Last updated on March 3rd, 2026 at 05:25 pm
ಕುಡ್ಲ, ಮಾ. 03: ಒಮಾನ್ ದೇಶೊಡು ಬೇಲೆ ಮಲ್ತೊಂದಿತ್ತಿನ ಉಳ್ಳಾಲದ ಸೋಮೇಶ್ವರ ಮೂಲೊದ ಜವನೆ ಒರಿ ತನ್ನ ಅದೆಟೇ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದಿನ ನಡಕೆ ನಡತ್ದ್ಂಡ್. ತಾನ್ ಮೋಕೆ ಮಲ್ತೊಂದಿತ್ತಿನ ಪೊಣ್ಣು ನಾಲ್ ವರ್ಸೊದ ಮೋಕೆನ್ ನಿರಾಕರಿತಿನೆಕ್ ಬೆಸರ್ಡ್ ಜವನೆ ಆತ್ಮಹತ್ಯೆ ಮಲ್ತೊಂದಿನ ತೆರಿದ್ ಬೈದ್ಂಡ್.
ತೀರ್ದಿನಾರೆನ್ ಉಳ್ಳಾಲ ಸೋಮೇಶ್ವರದ ಚಂದ್ರ ಬೊಕ್ಕ ದೀಪಾ ದಂಪತಿಲೆನ ಮಲ್ಲ ಮಗೆ ಪುನೀತ್ ಪೂಜಾರಿ (32) ಪನ್ದ್ ಗುರ್ತ ಪತ್ತ್ದೆರ್. ಪುನೀತ್ ಕರಿನ ಒಂಜರೆ ವರ್ಸೊರ್ದಿಂಚಿ ಒಮಾನ್ದ ಲಿಫ್ಟ್ ಕಂಪೆನಿ ಒಂಜೆಟ್ ಬೇಲೆ ಮಲ್ತೊಂದಿತ್ತೆರ್. ಪುನೀತ್ ಕರಿನ ನಾಲ್ ವರ್ಸೊರ್ದಿಂಚಿ ಕುಡ್ಲದ ಉರ್ವ ದ ಒರ್ತಿ ಪೊಣ್ಣನ್ ಮೋಕೆ ಮಲ್ತೊಂದಿತ್ತೆರ್. ಬಾರಿ ಎಡ್ಡೆಡ್ ಇತ್ತಿನ ಜೋಡಿ ಪಾಕ ಕಡೆಟ್ ಸುತ್ತುದಿನ ಫೋಟೊಲೆನ್ ಬಲೆತ್ತಾನೊಲೆಡ್ಲಾ ಪಟ್ಟ್ದಿತ್ತೆರ್.
ಇಂಚಿಪ ಇಂಚಿಪ ಆ ಪೊಣ್ಣು ಪುನೀತ್ನ ಫೋನ್ ದೆಪ್ಪೆದಿಜಲ್ಗೆ, ಮೆಸೇಜ್ಲೆಗ್ ರಿಪ್ಲೈ ಕೊರಂದಿತ್ತಿಜಲ್ಗೆ ಮೋಕೆನೇ ಬೊರ್ಚಿ ಪನ್ದ್ ಇತ್ತಲ್ಗೆ. ಅಂಚಾದ್ ಮೋಕೆ ಮಲ್ತಿ ಪೊಣ್ಣರ್ದ್ ದೂರಾತಿನೆರ್ದಾವರ ಪುನೀತ್ ಬೆಸರ್ಡ್ ಇತ್ತ್ದ್, ಈ ವಿಚಾರೊನು ತನ್ನ ದೋಸ್ತಿಲೆಡಲಾ ಪನ್ದಿತ್ತೆರ್ಗೆ.
ಮೋಕೆನ್ ನಿರಾಕರಿತ್ನೆಕ್ ಬೆಸರ್ಡ್ ಪುನೀತ್ ಸಾಮಾಜಿಕ ಬಲೆತ್ತಾನೊಡು ಲೈವ್ ವಿಡಿಯೋ ಮಲ್ತ್ದ್, ತನ್ನ ಅದೆಟೇ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆರ್. ಮಧ್ಯಪ್ರಾಚ್ಯೊಡು ಇತ್ತೆ ನಡತೊಂದುಪ್ಪುನ ಕೊಲಲ, ಅಶಾಂತಿದ ನಡುಟು ಒಮಾನ್ದ ಕಾನೂನು ಪ್ರಕ್ರಿಯೆಲೆಗ್ ಎಚ್ಚ ಪೊರ್ತು ತಾಗುನ ಸಾಧ್ಯತೆ ಉಂಡು. ಅಂಚಾದ್ ಪುನೊನು ಭಾರತೊಗು ಕನಯೆರೆ ಕಡೆಸ್ಸುನ ಸಾಧ್ಯತೆ ಉಂಡು.