Last updated on January 27th, 2026 at 05:04 pm
ಮಲ್ಪೆ, ಜ. 27: ಸೋದ್ಯ ದಿಂಜಿನ ವೀಡಿಯೋ ಒಂಜಿ ಮಲ್ಪೆ ಬಂದರ್ರ್ದ್ ವೈರಲ್ ಆತ್ಂಡ್. ಪಡ್ಡಾಯಿಡ್ ಪತ್ದ್ ಕನತಿನ ಫ್ರೆಷ್ ಬಂಗುಡೆ ಮೂರ್ದ್ ದೀಬೊಕ್ಕಲಾ ತುಲ್ಲರೊಂದುಪ್ಪುನ ವೀಡಿಯೋ ಇತ್ತೆ ಒರ್ಮೆಲಾ ವೈರಲ್ ಆತ್ಂಡ್ ಅಂಚೆನೇ ಜನೊಕ್ಲೆನ ಮಂಡೆಡ್ ಸಾರ ಪ್ರಶ್ನೆಲೆನ್ಲಾ ಉಂಡು ಮಲ್ದ್ಂಡ್.
ನೆತ್ತ ಪಿರವುದ ವಿಜ್ಞಾನ ದಾದ?
ತೂನಗ ಒರ ಉಂದು ದಾದ ಮಾರೆ ಪನ್ದ್ ಎನ್ನ್ಂಡಲಾ, ಪೋಡ್ಯೊಡಾಯಿನ ಸಂಗತಿ ದಾಲ ಇಜ್ಜಿ. ಉಂದೊಂಜಿ ಸ್ವಾಭಾವಿಕ ಪ್ರಕ್ರಿಯೆ. ಕೆಲವೊರ ಒಂಜಿ ಪ್ರಾಣಿ ಸೈನಗ ಅವೆತ ಬೊಂಡು (Brain) ಸೈತ್ಂಡಲಾ ಅವೆತ ಮಾಸೊಡು ಅಡೆನೋಸೈನ್ ಟ್ರೈಫೋಸ್ಫೇಟ್ (Adenosine Triphosphate – ATP) ಪನ್ಪಿ ಕೆಮಿಕಲ್ ಬೊಕ್ಕ ಪ್ರಚೋದನಾ ಸೂಕ್ಷ್ಮತೆ ಒರಿದಿಪ್ಪುಂಡು. ಈ ಅಡೆನೋಸೈನ್ ಟ್ರೈಫೋಸ್ಫೇಟ್ ನ್ ಪ್ರಾಣಿ ಜೂವಕೋಶೊದ ‘ಕೆಮಿಕಲ್ ಬ್ಯಾಟರಿ’ ಪನ್ದ್ಲಾ ಪನೊಲಿ. ಮೂರುನಗ ಅತ್ತ್ಂಡ ಕುತ್ಪುನಗ ನರ ಪೂಲಾದ್ ಕ್ಯಾಲ್ಸಿಯಂ ಅಯಾನ್ (Calcium ion) ಮಾಸೊದ ಜೂವಕೋಶೊಲೆಗ್ ಪೋಪುಂಡು, ಈ ಪ್ರಕ್ರಿಯೆ ಬೊಂಡುರ್ದು ಒವ್ವೇ ಸಿಗ್ನಲ್ ಬತ್ತಿಜಿಂಡಲಾ ಮಾಸ ತುಲ್ಲರುಲೆಕ ಮಲ್ಪುಂಡು. ಉದೆನ್ ಕೆಲವೆರ್ ಮಸಲ್ ಮೆಮೊರಿ (Muscle Memory) ಪನ್ದ್ಲಾ ಪನ್ಪೆರ್.
ಬೂತೊಗು ಕೋರಿ ಬಂಟೆ ಮಲ್ಪುನಗಲಾ ಒರೊರ ಪಾಕ ಪೊರ್ತಾದ್ ಬೊಕ್ಕಲಾ ಕೋರಿ ತುಲ್ಲರುನೆನ್ ನಮ ತೂದುಪ್ಪ. (ಮಾತಲಾ ಮಸಲ್ ಮೆಮೊರಿ ಆದುಪ್ಪಂದ್, ಒರೊರ ಕೋರಿ ಸಯ್ಯಂದೆ ಬೇನೆಡ್ಲಾ ತುಲ್ಲರೊಂದುಪ್ಪು😬). ತರೆ ಕೊಯ್ನ ಕೋರಿಲಾ ಇಂಚ ತುಲ್ಲರುನ ತೂದುಪ್ಪ. ಇಂಚ ಮಸಲ್ ಮೆಮೊರಿ ಪಾಕ ಪೊರ್ತು ಇಪ್ಪುಜಿ. ಸೈತಿನ ಒಂತೆ ಪೊರ್ತು ಮಾತ್ರ ಇಪ್ಪುಂಡು. ಅಂಚಾದ್ ಮೀನ್ಲೆಡ್ ನಮಕ್ ತೂವರೆ ತಿಕ್ಕುನ ಬಾರೀ ಅಪರೂಪ, ದಾಯೆ ಪನ್ಡ್ ಮೀನ್ ಕಡಲ್ರ್ದ್ ಇಲ್ಲಗ್ ಎತ್ತ್ನಗ ಸೈತ್ದ್ ಪಾಕ ಪೊರ್ತಾದುಪ್ಪುಂಡು. ಇಂಚಿನ ನಡಕೆಲು ಕಾಲಿ ಬಂದರ್ಡಾ ಅತ್ತ್ ಅಪ್ಪಗಪಗ ಪತ್ತ್ದ್ ಕೆರ್ತಿನ ಮೀನ್ಲೆಡ್ ಮಾತ್ರ ತೂವೊಲಿ.