Last updated on February 11th, 2026 at 09:52 am
ಕುಡ್ಲ, ಫೆ. 11: ಆನ್ಲೈನ್ ಮ್ಯಾಟ್ರಿಮೋನಿ ಡ್ ಮದಿಮೆದ ಪುದರ್ಡ್ ಪೊಣ್ಣುಲೆಗ್ ದಗೆ ಮಲ್ತೊಂದಿತ್ತಿನ ಕೆಂಗುಡನ್ ಕುಡ್ಲ ಪೊಲೀಸೆರ್ ಉಲಕೈ ಮಲ್ತೊಂದೆರ್. ಮ್ಯಾಟ್ರಿಮೋನಿಡ್ ಆಣ್ ನಾಡೊಂದಿಪ್ಪುನ ಪೊಣ್ಣುಲೆನೇ ಈಡ್ ಮಲ್ತ್ದ್ ಮದಿಮೆ ಆಪೆ ಪನ್ದ್ ನಂಬಾದ್ ಲಕ್ಷಗಟ್ಲೆ ರೂಪಾಯಿ ದಗೆ ಮಲ್ದಿನ ಪ್ರಕರಣ ಬೊಲ್ಪುಗು ಬೈದ್ಂಡ್. ಕೈದಾತಿನಾಯನ್ ಸುಶಾಂತ್ ಪೂಜಾರಿ ಪನ್ದ್ ಗುರ್ತ ಪತ್ತ್ದಿತ್ತ್ದ್, ಉಂಬ್ಯನ ದಗೆಕ್ ತಾಂಗ್ ಕೊರೊಂದಿತ್ತಿನ ಮುಲ್ಕಿದ ಭಾಸ್ಕರನ್ಲಾ ಪೊಲೀಸೆರ್ ಪತ್ತ್ದೆರ್. ಸುಶಾಂತ್ ತನ್ನ ಅರ್ವತೆ ಪನ್ದ್ ಪನ್ಡ್ದ್ ಸಂತ್ರಸ್ತೆದಿ ಪೊಣ್ಣುಲೆನ ಇಲ್ಲದಕ್ಲೆನ್ ನಂಬಾಯೆರೆ ಭಾಸ್ಕರ್ ಧಾರ್ಮಿಕ ವಿಧಿವಿಧಾನೊಲೆಡ್ಲಾ ಪಾಲ್ಪಡೆಪೆದೆ ಪನ್ದ್ ಜಡ್ತೆಡ್ ತೆರಿದ್ ಬೈದ್ಂಡ್.
ರಡ್ಡ್ ಮದಿಮೆ, 9 ಪೊಣ್ಣುಲೆಗ್ ದಗೆ!
ಮದಿಮೆದ ಪುದರ್ಡ್ ಒಂಜತ್ತ್ ರಡ್ಡತ್ತ್ 9 ಪೊಣ್ಣುಲೆಗ್ ಸುಶಾಂತ್ ಕೈ ಕೊರ್ತೆ. ಇಂದೆಟ್ ರಡ್ಡ್ ಜತೊತ ಒಟ್ಟುಗು ಮದಿಮೆ ಆದ್ ಬೊಕ್ಕ ಕೈ ಕೊರ್ತೆ ಪನ್ದ್ ತೆರಿದ್ ಬೈದ್ಂಡ್. ಮ್ಯಾಟ್ರಿಮೋನಿ ವೆಬ್ಸೈಟ್ಡ್ ಗುರ್ತ ಮಲ್ತೊಂದು, ನಂಬಿಕೆ ಬುಲೆಪಾವೊಂದು ಬೊಕ್ಕ ಒಂತೆ ಒಂತೆನೇ ಕಾಸ್ ಗೆತೊಂದು ಆರೋಪಿ ಪದ್ರಾಡಾಪೆದೆ ಪನ್ದ್ ಪೊಲೀಸೆರ್ ತೆರಿಪಾದೆರ್.
ಮುಂಬೈಡ್ ಒರ್ತಿ ಪೊಣ್ಣನ್ ಮದಿಮೆ ಆದಿತ್ತ್ದ್, ಆಲೆರ್ದ್ ಸುಮಾರ್ 6.6 ಲಕ್ಷ ರೂಪಾಯಿ ಗೆತೊಂದು ಪದ್ರಾಡಾತೆ. ಒಡಿಪುದ ರಡ್ಡ್ ಪೊಣ್ಣುಲೆಗ್ ಮದಿಮೆ ಆಪೆ ಪನ್ದ್, ಕಾಸ್ ಗೆತೊಂದು ದಗೆ ಮಲ್ತ್ದೆ. ಇಂಚೆನೇ ಬೆಂಗಳೂರ್ಡ್ ರಡ್ಡ್ ಪೊಣ್ಣುಲು, ಕಾರ್ಲದ ಒರ್ತಿ ಜವನ್ದಿ ಬೊಕ್ಕ ಕುಡ್ಲದ ಕುಡೊರ್ತಿ ಪೊಣ್ಣಗ್ಲಾ ಮಂಗೆ ಮಲ್ದಿನ ಪ್ರಕರಣೊಲು ಇತ್ತೆ ಪಿದಯಿ ಬೈದ.
ಈ ಬಗೆಟ್ ಕುಡ್ಲದ ಕಾವೂರು ಪೊಲೀಸ್ ಸ್ಟೇಶನ್ಡ್ ಸಂತ್ರಸ್ತೆದಿ ಒರ್ತಿ ಒಯಿಲ್ ಬರೆಪಾದಿತ್ತೆರ್. ಒಯಿಲ್ದ ಆಧಾರೊಡು ಜಡ್ತೆ ಸುರು ಮಲ್ತಿನ ಪೊಲೀಸೆರೆಗ್ ಉಂಬ್ಯನ ಗೊಬ್ಬುಲೆನ್ ತೂದು ಶಾಕ್ ಆತ್ಂಡ್. ಡೂಪ್ಲಿಕೇಟ್ ಸಮ್ಮಲೆ-ಅರ್ವತ ಲೆಕ ಮದಿಮೆದ ನಾಟಕ ಮಲ್ತ್ದ್ ಪೊಣ್ಣುಲೆನ ಜೂವನೊಡು ಗೊಬ್ಬೊಂದಿತ್ತಿನ ಆರೋಪಿಲೆನ್ ಇತ್ತೆ ಪೊಲೀಸೆರ್ ಉಲಕೈ ಮಲ್ತೊಂದು, ನ್ಯಾಯಾಂಗ ಕೈದ್ಗ್ ಒಪ್ಯಾದೆರ್.
ಆನ್ಲೈನ್ ಮ್ಯಾಟ್ರಿಮನಿ ಗಲಸುನಕುಲು ಎಚ್ಚರ್ಗೆಡ್ ಇಪ್ಪೊಡು ಪನ್ದ್ ಪೊಲೀಸೆರ್ ಸಾರ್ವಜನಿಕೆರೆಗ್ ಕೆಬಿಪಾತೆರ ಪನ್ತೆರ್.