Last updated on May 16th, 2026 at 03:10 pm
ಉಬಾರ್, ಮೇ. 16: ಕರ್ನಾಟಕ ರಾಜ್ಯ ರಿಸರ್ವ್ ಪೊಲೀಸ್ ಪಡೆತ ಹೆಡ್ ಕಾನ್ಸ್ಟೇಬಲ್ನ ಇಲ್ಲಗೇ ಪೊಗ್ಗಿನ ಕಲ್ವೆರ್ ಸುಮಾರ 15.80 ಲಕ್ಷ ರೂ. ಮೌಲ್ಯೊದ ವಜ್ರ, ಬಂಗಾರ್ ಬೊಕ್ಕ ಕಾಸ್ ಲಕ್ಕಾದಿನ ನಡಕೆ ಮೇ 15ತಾನಿ ಕಾಂಡೆ ಬೋಲ್ತೇರ್ ತಾಲೂಕ್ದ ಪದ್ಮುಂಜದ ಗಾಡಕೋಡಿ ಪನ್ಪಿನಲ್ಪ ಬೊಲ್ಪುಗು ಬೈದ್ಂಡ್.
ಹಾಸನ ಜಿಲ್ಲೆದ ರಾಜ್ಯ ರಿಸರ್ವ್ ಪೊಲೀಸ್ ಪಡೆಟ್ ಗುಪ್ತವಾರ್ತೆ ಸಂಗ್ರಹೊದ ಬೇಲೆ ಮಲ್ತೊಂದಿತ್ತಿನ ಕರುಣಾಕರ ಗೌಡ ಪದ್ಮುಂಜ ಪನ್ಪಿನಾರೆನ ಇಲ್ಲಡ್ ಈ ನಡಕೆ ನಡತ್ದ್ಂಡ್. ಕರುಣಾಕರ ಗೌಡೆರ್ ಗ್ರಾಮೊದ ತನ್ನ ಮೂಲ ಇಲ್ಲಡ್ ಒರಿಯೇ ಇತ್ತ್ದ್, ಬೊಡೆದಿ ಬೇಲೆದ ಮಿತ್ತ್ ಬೇತೆ ಊರ್ಡ್ ಇಪ್ಪುನೆರ್ದಾವರ ಜೋಕುಲುಲಾ ಆರೆನೊಟ್ಟುಗು ಉಲ್ಲೆರ್.
ಇಲ್ಲಡ್ ಬೊಡೆದಿ ತನ್ನ ಅದೆಟ್ ಪದ್ದೈ ಬಂಗಾರ್ನ್ ಕಪಾಟ್ಡ್ ದೀದ್ ಅವೆಗ್ ಬೀಗ ಪಾಡ್ದ್ ಅವೆತ ತರ್ಕೋಲು ಪತೊಂದು ಪೋದಿತ್ತೆರ್. ಗುರುವಾರ ರಾತ್ರೆ ಇಲ್ಲಡ್ ಒರಿಯೇ ಇತ್ತಿನ ಕರುಣಾಕರೆರ್ ಐಪಿಎಲ್ ಗೊಬ್ಬು ತೂದು ಜೆತ್ತಿನಾರ್ ಕಾಂಡೆ ಲಕ್ಕ್ದ್ ತೂನಗ ಬೊಡೆದಿನ ಅದೆತ ಬೀಗ ಪೊಲ್ತ್ದಿನ ತೋಜಿದ್ ಬೈದ್ಂಡ್.
ಪರಿಶೀಲನೆ ಮಲ್ಪುನಗ ಅದೆಟ್ ಇತ್ತಿನ ಕಪಾಟ್ದ ಬೀಗ ಪೊಲ್ತ್ದ್ ಕಪಾಟ್ದ ಉಲಯಿ ಇತ್ತಿನ 14 ಲಕ್ಷ ರೂ. ಮೌಲ್ಯೊದ ಪದ್ರಾಡರೆ ಪವನ್ ತೂಕೊದ ಪದ್ದೈ ಬಂಗಾರ್ ಬೊಕ್ಕ 80 ಸಾವಿರ ರೂ. ಮೌಲ್ಯೊದ ವಜ್ರೊದ ಆಭರಣ ಬೊಕ್ಕ 1 ಲಕ್ಷ ರೂ ಲಕ್ಕಾದಿನ ಬೊಲ್ಪುಗು ಬೈದ್ಂಡ್.
ಪೊಲೀಸ್ ಸಿಬ್ಬಂದಿ ಒರಿ ಇಲ್ಲಡ್ ಜೆತ್ತಿಪ್ಪುನ ಪೊರ್ತುಡೇ ಇಲ್ಲ್ ಪೊಗ್ಗುದ್ ಬೀಗ ಪೊಲ್ತ್ದ್ ಪದ್ದೈ ಬಂಗಾರ್ ಕಾಸ್ ಕಂಡ್ದಿನ ಬಾರೀ ಸೋದ್ಯ ಆತ್ಂಡ್.
ಜಾಗೆಗ್ ಶ್ವಾನ ದಳ, ಬಿರೆರಚ್ಚಿ ತಜ್ಞೆರ್ ಬತ್ತ್ದ್ ತಪಾಸಣೆ ಮಲ್ತ್ದೆರ್. ಜಾಗೆಗ್ ಬೋಲ್ತೇರ್ ಉಪ ವಿಭಾಗಾಧಿಕಾರಿ ರೋಹಿಣಿ, ಠಾಣಾಧಿಕಾರಿ ಕೌಶಿಕ್ ಬಿ.ಸಿ., ಬೋಲ್ತೇರ್ ಎಸ್ಐ ರವಿ ಬಿ.ಎಸ್. ಮೊಕುಲು ಬತ್ತ್ದ್ ಜಡ್ತೆ ಮಲ್ತೊಂದುಲ್ಲೆರ್.