Last updated on March 7th, 2026 at 07:38 pm
ತುಮಕೂರು, ಮಾ. 07: ತುಮಕೂರು ಜಿಲ್ಲೆದ ಹೆಬ್ಬೂರು ಹೋಬಳಿದ ದಾಸರಹಳ್ಳಿ ಗ್ರಾಮೊಡು ಹಾರ್ಟ್ ಅಟ್ಯಾಕ್ ಆದ್ ಆಂಜೊವು ತೀರ್ದೆರ್ ಪನ್ದ್ ಎನ್ನ್ದಿತ್ತಿನ ಪ್ರಕರಣೊಗು ಇತ್ತೆ ಮಲ್ಲ ಟ್ವಿಸ್ಟ್ ತಿಕ್ಕ್ದ್ಂಡ್. ಪೊಲೀಸೆರೆ ಜಡ್ತೆಡ್ ಬೊಡೆದಿಯೇ ತನ್ನ ಕಂಡನ್ಯನ್ ಕೆರ್ತಿನ ತೆರಿದ್ ಬೈದ್ಂಡ್.
ದಾಸರಹಳ್ಳಿ ನಿವಾಸಿ ಪರಮೇಶ್ ಪನ್ಪಿನಾರ್ ಬೊಡೆದಿ ಆಶಾನ ಕೈಟ್ ಪೆರಣ ಕಲೆವೊಂದಿನ ಜಡ್ತೆಡ್ ತೆರಿದ್ ಬೈದ್ಂಡ್. ಕಂಡನ್ಯೆ ತೀರ್ದ್ ಕಾಲಿ ಇರ್ವ ದಿನೊಟೇ ಆಶಾ ಕುಡೊಂಜಿ ಮದಿಮೆ ಆಯೆರ ಪಿದಡ್ದಿನವು ಈ ಪ್ರಕರಣೊಡು ಅನುಮಾನ ಪುಟ್ಟುನ ಲೆಕ ಮಲ್ತ್ದ್ಂಡ್.
ತೀರ್ದಿನ ಪರಮೇಶ್ ಮೇರ್ ಆಶಾನ್ ರಡ್ಡನೇ ಮದಿಮೆ ಆದಿತ್ತೆರ್. ಮೂಲತಃ ಮಾಗಡಿ ಪ್ರದೇಶೊದ ಆಶಾ, ಸುರುತ ಕಂಡನ್ಯೆ ತೀರಿಬೊಕ್ಕ ಪರಮೇಶ್ ರೆನ್ ರಡ್ಡನೇ ಮದಿಮೆ ಆದ್ ಸುಮಾರ್ ಪತ್ತ್ ವರ್ಸೊರ್ದಿಂಚಿ ದಾಂಪತ್ಯ ನಡಪಾವೊಂದಿತ್ತಲ್. ಆಂಡ ಜನವರಿ 30ದಾನಿ ಪರಮೇಶ್ ಅಕಸ್ಮಿಕವಾದ್ ತೀರ್ದಿತ್ತೆರ್. ಅಪಗ ಆಶಾ, ಕಂಡನ್ಯಗ್ ಹಾರ್ಟ್ ಅಟ್ಯಾಕ್ ಆತ್ಂಡ್ ಪನ್ದ್ ಅಮಸರ ಅಮಸರಡ್ ಅಂತ್ಯಕ್ರಿಯೆ ನಡಪಾದಿತ್ತಲ್.
ಆಂಡ ಕಂಡನ್ಯೆ ತೀರ್ದ್ ಕಾಲಿ ಇರ್ವ ದಿನೊಟೇ ಆಶಾ ಮೂಜನೇ ಮದಿಮೆ ಆತಿನವು ಪರಮೇಶ್ ರೆನ ಸಂಬಂಧಿಕೆರೆಗ್ ಅನುಮಾನ ಉಂಡು ಮಲ್ತಿತ್ತ್ಂಡ್. ಅಂಚಾದ್ ಅಕುಲು ಪೊಲೀಸೆರೆಗ್ ಒಲವು ಕೊರ್ತೆರ್. ಅಪಗನೇ ಹೆಬ್ಬೂರು ಪೊಲೀಸೆರ್ ಜಡ್ತೆ ಸುರು ಮಲ್ಪುನಗ ಪರಮೇಶ್ನ್ ಕೆರ್ತಿನವು ತೆರಿದ್ ಬೈದ್ಂಡ್.
ಪೊಲೀಸೆರೆ ವಿಚಾರಣೆಡ್ ಆಶಾ ತನ್ನ ಚಂಗಾಯಿ ಚಂದ್ರಪ್ಪನೊಟ್ಟುಗು ಇತ್ತಿನ ಸಂಬಂಧೊನು ಒತ್ತೊಂದಲ್. ಕುಣಿಗಲ್ ಮೂಲೊದ ಚಂದ್ರಪ್ಪೆ ದುಂಬು ತನ್ನ ಸುರುತ ಬೊಡೆದಿಗ್ ಬದಿ ಕೇನ್ದ್ ಉಪದ್ರ ಕೊರ್ತಿನ ಪ್ರಕರಣೊಡು ಕರ್ಪಿಲ್ಲ ಶಿಕ್ಷೆ ತಿನ್ದಿತ್ತೆ. ಬೊಡೆದಿ ಕಿರುಕುಳ ತಡೆವೊನೆರಾವಂದೆ ಆತ್ಮಹತ್ಯೆ ಮಲ್ತೊಂದಿತ್ತಲ್. ಬೊಕ್ಕ ಬುಡುಗಡೆ ಆಯಿ ಬೊಕ್ಕ ಚಂದ್ರಪ್ಪೆ ಅಟಿಲ್ದ ಬೇಲೆಗ್ ಪೋಪೆದೆ.
ಈ ಪೊರ್ತುಡು ಆಶಾ ಬೊಕ್ಕ ಚಂದ್ರಪ್ಪನ ನಡುಟು ಮೋಕೆ ಬುಲೆದ್, ಇರ್ವೆರ್ಲಾ ಮದಿಮೆ ಆಪುನ ನಿರ್ಧಾರ ಮಲ್ತ್ದೆರ್. ಆಂಡ ಆಶಾನ ರಡ್ಡನೇ ಕಂಡನೆ ಪರಮೇಶ್ ಬದ್ಕ್ದ್ ಇಪ್ಪುನೇಟ ಮದಿಮೆ ಆಯೆರ ಸಾಧ್ಯ ಇಜ್ಜಿ ಪನ್ದ್ ಪ್ಲಾನ್ ಮಲ್ತಿನ ಆಶಾ, ದಮ್ಮು ಕಟ್ಟಾದ್ ಪರಮೇಶ್ನ್ ಕೆರ್ತಲ್ ಪನ್ದ್ ಪೋಲೀಸೆರ್ ತೆರಿಪಾದೆರ್.
ಬೊಕ್ಕ ಕಂಡನ್ಯೆ ಹಾರ್ಟ್ ಅಟ್ಯಾಕ್ ಆದ್ ತೀರ್ದೆರ್ ಪನ್ದ್ ನಾಟಕ ಮಲ್ತ್ದ್ ಮಾತೆರೆನ್ಲಾ ನಂಬಾದಲ್. ಕುಟುಮದಕುಲು ಬೆಸರ್ಡ್ ಅಂತ್ಯಕ್ರಿಯೆ ಮಲ್ತ್ದ್, ಕಾಲಿ ಇರ್ವ ದಿನೊಟೇ ಆಶಾ ತನ್ನ ಚಂಗಾಯಿ ಚಂದ್ರಪ್ಪನ್ ಮದಿಮೆ ಆದ್ ಹನಿಮೂನ್ಗ್ಲಾ ಪೋತಲ್.
ಪ್ರಕರಣ ಬಹಿರಂಗ ಆಯಿ ಬೊಕ್ಕ ಪೊಲೀಸೆರ್ ಆಶಾ ಬೊಕ್ಕ ಚಂದ್ರಪ್ಪೆ ಇರ್ವೆರೆನ್ಲಾ ಕೈದ್ ಮಲ್ತ್ದ್ ಪ್ರಕರಣ ದಾಕಲ್ತೊಂದೆರ್. ಇತ್ತೆ ಇರ್ವೆರ್ಲಾ ಕರ್ಪಿಲ್ಲ್ಡ್ ಇತ್ತ್ದ್, ಕಾನೂನು ಕ್ರಮ ದುಂಬರಿದ್ಂಡ್.