Last updated on January 27th, 2026 at 04:16 pm
ಬೆಂಗಳೂರು, ಜ. 27: ಮಹಾತ್ಮ ಗಾಂಧೀಜಿ ನ ಪುದರ್ನ್ ಶಾಶ್ವತ ಮಲ್ಪುನ ಉದ್ದೇಶೊಡು ರಾಜ್ಯೊದ ಮಾತಾ ಗ್ರಾಮ ಪಂಚಾಯತ್ಲೆಗ್ ಪುದರ್ ದೀಪುನ ನಿರ್ಧಾರೊನು ಕಾಂಗ್ರೆಸ್ ಪಕ್ಷ ಬೊಕ್ಕ ರಾಜ್ಯ ಸರ್ಕಾರ ಗೆತೊಂದುಂಡು ಪನ್ದ್ ಉಪ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ತೆರಿಪಾದೆರ್. ಮನ್ರೇಗಾ (MNREGA) ಯೋಜನೆ ಪಿರ ಸ್ಥಾಪನೆಗ್ ಆಗ್ರಹ ಮಲ್ತ್ದ್ ಬೆಂಗಳೂರ್ದ ಫ್ರೀಡಂ ಪಾರ್ಕ್ಡ್ ನಡತಿನ ಕಾಂಗ್ರೆಸ್ದ ಪೊರ್ಮ್ಬಾಟೊಡು ಪಾತೆರ್ನ ಆರ್, ನನದ ದಿನೊಕ್ಲೆಡ್ ಗ್ರಾಮ ಪಂಚಾಯತ್ಲೆಗ್ ಮಹಾತ್ಮ ಗಾಂಧಿಯೆರೆನ ಪುದರ್ ದೀಪ ಪನ್ದ್ ಸ್ಪಷ್ಟ ಮಲ್ದೆರ್.
ಕೇಂದ್ರ ಸರ್ಕಾರ ಗ್ರಾಮ ಪಂಚಾಯತ್ಲೆನ ಬಲ ಕಮ್ಮಿ ಮಲ್ತೊಂದಿತ್ತ್ದ್, ಪಂಚಾಯತ್ಲೆನ ಅಧಿಕಾರೊನು ಒಯ್ತೊಂದು, ಉದ್ಯೋಗೊದ ಹಕ್ಕ್ನ್ ಪಾಪದಕ್ಲೆ ಕೈರ್ದ್ ಒಯ್ತೊಂದುಂಡು ಪನ್ದ್ ಡಿಕೆ ಶಿವಕುಮಾರ್ ಆರೋಪ ಮಲ್ತ್ದೆರ್. ಮನ್ರೇಗಾ ಕಾಯ್ದೆನ್ ಸಮಗಟ್ಟ್ ಜಾರಿಗ್ ಕನವೊಡು ಪನ್ದ್ ರಾಜ್ಯಪಾಲೆರೆಗ್ ಬಿನ್ನಪು ಮಲ್ಪುವ. ಈ ವಿಚಾರೊಡು ರಾಜಭವನೊಗು ಪೋಪ. ಬೋಡಾಂಡ ಅರೆಸ್ಟ್ ಆಯೆರಲಾ ರೆಡಿ ಉಲ್ಲ ಪನ್ದ್ ಪನ್ಡೆರ್. ರಾಜ್ಯಪಾಲೆರ್ ಈ ಬಗೆಟ್ ಕೇಂದ್ರ ಸರ್ಕಾರೊದ ಮಿತ್ತ್ ಪ್ರೆಶರ್ ಪಾಡೊಡು ಪನ್ದ್ ಆರ್ ಆಗ್ರಹ ಮಲ್ತೆರ್.
ಪಾಪದಕ್ಲೆನ, ದಲಿತೆರೆನ ಬೊಕ್ಕ ರೈತೆರೆ ಪರ ನಿಜವಾದ್ ಪೊರ್ಮ್ಬಾಟ ಮಲ್ಪುನ ಪಕ್ಷ ಕಾಂಗ್ರೆಸ್ ಮಾತ್ರ. ಪಾಪದಕ್ಲೆನ ಯೋಜನೆಲೆನ್ ಬಿಜೆಪಿದಕುಲು ರದ್ದ್ ಮಲ್ತೊಂದಿತ್ತ್ದ್, ಉಂದೆಕ್ ಆರ್ಎಸ್ಎಸ್ ಮಾರ್ಗದರ್ಶನ ಕೊರೊಂದುಂಡು ಪನ್ದ್ ಸಿಎಂ ಆರೋಪ ಮಲ್ತೆರ್. ಮನ್ರೇಗಾ ಯೋಜನೆನ್ ಕುಡ ಕನಯೆರೆ ಆಗ್ರಹ ಮಲ್ತ್ದ್ ಕಾಂಗ್ರೆಸ್ ನಾಯಕೆರ್ ಸಿಎಂ ಸಿದ್ದರಾಮಯ್ಯೆ, ಡಿಸಿಎಂ ಡಿ.ಕೆ.ಶಿವಕುಮಾರ್ ಬೊಕ್ಕ ಎಐಸಿಸಿ ಉಸ್ತುವಾರಿ ರಣದೀಪ್ ಸುರ್ಜೇವಾಲೆರೆನ ಮುತಾಲಿಕೆಡ್ ಲೋಕಭವನೊಡು ರಾಜ್ಯಪಾಲೆರೆಡ ಒಯಿಲ್ ಬರೆಪಾಯೆರ್.