ಕುಡ್ಲ ಸಿಸಿಬಿ ಪೊಲೀಸೆರೆ ಕಾರ್ಯಾಚರಣೆ : ರಿಕ್ಷಾಡ್ ಎಂಡಿಎಂಎ ಮಾರೊಂದಿತ್ತಿನ ಮೂವೆರ್ ಆರೋಪಿಲು ಅರೆಸ್ಟ್

Last updated on March 23rd, 2026 at 01:21 pm

ಕುಡ್ಲ, ಮಾರ್ಚ್ 23: ನಿಷೇದಿತ ಮಾದಕ ಸೊತ್ತು ಎಂಡಿಎಂಎ ಗೆತೊಂದು ಅವೆನ್ ಕುಡ್ಲ ಪೇಂಟೆದ ಸಾರ್ವಜನಿಕೆರೆಗ್ ಅಂಚೆನೇ ವಿದ್ಯಾರ್ಥಿಲೆಗ್ ರಿಕ್ಷಾಡ್ ಪಂಪ್‌ವೆಲ್-ಎಕ್ಕೂರು ಪರಿಸರೊಡು ಮಾರೊಂದಿತ್ತಿನ ಬಗೆಟ್ ಪತ್ತ ಒಲವು ಇತ್ತ್‌ದ್ ಕುಡ್ಲ ಸಿಸಿಬಿ ಪೊಲೀಸೆರ್ ಮಾರ್ಚ್ 22 ತಾನಿ ದಾಳಿ ಮಲ್ತ್‌ದ್ ಮೂವೆರ್ ಆರೋಪಿಲೆನ್ ಕೈದ್ ಮಲ್ತ್‌ದೆರ್.

ಕೈದಾತಿನಕಲೆನ್ ತೊಕ್ಕೊಟ್ಟು, ಪೆರ್ಮನ್ನೂರು ಚೆಂಬುಗುಡ್ಡೆ ನಿವಾಸಿ ದಿವಂಗತ ಅಬ್ದುಲ್ ಖಾದರ್ ಮೆರೆನ ಮಗೆ ಹೈದರ್ ಅಲಿಯಾಸ್ ಹೈದರ್ ಅಲಿ (53), ಚೆಂಬುಗುಡ್ಡೆ ಜುಮಾ ಪಲ್ಲಿದ ಎದುರುದ ಮಟನ್ ನವಾಝ್ ರೆನ ಬಾಡಾಯಿದ ಇಲ್ಲಡ್ ಇಪ್ಪುನ ದಿವಂಗತ ಅಬೂಬಕ್ಕರ್ ಮೆರೆನ ಮಗೆ ಮೊಹಮ್ಮದ್ ಸಜಾದ್ (29) ಬೊಕ್ಕ ಮೂಲತಃ ಒಡಿಪು ಜಿಲ್ಲೆ ಕಾಪು ತಾಲೂಕು, ಶಿರ್ವ, ಗುರುಂಜಾಮನೆ ನಿವಾಸಿ, ಇತ್ತೆ ಕುಡ್ಲ-ಪಂಪ್‌ವೆಲ್ ಉಜ್ಜೋಡಿ ರಾಧಾ ರೆಸಿಡೆನ್ಸಿ ಫ್ಲಾಟ್ ನಂಬ್ರ 103ತ ನಿವಾಸಿ ಜಾನ್ ಐವನ್ ಮೆನೆಜಸ್ ಮೆರೆನ ಮಗೆ ಜೈಸನ್ ಮೆನೆಜಸ್ (26) ಪನ್ದ್ ಗುರ್ತ ಪತ್ತ್‌ದೆರ್.

ಕೈದಾತಿನ ಆರೋಪಿಲೆನ ಕೈರ್ದ್ 2.50 ಲಕ್ಷ ರೂಪಾಯಿ ಮೌಲ್ಯೊದ 26 ಗ್ರಾಂ ತೂಕೊದ ನಿಷೇದಿತ ಮಾದಕ ಸೊತ್ತು ಎಂಡಿಎಂಎ, 37 ಸಾರ ರೂಪಾಯಿ ಕಾಸ್, 5 ಮೊಬೈಲ್ ಫೋನ್, ವೇಯಿಂಗ್ ಸ್ಕೇಲ್, ಕೆಎ19 ಎಸಿ2245 ರಿಜಿಸ್ಟ್ರೇಷನ್‌ದ ರಿಕ್ಷಾ ಸೇರ್ದ್ ಒಟ್ಟು 4,37,500/- ರೂಪಾಯಿ ಮೌಲ್ಯೊದ ಸೊತ್ತುಲೆನ್ ಪೊಲೀಸೆರ್ ಉಲಕೈ ಮಲ್ತೊಂದೆರ್. ಈ ಬಗೆಟ್ ಕಂಕನಾಡಿ ನಗರ ಪೋಲೀಸ್ ಸ್ಟೇಷನ್‌ಡ್ ಪ್ರಕರಣ ದಾಕಲಾತ್ಂಡ್.