ಬೆರ್ಮಾವರ : ನಾಯಿ ಅಡ್ಡ ಬತ್ತ್‌ದ್ ಕಬ್ಬೆ ಬೂರ್ನ ರಿಕ್ಷಾ – ಡ್ರೈವರ್ ತೀರ್ಯೆರ್

Last updated on March 17th, 2026 at 08:15 am

ಬೆರ್ಮಾವರ, ಮಾ. 15: ನಾಯಿ ಅಡ್ಡ ಬತ್ತಿನೆರ್ದಾವರ ರಿಕ್ಷಾ ಒಂಜಿ ಕಬ್ಬೆ ಬೂರ್ದು ಡ್ರೈವರ್ ತೀರ್ದಿನ ನಡಕೆ ಒಡಿಪು ಬೆರ್ಮಾವರ ಹೆಗ್ಗುಂಜೆ ಗ್ರಾಮೊದ ಮೈರ್‌ಕೋಮೆ ಹಾಲ್ ಡೈರಿ‌ದ ಕೈತಲ್ ನಡತ್‌ದ್ಂಡ್. ತೀರ್ದಿನಾರೆನ್ ರಿಕ್ಷಾ ಡ್ರೈವರ್ ನರಸಿಂಹ ಪೂಜಾರಿ ಪನ್ದ್ ಗುರ್ತ ಪತ್ತ್‌ದೆರ್.

ಮಾ.13ತಾನಿ ಮಧ್ಯಾಹ್ನದ ಪೊರ್ತುಗು ಶಿರೂರು ಮೂಜಿಕೈ ಕಡೆರ್ದ್ ಕೊಕ್ಕರ್ಣೆ ದಂಚಿ ಪೋವೊಂದಿತ್ತಿನ ರಿಕ್ಷಾಗ್ ನಾಯಿ ಅಡ್ಡ ಬತ್ತಿತ್ತ್‌ದ್, ಅವೆಕ್ ನರಸಿಂಹ ಪೂಜಾರಿ ರಿಕ್ಷಾನ್ ಒರರ್ದ್ ಒರಾನೆ ಎಡತ್ತ್‌ದ್ ತಿರ್ಗಾಯಿನೆರ್ದಾವರ, ರಿಕ್ಷಾ ಅಂಕೆ ತತ್ತ್‌ದ್ ಸಾದಿಗ್ ಕಬ್ಬೆ ಬೂರ್ದುಂಡುಗೆ. ಅಂಚಾದ್ ಗಾತಿದ ಗಡಾಕುಲಾತಿನ ನರಸಿಂಹ ಪೂಜಾರಿ ಮರ್ದ್ ಪಲಿಪಂದೆ ಪ್ರೈವೇಟ್ ಆಸ್ಪತ್ರೆಡ್ ಮಾ.14ತಾನಿ ತೀರ್ದೆರ್ ಪನ್ದ್ ತೆರಿದ್ ಬೈದ್ಂಡ್. ಈ ಬಗೆಟ್ ಬೆರ್ಮಾವರ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.