Last updated on February 8th, 2026 at 02:07 pm
ಪಮ್ಮಕ್ಕೆನ ಪೊರುಂಬಾಟ– ತುಲು ಕಾದಂಬರಿ, 2024 ಟ್ ಅಚ್ಚಿಯಾದ್ ಉಡುಪಿ ತುಲು ಕೂಟ ಕೊರ್ಪುನ ಪಣಿಯಾಡಿ ಇನಾಮು ಗೆಂದಿನ ಕತೆ. ಬರೆತಿನಾರ್ ನಮ್ಮ ತುಲುನಾಡ್ದ ಪುಗಾರ್ತೆದ ಬರವುಗಾರ್ತಿ ಶ್ರೀಮತಿ ರೂಪಕಲಾ ಆಳ್ವ. ಯಾಪ ತಿಕ್ಂಡಲಾ ಮೋನೆನಿಲಿಕೆ ತೆಲಿಕೆ-ಬಾಯಿಕೆ ಪಾತೆರೊಡು, ಮೋಕೆದ ಅರ್ಕೆಲ್ಡ್ ಉಡಲ್ನ್ ತರ್ಕುನ ರೂಪಕ್ಕನ ಕಂಟಾವುಡು ಮೂಡಿನ ಪಮ್ಮಕ್ಕನ ಕತೆ ಓದುದು ವರ್ಷ ಕರೀಂಡಲಾ ಅಯಿತ ಬಗೆಟ್ ನಾಲಚ್ಚರ ಬರೆಯೊಡು ಪನ್ಪುನ ಅಂಗ್ಗ್ ಇನಿ ಏಲ್ಯ ತಿಕ್ಕಿನಿ. ಅಂದ್ ಆ ಕತೆನೇ ಅಂಚವುಂಡು. ಪುರ್ಸೊತು ತಿಕ್ನಪಗ ತಿಕ್ನಪಗ ಒರ ಪಮ್ಮಕ್ಕನ್ ತೂಕಾಂದಾಪುಂಡು, ಒಂಜಿ ಹಳ್ಳಿದ ಕೂಡು ಕುಟುಂಬಗ್ ಬೈದಿನ ಮದಿಮಲ್ ಪದ್ಮಾವತಿ, ಪಮ್ಮಕ್ಕೆ ಆಪುನಡೆಮುಟ್ಟದ ಒಡ್ಕ ದಾಂತಿನ ಪೊರುಂಬಾಟ, ಮೂಲು ಬಡಪತ್ತ್ ಉಂಡು, ಮಲ್ಲಸ್ತಿಕೆ ಉಂಡು, ಬಂಙ ಉಂಡು, ಸುಖ ಉಂಡು. ಮರ್ಯಾದಿಗಾದ್ ಪೇಚಾಡುನ ಪೊಣ್ಣನ ಬದ್ಕ್ ಬಂಙ, ಒಂಜಿ ಸ್ವಂತ ನಿಲೆ ಆವೊಡೂಂದು ಒದ್ದಾಟ, ಕಟ್ಟ್ ಕಟ್ಟಳೆದ ಬಿಲೆ ನೆಲೆ, ಕೈಕಂಜಿ ತಾಂಕ್ದ್ ಬದ್ಕ್ ಕಟ್ಟಿನ ಆನಿದ ದಿನೊಕುಲು, ಪಿದಯಿ ಬೆನಿಯೆರೆ ಪೋಯಿನ ಮಗೆ ಆಯನ ಕುಸಿವಸಿ ಮಂತೊನುನಗ ಅನುವು ಬೇನೆ. ಇಂಚ ಜೂವನದ ಮಾತಾ ಮೋನೆನ್ಲಾ ಕತೆಟ್ ಮೊಡೆಯೊಂದು ಪೋಯಿಲೆಕಾನೆ ಪಿರಾಕ್ದ ಕಟ್ಟ್ ಕಟ್ಲೆ, ಪೊಣ್ಣು ಮದಿಮಲಾಯಿನ ಕ್ರಮ, ತರವಾಡ್ ಅಯಿತ ಒಟ್ಟಿಗೆ ಒಂಜಾತ್ ತುಲುಟಿತ್ತೆ ಅಪ್ರೂಪಾವೊಂದುಪ್ಪುನ ಪದೊಕುಲು, ಒಟ್ಟಾರೆ ಪನ್ಪುನಾಂಡ ಪತೈವ ವರ್ಷ ಪಿರ ಪೋಯಿನ ಅನುಭವ ಕೊರ್ಪುನ ಕತೆ.
ಬೈಲ್,ತೋಟದ ಪೊರ್ಲು, ಬೆನ್ನಿದ ಬೇಲೆ, ಅಯಿನ್ ನಂಬುದು ದುಂಬುದಕ್ಲು ಏತ್ ಮಾತಾ ಕಾರ್ಬಾರ್ ಮಂತ್ದೆರ್ ಪನ್ಪುನೆನ್ ಎಸಲೆಸಲಾದ್ ಬುಡ್ಪಾವೊಂದು ಪೋಪುನ ಈ ಕತೆ ಬೂಕುದ ಮೋನೆ ಪಟ ಬೊಕಲಾ ಸೋಕುಂಡು!!! ಈ ಮೋನೆ ಪಟ ಮಂತಿನ ಸ್ಮರಣ್ ಆಳ್ವ ಅರೆಗೊಂಜಿ ಸಲಾಮು ಪನೋಡೇ. ದಾಯೆ ಪಂಡ ಈ ಕತೆನ್ ಸರೀ ಓದುದು ನೆತ್ತ ಉಲಯಿದ ತಿರ್ಲ್ಗ್ ಪತ್ತುನ ಪೊದಿಕೆ ಮಂತ್ದೆರ್, ಒಂಜಿ ರೆವೆನ್ಯೂ ಸ್ಟೇಂಪ್, ರಡ್ಡ್ ಕುರಲ್, ಬರೀಟೊಂಜಿ ಬಾರೀ ಪಿರಾಕ್ದ ಸರ್ಕಾರಿ ಕೆಂಪು ಬಸುತ ಪತ್ತ್ ಪೈಸೆದ ಪರಿದಿನ ಟಿಕೆಟ್, ನಡುಟು ಮಾತಾ ಇತ್ತ್ದ್ ದಾಲಾ ಇಜ್ಯಂದೆ ಒಂಟಿ ಆಯಿನ ಪಮ್ಮಕ್ಕೆ. ಬೊಲ್ಮುಗಲ್ದ ಬಾನ ಕತೆ ಪನ್ಪುಂಡು.
ಒಂಜಿ ಎಡ್ಡೆ ಕತೆನ್ ರೂಪಕ್ಕ ತುಲುವೆರೆಗ್ ಕೊರ್ದು ತುಲು ಬರವುದ ಸಿರಿತುಪ್ಪೆಗ್ ತಿರ್ಲ್ ದಿಂಜಿ ಕುರಲ್ ನ್ ಪಾಡ್ದೆರ್, ತುಲುವೆರ್ ಅಂಗ್ಡ್ ಓದೊಡಾಯಿನ ಕತೆ. ರೂಪಕ್ಕನ ಲೆಕಾನೆ ಎಡ್ಡೆ ಪೊರ್ಲು ಕೊಂಡಾಟ ಉಂಡು. ತುಲುವೆರ್ ಮಾತೆರ್ಲಾ ಈ ಕತೆನ್ ಓದುಲೆಕಾವಡ್, ರೂಪಕ್ಕ ನನಲಾತ್ ಎಡ್ಡೆ ಎಡ್ಡೆ ಕತೆಕ್ಲೆನ್ ಬರೆವಡ್. ಪನೊಂದು ಉಡಲ್ದಿಂಜಿನ ಎಡ್ಡೆಪ್ಪುಲೆನ್ ಬಯಕೊಂದುಲ್ಲೆ.
ಕುವಿಕು ಕಣ್ವತೀರ್ಥ