ಕೇನುವೆರ್ಗೆ. ಕುಡೊರಿ ಆರೋಪಿ ಮೈಕಲ್ನ್ ನ್ಯಾಯಾಂಗ ಕೈದ್ಗ್ ಒಪ್ಯಾವುನ ಸಾಧ್ಯತೆ ಉಂಡು.