Last updated on April 7th, 2026 at 10:47 am
ಬೋಲ್ತೇರ್, ಏ. 07: ತಾಲೂಕ್ದ ಗುರುವಾಯನಕೆರೆ – ಉಬಾರ್ ರಾಜ್ಯ ಪೆರ್ಸಾದಿದ ಪಿಲಿಗೂಡ್ ಪನ್ಪಿನಲ್ಪ ಅಂಗಾರೆ ಕಾಂಡೆ ಕ್ರೇನ್ ಎಡ್ತ್ದ್ ನಡತೊಂದು ಪೋವೊಂದಿತ್ತಿನಾರ್ ದಾರುಣವಾದ್ ತೀರ್ದೆರ್.
ಕಾಂಡೆ ಒರಿ ಪಿಲಿಗೂಡ್ ಕೈತಲ್ದ ಪೆರ್ಸಾದಿದ ಬರಿಟ್ ನಡತೊಂದು ಪೋವೊಂದುಪ್ಪುನಗ, ಬೀಸ ಬತ್ತಿನ ಕ್ರೇನ್ ಅಂಕೆ ತತ್ತ್ದ್ ಆರೆಗ್ ಜೋರುಡು ಎಡ್ತ್ದ್ಂಡ್. ಎಡ್ತೆದ ಬರಸ್ಗ್ ನಡತೊಂದು ಪೋವೊಂದಿತ್ತಿನಾರ್ ಅಲ್ಪನೇ ತೀರ್ದೆರ್. ತೀರ್ದಿನಾರೆನ್ ಗುರ್ತ ಪತ್ತುನ ಬೇಲೆ ನಡತೊಂದುಂಡು ಪನ್ದ್ ತೆರಿದ್ ಬೈದ್ಂಡ್.
ನಡಕೆ ನಡತಿನೇ ಬೋಲ್ತೇರ್ ಸಂಚಾರಿ ಪೊಲೀಸೆರ್ ಜಾಗೆಗ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್. ಎಡ್ತಿನ ಕ್ರೇನ್ನ್ ಪೊಲೀಸೆರ್ ಉಲಕೈ ಮಲ್ತಿತ್ತ್ದ್, ಡ್ರೈವರ್ನ ಮಿತ್ತ್ ಗೋಸ್ಮರಿದ ಡ್ರೈವಿಂಗ್ ಪ್ರಕರಣ ದಾಕಲ್ಪುನ ಪ್ರಕ್ರಿಯೆ ನಡತೊಂದುಂಡು. ಪುನೊನು ಮರಣೋತ್ತರ ಪರೀಕ್ಷೆಗ್ ಕೈತಲ್ದ ಆಸ್ಪತ್ರೆಗ್ ಕಡಪುಡ್ತೆರ್.
ಗುರುವಾಯನಕೆರೆ – ಉಬಾರ್ ಪೆರ್ಸಾದಿಡ್ ಬೀಸ ಪೋಪಿನ ಗಾಡಿಲು ನಡತೊಂದು ಪೋಪುನಕಲೆನ ಜೂವೊಗು ಬರೊಂದುಂಡು ಪನ್ದ್ ನೆಟೆದಕುಲು ಆಕ್ರೋಶ ತೂಪಾದೆರ್. ಪಿಲಿಗೂಡ್ ಪ್ರದೇಶೊಡು ಬೋಡಾಪಿನ ಸುರಕ್ಷತಾ ಕ್ರಮೊಕುಲೆನ್ ಗೆತೊನೊಡು ಅಂಚೆನೇ ಸ್ಪೀಡ್ ಬ್ರೇಕರ್ ಪಾಡೊಡು ಪನ್ದ್ ಸಾರ್ವಜನಿಕೆರ್ ಒತ್ತಾಯ ಮಲ್ತ್ದೆರ್.