Last updated on April 7th, 2026 at 09:03 am
ಬೆಂಗಳೂರ್, ಏ. 7: ಸೆಕೆಂಡ್ ಪಿಯುಸಿ ಪರೀಕ್ಷೆದ ಫಲಿತಾಂಶ (2nd Puc Result) ಇನಿ (ಏಪ್ರಿಲ್ 7) ಪ್ರಕಟ ಆಪುಂಡು ಪನ್ದ್ ಕೊಡಿ ಕಾರ್ಡ್ ಕಾತೊಂದಿತ್ತಿನ ವಿದ್ಯಾರ್ಥಿಲೆಗ್ ಬೊಕ್ಕ ಅಪ್ಪೆಅಮ್ಮಗ್ ನಿರಾಸೆ ಆತ್ಂಡ್. ಕರ್ನಾಟಕ ಶಾಲಾ ಪರೀಕ್ಷೆ ಬೊಕ್ಕ ಮೌಲ್ಯನಿರ್ಣಯ ಮಂಡಳಿ (KSEAB) ಫಲಿತಾಂಶ ಪ್ರಕಟ ಮಲ್ಪೆರೆ ಮಾತಾ ಅಟ್ಟನೆ ಮಲ್ತಿತ್ತ್ಂಡಲಾ, ತಾಂತ್ರಿಕ ನೆವನೊಲೆರ್ದಾವರ ಪ್ರಕಟಣೆನ್ ದುಂಬು ಪಾಡ್ದೆರ್. ಆಂಡ, ಫಲಿತಾಂಶ ಪ್ರಕಟ ಮಲ್ಪುನ ದುಂಬು ಪೋಯೆರ ನೆವನ ದಾದ ಪನ್ದ್ ಇತ್ತೆ ತೆರಿದ್ ಬೈದ್ಂಡ್.
ಚುನಾವಣಾ ನೀತಿ ಸಂಹಿತೆದ ತಲೆಪು
ರಾಜ್ಯೊಡು ದಾವಣಗೆರೆ ದಕ್ಷಿಣ ಬೊಕ್ಕ ಬಾಗಲಕೋಟೆ ವಿಧಾನಸಭಾ ಕ್ಷೇತ್ರೊಲೆನ ಉಪಚುನಾವಣೆ ನಡತೊಂದಿತ್ತ್ದ್, ಏಪ್ರಿಲ್ 9ಗ್ ಎಲೆಕ್ಷನ್ ನಡಪುಂಡು. ಅಂಚಾದ್ ರಾಜ್ಯೊದ ಕೆಲ ಭಾಗೊಲೆಡ್ ಚುನಾವಣಾ ನೀತಿ ಸಂಹಿತೆ ಜಾರಿಡ್ ಉಂಡು. ಸಾಮಾನ್ಯವಾದ್ ಫಲಿತಾಂಶೊನು ಶಿಕ್ಷಣ ಸಚಿವೆರೆ ಒತ್ತುಪಾಲ್ಡ್ ಸುದ್ದಿಗೋಷ್ಠಿ ಮಲ್ತ್ದ್ ಪ್ರಕಟ ಮಲ್ಪುವೆರ್. ಆಂಡ, ನೀತಿ ಸಂಹಿತೆ ಇಪ್ಪುನೆರ್ದಾವರ ಸಚಿವೆರ್ ಅಧಿಕೃತವಾದ್ ಫಲಿತಾಂಶ ಪ್ರಕಟ ಮಲ್ಪೆರ ಚುನಾವಣಾ ಆಯೋಗರ್ದ್ ಅನುಗೆತೊನೊಡಾಪುಂಡು.
ಚುನಾವಣಾ ಆಯೋಗದ ಅನು ಕಾತೊಂದುಪ್ಪುನ ಮಂಡಳಿ
ಫಲಿತಾಂಶ ಪ್ರಕಟ ಮಲ್ಪೆರೆ ಅನುಕೇನ್ದ್ ಕೆಎಸ್ಇಎಬಿ ಚುನಾವಣಾ ಆಯೋಗಗ್ ಓಲೆ ಬರೆತ್ಂಡ್. ಆಯೋಗ ಅನು ಕೊರಿ ಬೆರಿಕೇ ಫಲಿತಾಂಶೊದ ದಿನೊನು ಅಧಿಕೃತವಾದ್ ಘೋಷಣೆ ಮಲ್ಪೆರೆ ಮಂಡಳಿ ಮಾತಾ ಅಟ್ಟನೆ ಮಲ್ತೊಂದುಂಡು. 2018 ಬೊಕ್ಕ 2023ತ ವಿಧಾನಸಭಾ ಚುನಾವಣೆ ಪೊರ್ತುಡ್ಲಾ ನೀತಿ ಸಂಹಿತೆ ಜಾರಿಡ್ ಇತ್ತ್ಂಡಲಾ, ಅಧಿಕಾರಿಲೆನ ಮುಕೇನ ಫಲಿತಾಂಶ ಪ್ರಕಟ ಮಲ್ತಿತ್ತೆರ್. ಆಂಡ ಈ ಸರ್ತಿ ಆಯೋಗದ ಒಪ್ಪಿಗೆ ತಿಕ್ಕಂದಿನೆರ್ದಾವರ ಅನಿವಾರ್ಯವಾದ್ ಕಡೆಸ್ಸ್ದ್ಂಡ್.
ಫೆಬ್ರವರಿ 28ರ್ದ್ ಮಾರ್ಚ್ 17ಮುಟ್ಟ ನಡತಿತ್ತಿನ ಪರೀಕ್ಷೆಗ್ ರಾಜ್ಯೊಡೊರ್ಮೆ ಒಟ್ಟು 7,10,363 ವಿದ್ಯಾರ್ಥಿಲು ರೆಜಿಸ್ಟರ್ ಆದಿತ್ತೆರ್. ಇಲಾಖೆ ಎನ್ನಿಲೆಕ ಮೌಲ್ಯಮಾಪನೊನು ಯಶಸ್ವಿಯಾದ್ ಮುಗಿತ್ದ್ಂಡ್. ಆಯೋಗದ ಒಪ್ಪಿಗೆ ತಿಕ್ಕಿನೇ ಫಲಿತಾಂಶ ಪ್ರಕಟ ಮಲ್ಪುಂಡು.