Last updated on July 29th, 2026 at 10:02 pm
ದೆಲ್ಲಿ, ಜುಲೈ 29: ರಾಷ್ಟ್ರೀಯ ಗೀತೆಯಾಯಿನ ‘ವಂದೇ ಮಾತರಂ’ಗ್ ಅವಮಾನ ಮಲ್ಪುನೆನ್ ಕ್ರಿಮಿನಲ್ ಅಪರಾಧ ಪನ್ದ್ ಪರಿಗಣನೆ ಮಲ್ಪುನ ಮಹತ್ವೊದ ವಿಧೇಯಕೊನು ರಾಜ್ಯಸಭೆ ಇನಿ ಅಂಗೀಕರಿತ್ದ್ಂಡ್. ರಾಷ್ಟ್ರಗೀತೆಯಾಯಿನ ಜನಗಣಮನ ಗೀತೆಗ್ ಕೊರ್ಪುನ ಮಾನಾದಿಗೆನ್ ವಂದೇ ಮಾತರಂ ಗೀತೆಗ್ಲಾ ಕೊರೊಡು ಪನ್ದ್ ಉಲ್ಲೇಖ ಮಲ್ತ್ದೆರ್. ‘ರಾಷ್ಟ್ರೀಯ ಗೌರವೊಗು ಅಪಮಾನ ತಡೆ (ತಿದ್ದುಪಡಿ) ವಿಧೇಯಕ – 2026’ (Prevention of Insults to National Honour (Amendment) Bill, 2026) ನ್ ಧ್ವನಿ ಮತೊದ ಮುಕೇನ ಪಾಸ್ ಮಲ್ತೆರ್.
ಇನಿ ಕಾಂಡೆ ರಡ್ಡ್ ಸರ್ತಿ ಕಲಾಪ ದುಂಬುಪೋಯಿಬೊಕ್ಕ , ಮಧ್ಯಾಹ್ನದ ವನಸ್ ಆದ್ ಸದನ ಸಮಾವೇಶ ಆವೊಂದಿತ್ತಿಲೆಕನೆ ಉಪಸಭಾಪತಿ ಹರಿವಂಶ್ ಮೇರ್ ಪ್ರತಿಭಟನೆ ಮಲ್ತೊಂದಿತ್ತಿನ ಪದುಕೆರೆಗ್ ಕಲಾಪೊದ ಘನತೆನ್ ಒರಿತೊನರೆ ಬಿನ್ನಪು ಮಲ್ತೆರ್.
ಪರಿಶೀಲನೆ ಬೊಕ್ಕ ಅಂಗೀಕಾರೊಗು ಪಟ್ಟಿಯಾದಿತ್ತಿನ ಈ ವಿಧೇಯಕೊದ ಮಿತ್ತ್ದ ಚರ್ಚೆನ್ ಪೀಠ ಸುರು ಮಲ್ತಿನೇ, ವಿರೋಧ ಪಕ್ಷೊಲು ಅಕ್ಲೆನ ಪೊರ್ಮ್ಬಾಟೊನು ದುಂಬರಿತೊಂದು ಘೋಷಣೆ ಲೆಪ್ಪೆರೆ ಪತ್ತಿಯೆರ್. ನೀಟ್ (NEET) ಪ್ರಶ್ನೆ ಪತ್ರಿಕೆ ಲೀಕ್ನ್ ಖಂಡನೆ ಮಲ್ತ್ದ್ ರಾಜಧಾನಿಡ್ ಪ್ರತಿಭಟನೆ ಮಲ್ತಿನಕಲೆನ ಮಿತ್ತ್ದ ಪೊಲೀಸ್ ಕ್ರಮೊಕು ಸಂಬಂಧಿತ್ದ್ ಕೇಂದ್ರ ಗೃಹ ಸಚಿವೆ ಅಮಿತ್ ಶಾ ಮೇರ್ ಪ್ರತಿಕ್ರಿಯೆ ಕೊರೊಡು ಪನ್ದ್ ಅಕುಲು ಒತ್ತಾಯ ಮಲ್ತೆರ್.
ವಿಪಕ್ಷೊಲೆನ ಪ್ರತಿಭಟನೆದ ನಡುಟುಲಾ ಉಪಸಭಾಪತಿ ಸದನೊದ ಕಲಾಪೊನು ದುಂಬರಿತೆರ್. ಚರ್ಚೆಡ್ ಪಾಲ್ಪಡೆಯೆರೆ ರಾಜ್ಯಸಭಾ ಪದುಕೆರೆಡ ಬಿನ್ನಪು ಮಲ್ತೊಂಡೆರ್. ಆಂಡಲಾ ವಿರೋಧ ಪಕ್ಷೊಲು ಅಕ್ಲೆನ ಕಾಯೆಸ್ನ್ ಬುಡ್ಜೆರ್. ಬೊಕ್ಕ ಕೇಂದ್ರ ಸಾಮಾಜಿಕ ನ್ಯಾಯ ಬೊಕ್ಕ ಸಬಲೀಕರಣ ರಾಜ್ಯ ಸಚಿವೆ ರಾಮದಾಸ್ ಅಥಾವಳೆ ಮೇರ್ ಪ್ರಸ್ತಾವಿತ ಮಸೂದೆದ ಬಗೆಟ್ ಪಾತೆರ್ನಗ ವಿಪಕ್ಷೊಲೆನ ಸಂಸದೆರ್ ಕಲಾಪರ್ದ್ ಪಿದಯಿ ಪೋಯೆರ್.
ವಿಧೇಯಕೊದ ಬಗೆಟ್ ಚರ್ಚೆಗ್ ಸದು ಕೊರ್ನ ಕೇಂದ್ರ ಗೃಹ ರಾಜ್ಯ ಸಚಿವೆ ನಿತ್ಯಾನಂದ ರೈ, ಕಾಂಗ್ರೆಸ್ ಪಕ್ಷ ತುಷ್ಟೀಕರಣ ರಾಜಕಾರಣೊದ ಸಾದಿಡ್ ಪೋದು ದೇಶೊದ ಗೌರವ ಆಯಿನ ‘ವಂದೇ ಮಾತರಂ’ ರಾಷ್ಟ್ರಗೀತೆಗ್ ಅವಮಾನ ಮಲ್ಪೆರೆ ತೂವೊಂದುಂಡು ಪನ್ದ್ ಪನ್ಡೆರ್. ದೇಶೊಕು ಬೋಡಾದ್ ಪೆರಣ ತ್ಯಾಗ ಮಲ್ಪುನಗ ಪಾಕ ಸ್ವಾತಂತ್ರ್ಯ ಪೊರ್ಮ್ಬಾಟಗಾರೆರ್ ಅಕಲೆನ ಅಕೇರಿದ ನುಡಿಯಾದ್ ‘ವಂದೇ ಮಾತರಂ’ ಪನ್ದ್ ಪನ್ತಿನ ಪಾಕ ಪೊರ್ತುಲೆನ್ ಆರ್ ನೆನೆತೊಂಡೆರ್.
ವಿಧೇಯಕೊದ ಪ್ರಮುಖ ಅಂಶೊಲು:
ಪ್ರಸ್ತಾವಿತ ಶಾಸನ ರಾಷ್ಟ್ರಧ್ವಜ, ಸಂವಿಧಾನ ಬೊಕ್ಕ ರಾಷ್ಟ್ರಗೀತೆ ಸೇರ್ದ್ ದೇಶೊದ ರಾಷ್ಟ್ರೀಯ ಸಂಕೇತೊಲೆಗ್ ಅಪಚಾರ ಅತ್ತ್ಂಡ ಅಸಮಾಧಾನ ತೋಜಾವುನೆನ್ ಕ್ರಿಮಿನಲ್ ಅಪರಾಧ ಮಲ್ಪೆರೆ ಪಿದಡ್ದಿತ್ತ್ದ್, 3 ವರ್ಸ ಮುಟ್ಟ ಕರ್ಪಿಲ್ಲ ಶಿಕ್ಷೆ ಕೊರ್ಪುನ ನಿಬಂಧನೆಲಾ ಉಂಡು. ಜುಲೈ 24ತಾನಿ ಸದನದೊಡು ಮಂಡನೆ ಆತಿನ ಈ ವಿಧೇಯಕ ರಾಷ್ಟ್ರಗೀತೆ ‘ಜನ ಗಣ ಮನ’ಗ್ ಇಪ್ಪುನಂಚಿನನೇ ಶಾಸನಬದ್ಧ ರಕ್ಷಣೆನ್ ‘ವಂದೇ ಮಾತರಂ’ಗ್ಲಾ ಕೊರ್ಪುಂಡು. ವಂದೇ ಮಾತರಂ ಬರೆದ್ 150 ವರ್ಸ ಆವೊಂದು ಬತ್ತಿನ ಪೊರ್ತುಡೇ ಸರ್ಕಾರ ಈ ಮಲ್ಲ ಪಜ್ಜೆ ದೀತ್ಂಡ್.