Last updated on June 9th, 2026 at 04:09 pm
ಕುಡ್ಲ, ಜೂ. 09: ತುಳುನಾಡ್ದ ಪ್ರಬಲ ಬೊಕ್ಕ ಗೌರವಾನ್ವಿತ ಸಮುದಾಯೊಲಾಯಿನ ಬಿಲ್ಲವ ಬೊಕ್ಕ ಬಂಟ (ಶೆಟ್ಟಿ) ಜಾತಿಲೆನೇ ಈಡ್ ಮಲ್ತ್ದ್ ಸಾಮಾಜಿಕ ಬಲೆತ್ತಾನೊಡು ಬಜೀ ಚಲ್ಲ್ ಮಟ್ಟ್ದ ಬೊಕ್ಕ ಪ್ರಚೋದನಕಾರಿ ಪಾತೆರ ಪನ್ತಿನ ಆರೋಪದ ಮಿತ್ತ್ ಅನಿತಾ ಕಾಸರಗೋಡು ಪನ್ಪಿನಾಲೆನ ಮಿತ್ತ್ ಕುಡ್ಲದ ಬರ್ಕೆ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.
ಪ್ರಕರಣೊದ ಬಗೆಟ್:
ಆರೋಪಿ ಅನಿತಾ ಕಾಸರಗೋಡು ಪನ್ಪಿನಾಲ್ ತನ್ನ ಫೇಸ್ಬುಕ್ಡ್ ವೀಡಿಯೊ ಒಂಜೆನ್ ಅಪ್ಲೋಡ್ ಮಲ್ತಿತ್ತ್ದ್, ಅವೆಟ್ “ಶೆಟ್ಟಿ ಬೊಕ್ಕ ಬಿಲ್ಲವ ಜಾತಿದಕ್ಲೆನಾತ್ ಹಲ್ಕಟ್ ಬೇತೆ ಏರ್ಲಾ ಇಜ್ಜೆರ್. ಅಕಲೆರ್ದ್ ಬ್ಯಾರಿಲೇ ಆವು, ದಾಲ ಆಂಡ ಬತ್ತ್ದ್ ಸಕಾಯ ಮಲ್ಪುವೆರ್” ಪನ್ದ್ ಬಹಿರಂಗವಾದೇ ನೆರ್ದಿತ್ತಲ್. ಈ ವೀಡಿಯೊ ಸಾಮಾಜಿಕ ಬಲೆತ್ತಾನೊಡು ಬಾರೀ ವೈರಲ್ ಆದಿತ್ತ್ದ್, ಸಾರ್ವಜನಿಕ ವಲಯೊಡು ಬಾರೀ ಆಕ್ರೋಶ ತೋಜಿದ್ ಬೈದ್ಂಡ್.
ಬರ್ಕೆ ಸ್ಟೇಶನ್ಡ್ ಒಯಿಲ್:
ಸಾಮಾಜಿಕ ಸಂಘಟನೆ ‘ಬಿರುವೆರ್ ಕುಡ್ಲ’ದ ಪದುಕೆರಾಯಿನ ರಾಕೇಶ್ ಪನ್ಪಿನಾರ್ ಈ ಬಗೆಟ್ ಅಧಿಕೃತ ಒಯಿಲ್ ಬರೆಪಾದೆರ್. ಈ ವೀಡಿಯೊ ಮಲ್ತ್ದ್ ರಡ್ಡ್ ಸಮುದಾಯೊಲೆನ ನಡುಟು ಪಗೆ ಬಿತ್ತೆರೆ ತೂವೊಂದುಲ್ಲೆರ್ ಅಂಚೆನೇ ಶಾಂತಿ ಕಲಡಾಯೆರ ತೂವೊಂದುಲ್ಲೆರ್ ಪನ್ದ್ ಒಯಿಲ್ಡ್ ಬರೆತೆರ್. ಒಯಿಲ್ನ್ ಗಾತಿಡ್ ಗೆತೊಂದಿನ ಪೊಲೀಸೆರ್, ಭಾರತೀಯ ನ್ಯಾಯ ಸಂಹಿತೆ (BNS) ಕಲಂ 196, 353(2) ಬೊಕ್ಕ 352 ತ ಅಡಿಟ್ ಪ್ರಕರಣ ದಾಕಲ್ತೊಂದೆರ್.
ಕೈದ್ ಮಲ್ಪೆರ ಬಿರುವೆರ್ ಕುಡ್ಲ ಒತ್ತಾಯ:
ಈ ಬಗೆಟ್ ಪ್ರತಿಕ್ರಿಯೆ ಕೊರ್ತಿನ ಬಿರುವೆರ್ ಕುಡ್ಲ ಸಂಘಟನೆದ ಸಂಸ್ಥಾಪಕ ಅಧ್ಯಕ್ಷೆರಾಯಿನ ಉದಯ ಪೂಜಾರಿ, “ಆರೋಪಿ ಪೊಂಜೊವುನ ಬೇಜವಾಬ್ದಾರಿದ ಪಾತೆರೊರ್ದಾವರ ಲಕ್ಷಗಟ್ಲೆ ಬಿಲ್ಲವ ಬೊಕ್ಕ ಬಂಟ ಸಮುದಾಯೊದ ಜನೊಕ್ಲೆನ ಭಾವನೆಲೆಗ್ ತೆಟ್ಟಾತ್ಂಡ್. ತುಳುನಾಡ್ದ ಶಾಂತಿ ಬೊಕ್ಕ ಸೌಹಾರ್ದತೆಗ್ ತೆಟ್ಟ್ ಬಯಕುನ ಇಂಚಿನಕಲೆನ್ ಪೊಲೀಸೆರ್ ಇತ್ತೆನೇ ಕೈದ್ ಮಲ್ತ್ದ್ ಕಠಿಣ ಕಾನೂನು ಕ್ರಮ ಗೆತೊನೊಡು,” ಪನ್ದ್ ಒತ್ತಾಯ ಮಲ್ತ್ದೆರ್.