Last updated on June 4th, 2026 at 02:34 pm
ಗಾಜಿಯಾಬಾದ್, ಜೂನ್ 04: ಉತ್ತರ ಪ್ರದೇಶೊದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಸರ್ಕಾರೊದ ‘ಜಿರೋ ಟಾಲರೆನ್ಸ್’ ನೀತಿ ಬೊಕ್ಕ ಕಠಿಣ ಪೊಲೀಸ್ ಕ್ರಮೊಕುಲೆನ ಪೋಡಿಗೆ ಅಪರಾಧ ಲೋಕೊನು ವಾ ನಮುನೆ ನರ್ಗಾದ್ಂಡ್ ಪನ್ಪಿನೆಕ್ ಗಾಜಿಯಾಬಾದ್ಡ್ ನಡತಿನ ಈ ನಾಟಕೀಯ ನಡಕೆನೇ ಸಾಕ್ಷಿ. ಇಂಚಿಪ ಜಿಲ್ಲೆದ ಸುಮಾರ್ 150 ರ್ದ್ಲಾ ಎಚ್ಚ ಜನ ರೌಡಿಶೀಟರ್ನಕುಲು “ಯೋಗಿ ಜೀ ಎಂಕ್ಲೆನ್ ಮಾಪು ಮಲ್ಪುಲೆ” ಪನ್ಪಿ ಪೋಸ್ಟರ್ಲೆನ್ ಪತೊಂದು ಬಹಿರಂಗವಾದೇ ಪೊಲೀಸೆರೆ ಎದುರು ಸರೆಂಡರ್ ಆತೆರ್.
ಗಾಜಿಯಾಬಾದ್ಡ್ ಇಂಚಿಪ ಒರಿ ಜವನನ್ ಏರಾ ಕೆರ್ದಿತ್ತೆರ್. ಈ ಪ್ರಕರಣೊನು ಗಾತಿಡ್ ಗೆತೊಂಡಿನ ಪೊಲೀಸೆರ್, ಅಪರಾಧಿಲೆನ್ ಅಂಕೆಗ್ ಕನಯೆರ ‘ಆಪರೇಷನ್ ಕ್ಲೀನ್ ಸ್ವೀಪ್’ (Operation Clean Sweep) ಪನ್ಪಿ ವಿಶೇಷ ಪರಿಶೀಲನಾ ಅಭಿಯಾನೊನು ಮಲ್ತ್ದೆರ್. ಟ್ರಾನ್ಸ್-ಹಿಂದನ್ ವಲಯೊದ ಡೆಪ್ಯುಟಿ ಕಮಿಷನರ್ ಆಫ್ ಪೊಲೀಸ್ (DCP) ಧವಲ್ ಜೈಸ್ವಾಲ್ ಮುತಾಲಿಕೆಡ್ ಜಿಲ್ಲೆದ ಪರತ್ ಅಪರಾಧಿಲೆನ್ ನಾಡುನ ಬೇಲೆ ನಡತ್ಂಡ್.
ಪೊಲೀಸೆರೆ ಅಭಿಯಾನೊದ ಭಾಗವಾದ್ ಪೊಲೀಸೆರ್ ಇಂಚಿಪ ಸುಮಾರ್ 150 ರೌಡಿಶೀಟರ್ನಕಲೆನ್ ಸಾಮಾನ್ಯ ವಿಚಾರಣೆಗ್ ಅಲ್ಪಲ್ಪದ ಪೊಲೀಸ್ ಸ್ಟೇಶನ್ಲೆಗ್ ಲೆಪುಡಾದಿತ್ತೆರ್. ಆಂಡ ಯೋಗಿ ಸರ್ಕಾರೊದ ಬುಲ್ಡೋಜರ್ ಬೊಕ್ಕ ಎನ್ಕೌಂಟರ್ ಕ್ರಮೊಕ್ಲೆನ ಪೋಡಿಗೆಡ್ ಇತ್ತಿನ ಅಪರಾಧಿಲು, ಅಕುಲಾದೇ ಸ್ವಯಂಪ್ರೇರಿತೆರಾದ್ ಕೈಟ್ ಬರೆತಿನ ಪೋಸ್ಟರ್ಲೆನ್ ಪತೊಂದು ಸ್ಟೇಶನ್ಗ್ ಬತ್ತಿತ್ತೆರ್.
ಅಕುಲು ಕನತಿತ್ತಿನ ಪೋಸ್ಟರ್ಲೆಡ್ ಹಿಂದಿಡ್, “ಯೋಗಿ ಜೀ, ಮುಝೆ ಮಾಫ್ ಕರ್ ದೋ. ಮೈ ಭವಿಷ್ಯ್ ಮೇ ಕೋಯಿ ಅಪ್ರಾದ್ ನ ಕರ್ನೆ ಕೀ ಶಪಥ್ ಲೇತಾ ಹೂ” (ಯೋಗಿ ಜೀ, ಎನನ್ ಮಾಪು ಮಲ್ಪುಲೆ. ಯಾನ್ ನನ ದುಂಬಗ್ ಒವ್ವೇ ಅಪರಾಧ ಮಲ್ಪುಜಿ ಪನ್ದ್ ಆಜ ಪಾಡುವೆ) ಪನ್ದ್ ಬರೆದಿತ್ತ್ಂಡ್. ಜಕ್ಕ್ಡ್ ಜವನೆರೆರ್ದ್ ಪತ್ತ್ದ್ ಪ್ರಾಯೊದಕ್ಲಡೆ ಮುಟ್ಟ ಇತ್ತಿನ ಈ ರೌಡಿಶೀಟರ್ನಕುಲು ಮಾತೆರ್ಲಾ ಕ್ಯಾಮೆರಾದ ಎದುರು ದಾರೆ ಉಂತುದು, ಕೈ ಏರಾದ್ “ನನ ದುಂಬಗ್ ಒವ್ವೇ ಕಾನೂನುಬಾಹಿರ ಬೇಲೆ ಮಲ್ಪುಜ” ಪನ್ದ್ ಆಜ ಪಾಡಿಯೆರ್.
ಮಾಪು ನಟ್ಟಿನೇ ಅಪರಾಧಿಲೆನ ಮಿತ್ತ್ ಇಪ್ಪುನ ಪರ ಪ್ರಕರಣೊಲು ರದ್ದಾಪುಜ. ಇತ್ತೆಗ್ ಈ ಮಾತಾ 150 ರೌಡಿಶೀಟರ್ಲೆನ ಒಲವು ಬೊಕ್ಕ ಇಂಚಿಪದ ಚಟುವಟಿಕೆಲೆನ್ ಎಂಕ್ಲೆನ ಡೇಟಾಬೇಸ್ಡ್ ಅಪ್ಲೋಡ್ ಮಲ್ತ್ದ. ದುಂಬಗ್ ಮೊಕುಲು ಈತ್ ಎಲ್ಯ ತಪ್ಪು ಮಲ್ತೆರ್ನ್ಡಲಾ ಬಾರೀ ಕಠಿಣ ಕಾನೂನು ಕ್ರಮ ಗೆತೊನುವ ಪನ್ದ್ ಧವಲ್ ಜೈಸ್ವಾಲ್ ಎಚ್ಚರ್ಗೆ ಕೊರ್ತೆರ್.