Last updated on April 25th, 2026 at 04:27 am
ಬೆಂಗಳೂರ್, ಏ. 24 : ಪೇಂಟೆದ ಮಡಿವಾಳಡ್ ಇಪ್ಪುನ ಪ್ರೈವೇಟ್ ಕಾಲೇಜ್ಡ್ ಸಿಇಟಿ ಪರೀಕ್ಷೆದ ಪೊರ್ತುಡು ವಿದ್ಯಾರ್ಥಿಲೆನ ಜನಿವಾರ ದೆಪ್ಪಾದ್ ಧಾರ್ಮಿಕ ಭಾವನೆಗ್ ತೆಟ್ಟ್ ಮಲ್ತಿನ ಆರೋಪದ ಮಿತ್ತ್ ಮಡಿವಾಳ ಪೊಲೀಸೆರ್ ಮೂವೆರ್ ಸಿಬ್ಬಂದಿಲೆನ್ ಉಲಕೈ ಮಲ್ತೊಂದೆರ್ ಪನ್ದ್ ತೆರಿದ್ ಬೈದ್ಂಡ್. ನಡಕೆನ್ ಗಾತಿಡ್ ಗೆತೊನ್ದಿನ ಕಾಲೇಜ್ ಆಡಳಿತ ಮಂಡಳಿ ಕರ್ತವ್ಯ ಲೋಪ ಮಲ್ದಿನ ಪರೀಕ್ಷಾ ಮೇಲ್ವಿಚಾರಕೆರೆನ್ ಬೇಲೆರ್ದ್ ಸಸ್ಪೆಂಡ್ ಮಲ್ದ್ಂಡ್.
ಮಡಿವಾಳದ ಕೃಪನಿಧಿ ಕಾಲೇಜ್ಡ್ ಈ ನಡಕೆ ನಡತ್ದ್ಂಡ್. ಗುರುವಾರ ಸಿಇಟಿ ಪರೀಕ್ಷೆ ಬರೆಯೆರೆ ಬತ್ತಿತ್ತಿನ ವಿದ್ಯಾರ್ಥಿಲೆನ್ ಉಂತಾಯಿನ ಪರೀಕ್ಷಾ ಸಿಬ್ಬಂದಿ, ಜನಿವಾರ ಪಾಡೊಂದು ಪರೀಕ್ಷೆದ ಅದೆತ ಉಲಯಿ ಪೋವರೆ ಇಜ್ಜಿ ಪನ್ದ್ ರನ್ದ್ದೆರ್. “ಜನಿವಾರ ದೆತ್ತ್ದ್ ಪರೀಕ್ಷೆ ಬರೆಲೆ, ಇಜಿಂಡ ಇಲ್ಲಗ್ ಪೋಲೆ” ಪನ್ದ್ ಪೋಡಿಕಟ್ಟಾಯಿನೆರ್ದಾವರ, ಪರೀಕ್ಷೆದ ಮಂಡೆಬೆಚ್ಚಡ್ ಇತ್ತಿನ ವಿದ್ಯಾರ್ಥಿಲು ಅನಿವಾರ್ಯವಾದ್ ಅಕ್ಲೆನ ಜನಿವಾರ ದೆತ್ತ್ ದೀದ್ ಪರೀಕ್ಷೆ ಬರೆತೆರ್ಗೆ.
ಈ ಬಗೆಟ್ ಒರಿ ವಿದ್ಯಾರ್ಥಿನ ಅಪ್ಪೆಅಮ್ಮೆ ಬರೆಪಾದಿನ ಒಯಿಲ್ದ ಮಿತ್ತ್ ಕಾರ್ಯಾಚರಣೆ ಮಲ್ತಿನ ಮಡಿವಾಳ ಪೊಲೀಸೆರ್, ಪರೀಕ್ಷಾ ಮೇಲ್ವಿಚಾರಕೆರಾಯಿನ ಸರಿತಾ, ಗಿರಿಜಮ್ಮ ಬೊಕ್ಕ ಪರೀಕ್ಷಾ ಕೇಂದ್ರೊದ ಉಸ್ತುವಾರಿ ಸುಧಾಕರ್ ಪನ್ಪಿನಕಲೆನ್ ಉಲಕೈ ಮಲ್ತೊಂದೆರ್. ಆರೋಪಿಲೆನ ಮಿತ್ತ್ ಬಿಎನ್ಎಸ್ (BNS) ಸೆಕ್ಷನ್ 299 ಬೊಕ್ಕ 302 ದ ಅಡಿಟ್ ಪ್ರಕರಣ ದಾಕಲ್ತೊಂದೆರ್. ಈ ಬಗೆಟ್ ತೆರಿಯೊಂದಿತ್ತಿಲೆಕನೆ ಪಿಸ್ರಾಯಿನ ಬೇತೆ ಬೇತೆ ಸಂಘಟನೆಲೆನ ಕಾರ್ಯಕರ್ತೆರ್ ಕಾಲೇಜ್ದ ಎದುರು ಪೊರ್ಮ್ಬಾಟ ಮಲ್ತ್ದ್, ತಪ್ಪು ಮಲ್ತಿನಕಲೆನ ಮಿತ್ತ್ ಕಠಿಣ ಕ್ರಮೊಕು ಆಗ್ರಹ ಮಲ್ತೆರ್.
ಈ ಬಗೆಟ್ ಪಾತೆರ್ನ ಉನ್ನತ ಶಿಕ್ಷಣ ಸಚಿವೆ ಡಾ. ಎಂ.ಸಿ. ಸುಧಾಕರ್, ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ (KEA) ಜನಿವಾರ ದೆಪ್ಪಾಯೆರೆ ಒವ್ವೇ ಮಾರ್ಗಸೂಚಿ ಕೊರ್ತುಜಿ ಪನ್ದ್ ಸ್ಪಷ್ಟ ಮಲ್ತ್ದೆರ್. ವೈಯಕ್ತಿಕ ನಿರ್ಧಾರೊಡು ಇಂಚಿನ ಕೃತ್ಯ ಮಲ್ದಿನ ಸಿಬ್ಬಂದಿಲೆನ ಮಿತ್ತ್ ಕಾನೂನು ಕ್ರಮ ಗೆತೊನುವ ಪನ್ದ್ ಆರ್ ಪನ್ಡೆರ್.