Last updated on June 10th, 2026 at 09:05 am
ಕುಡ್ಲ, ಜೂ. 10: ತೆನ್ಕಾಯಿ ಕುಡ್ಲ ಪೊಲೀಸ್ ಸ್ಟೇಶನ್ ಸೀಮೆಡ್ ನಿಷೇಧಿತ ಮಾದಕ ವಸ್ತು ಎಂಡಿಎಂಎ (MDMA) ಮಾರ್ಯೆರ ತೂವೊಂದಿತ್ತಿನ ಇರ್ವೆರ್ ಆರೋಪಿಲೆನ್ ಪೊಲೀಸೆರ್ ಪತ್ತ್ದೆರ್.
ಕೈದಾತಿನ ಆರೋಪಿಲೆನ್ ಜನನ್ ಜಗನ್ನಾಥ್ (29) ಬೊಕ್ಕ ಪರೀಕ್ಷಿತ್ (33) ಪನ್ದ್ ಗುರ್ತ ಪತ್ತ್ದೆರ್. ಗೂಡ್ ಶೆಡ್ಡೆ ಪ್ರದೇಶೊಡು ಸಾರ್ವಜನಿಕೆರೆಗ್ ಎಂಡಿಎಂಎ ಮಾರೊಂದುಲ್ಲೆರ್ ಪನ್ಪಿ ಪತ್ತ ಒಲವು ಇತ್ತ್ದ್ ತೆನ್ಕಾಯಿ ಕುಡ್ಲ ಪೊಲೀಸ್ ಸ್ಟೇಶನ್ ಅಧಿಕಾರಿಲು ಬೊಕ್ಕ ಸಿಬ್ಬಂದಿ ದಾಳಿ ಮಲ್ತ್ದೆರ್.
ಕಾರ್ಯಾಚರಣೆಡ್ ಆರೋಪಿಲೆ ಕೈರ್ದ್ 11.68 ಗ್ರಾಂ ಎಂಡಿಎಂಎ, ₹1,110 ಕಾಸ್, ಮೂಜಿ ಮೊಬೈಲ್ ಫೋನ್ಲು ಬೊಕ್ಕ ಒಂಜಿ ವೇಯಿಂಗ್ ಸ್ಕೇಲ್ನ್ ಉಲಕೈ ಮಲ್ತೊಂದೆರ್. ಈ ಬಗೆಟ್ ತೆನ್ಕಾಯಿ ಕುಡ್ಲ ಪೊಲೀಸ್ ಸ್ಟೇಶನ್ಡ್ ಎನ್ಡಿಪಿಎಸ್ ಕಾಯ್ದೆದ ಅಡಿಟ್ ಪ್ರಕರಣ ದಾಕಲಾದಿತ್ತ್ದ್, ಆರೋಪಿಲೆನ್ ನ್ಯಾಯಂತಡೆದ ಎದುರು ಲೆತೊಂದು ಪೋದಿತ್ತ್ದ್ ಎಚ್ಚಿಗೆ ಜಡ್ತೆಗ್ ಪೊಲೀಸ್ ಕಸ್ಟಡಿಗ್ ಗೆತೊಂದೆರ್.
ಕುಡೊಂಜಿ ಪ್ರಕರಣೊಡು ಒರಿ ಆರೋಪಿ ಕೈದ್
ಉಂದೇ ಪೊರ್ತುಡು, ತೆನ್ಕಾಯಿ ಕುಡ್ಲ ಪೊಲೀಸ್ ಸ್ಟೇಶನ್ಡ್ ದುಂಬೇ ದಾಕಲಾದಿತ್ತಿನ ಕುಡೊಂಜಿ ಎನ್ಡಿಪಿಎಸ್ ಪ್ರಕರಣೊಗು ಸಂಬಂಧಿತ್ದ್ ದೆಂಗ್ತಪ್ಪಾದಿತ್ತಿನ ಸುಶಾನ್ ಪೂಜಾರಿ (27) ಪನ್ಪಿ ಆರೋಪಿನ್ ಪೊಲೀಸೆರ್ ಕೈದ್ ಮಲ್ತ್ದೆರ್. ಈ ಪ್ರಕರಣೊಡು ಒರಿ ಆರೋಪಿನ್ ದುಂಬೇ ಪತ್ತ್ದ್ ನ್ಯಾಯಾಂಗ ಕೈದ್ಗ್ ಕೊರ್ದಿತ್ತೆರ್. ದುಂಬರಿನ ಜಡ್ತೆದ ಪೊರ್ತುಡು ಪ್ರಕರಣೊಡು ಪಾಲ್ಪಡೆದಿತ್ತಿನ ಸುಶಾನ್ ಪೂಜಾರಿನ್ ಜೂನ್ 9 ದಾನಿ ನಾಡ್ಪತ್ತ್ದ್ ಉಲಕೈ ಮಲ್ತೊಂದೆರ್.