Last updated on March 23rd, 2026 at 11:19 am
ಉಬಾರ್, ಮಾ. 23: ಮಾದಕ ಸೊತ್ತು ನಿಂಗ್ದ್ ಸಾರ್ವಜನಿಕ ಜಾಗೆಡ್ ತತ್ತ್ದ್ ನಡತೊಂದಿತ್ತಿನ ಜವನನೊರಿಯನ್ ಉಬಾರ್ ಪೊಲೀಸೆರ್ ಕೈದ್ ಮಲ್ತ್ದೆರ್. ಕೈದಾತಿನ ಜವನನ್ ಕಾಸ್ರೋಡ್ ಮೂಲೊದ ಯೂಸುಫ್ ಸಿ. ಇ. (28) ಪನ್ದ್ ಗುರ್ತ ಪತ್ತ್ದೆರ್.
ನಡಕೆದ ಒಲವು:
ಮಾರ್ಚ್ 22, 2026ದಾನಿ ಬಯ್ಯಡ್ ಉಬಾರ್ ಪೊಲೀಸ್ ಸ್ಟೇಶನ್ ಸೀಮೆದ ಕರ್ವೇಲ್ ಪನ್ಪಿನಲ್ಪ ಜವನೆ ಒರಿ ಅಸಭ್ಯ ಬೊಕ್ಕ ಅನುಚಿತವಾದ್ ನಡತೊಂದುಪ್ಪುನ ಬಗೆಟ್ ಪೋಲೀಸೆರೆಗ್ ಒಲವು ತಿಕ್ಕ್ದ್ಂಡ್. ಅಪಗನೇ ಜಾಗೆಗ್ ಬತ್ತಿನ ಪೊಲೀಸೆರ್ ಜವನನ್ ಉಲಕೈ ಮಲ್ತೊಂದು ವಿಚಾರಣೆ ಮಲ್ತ್ದೆರ್.
ಜವನನ ನಡಕೆಡ್ ಅಸಹಜತೆ ತೋಜಿದ್ ಬತ್ತಿನೆರ್ದಾವರ ಆಯೆ ಮಾದಕ ಸೊತ್ತು ದಾಲ ಗೆತೊಂದೆನಾ ಪನ್ದ್ ಪತ್ತ ಮಲ್ಪರೆ ಬೋಡಾದ್ ಪೋಲೀಸೆರ್ ವೈದ್ಯಕೀಯ ಪರಿಕ್ಷೆ ಮಲ್ಪಾದೆರ್. ಆ ಪರೀಕ್ಷೆಡ್ ಜವನೆ ನಿಷೇಧ ಆತಿನ ಮಾದಕ ಸೊತ್ತು ನಿಂಗ್ದಿನ ದೃಢ ಆತ್ಂಡ್.
ಈ ಬಗೆಟ್ ಉಬಾರ್ ಪೊಲೀಸ್ ಸ್ಟೇಶನ್ಡ್ ಎನ್ಡಿಪಿಎಸ್ ಕಾಯ್ದೆದ ಕಲಂ 27(b) ದ ಅಡಿಟ್ ಪ್ರಕರಣ(ಅ.ಕ್ರ. 42/2026) ದಾಕಲ್ತ್ದ್ ಆರೋಪಿನ ಮಿತ್ತ್ ಬೋಡಾಪಿನ ಕ್ರಮ ಗೆತೊಂದೆರ್ ಪನ್ದ್ ಪೋಲೀಸ್ ಮೂಲೊಲು ತೆರಿಪಾದ.