Last updated on February 8th, 2026 at 04:22 pm
ಒಡಿಪು, ಫೆ. 08: ಉಗ್ಗೆಲ್ಗ್ ಲಾಗಿದ್ ಆತ್ಮಹತ್ಯೆ ಮಲ್ತೊನುನ ಪೊರ್ತುಡು ಆಂಜೊವು ಒರಿಯನ ತರೆ ತುಂಡಾದ್ ಬೇತೆ ಆತಿನ ನಡಕೆ ಒಡಿಪು ಪೇಂಟೆದ ಅಂಬಾಕಿಲ್ ವಾರ್ಡ್ದ ಕಕ್ಕುಂಜೆಡ್ ಕೋಡೆ ರಾತ್ರೆ ನಡತ್ದ್ಂಡ್.
ತೀರ್ದಿನಾರೆನ್ ಪುರುಷೋತ್ತಮ ನಾಯಕ್ (52) ಪನ್ದ್ ಗುರ್ತ ಪತ್ತ್ದೆರ್. ತೀರ್ದಿನ ಪುರುಷೋತ್ತಮ ನಾಯಕ್ ಮೇರ್ ತನ್ನ ಇಲ್ಲದ ಉಗ್ಗೆಲ್ಡ್ ನೈಲಾನ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆರ್. ಈ ಪೊರ್ತುಡು ಆರೆನ ತರೆ ಪೂಲಾದಿತ್ತ್ದ್ ಉಗ್ಗೆಲ್ದ ನೀರ್ ನೆತ್ತೆರ್ರ್ದಾವರ ಕೆಂಪಾತ್ಂಡ್.
ಪುರುಷೋತ್ತಮ ನಾಯಕ್ ಮಣಿಪಾಲದ ಹೋಟೆಲ್ ಒಂಜೆಟ್ ಅಸಿಸ್ಟೆಂಟ್ ಸೂಪರ್ವೈಸರ್ ಎಲೆಕ್ಟ್ರಿಷಿಯನ್ ಆದ್ ಬೆನೊಂದಿತ್ತೆರ್. ಪುರುಷೋತ್ತಮ ನಾಯಕ್ ಮೇರ್ ಸಾಮಾಜಿಕ ಬೇಲೆಲೆಡ್ ಸಕ್ರಿಯೆರಾದಿತ್ತ್ದ್, ಕಕ್ಕುಂಜೆಯ ಕಟ್ಟೆ ಮಹಾದೇವಿ ದೇಲಂತಡೆದ ಆಡಳಿತ ಮಂಡಳಿದ ಕಾರ್ಯದರ್ಶಿ ಆದ್ಲಾ ಬೇಲೆ ಮಲ್ತ್ದೆರ್. ನಾಯಕ್ರೆನ ಇಲ್ಲಗ್ ನೆಟೆ ಎಡ್ಡೆ ಪುದರ್ ಇತ್ತ್ಂಡ್. ಆರ್ಥಿಕ ಸಮಸ್ಯೆರ್ದಾವರ ಆರ್ ಆತ್ಮಹತ್ಯೆ ಮಲ್ತೊಂದುಪ್ಪೆರ್ ಪನ್ದ್ ಅಂದಾಜಿ ಮಲ್ತ್ದೆರ್. ಈ ಬಗೆಟ್ ಒಡಿಪು ನಗರ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್, ಜಡ್ತೆ ಮಲ್ತೊಂದುಲ್ಲೆರ್.