Last updated on July 28th, 2026 at 02:55 pm
“ಜಯ ಜಯ ಜಯ ತುಳುವ ಸೀಮೆದ ಅಪ್ಪೆ ನಾಡ್ಗ್” ಪನ್ಪಿ ಪದೊನು ಎಚ್ಚಿನಕುಲು ತುಳು ಲೇಸೊಲೆಡ್ ಮಾತ ಕೇನ್ದುಪ್ಪರ್. ತುಳುನಾಡ ಗೀತೆ ಪನ್ಪಿ ತರೆಬರವು ಕೊರ್ದು ಈ ಪದೊನು 125 ವರ್ಸೊಗು ದುಂಬು ಭಾರತೊದ ತನ್ನಾಲ್ಮೆಗ್ ಪೊರ್ಮ್ಬುದಿನಾರ್, ಸಾಮಾಜಿಕ ಚಿಂತಕೆ, ಕವಿ, ನಾಟಕಕಾರೆ ಶ್ರೀ ಮೋಹನಪ್ಪ ತಿಂಗಳಾಯೆರ್ 1899 ಡ್ ಬರೆತೆರ್. ಈ ಅಮರ ಗೀತೆ ಇತ್ತೆ 125 ವರ್ಸೊದ ಐತಿಹಾಸಿಕ ಪಯಣೊನು ಪೂರ್ಣ ಮಲ್ದ್ಂಡ್.
ಅಂಚಾದ್ ಆಟಿ 12 (ಜುಲೈ 28) ನ್ “ತುಳು ನಾಡಗೀತೆ ದಿನ” ಆದ್ ಒರ್ಮೆಲಾ ಆಚರಿತೊಂದುಲ್ಲ.
ತುಳು ನಾಡಗೀತೆ ಕಾಲಿ ಒಂಜಿ ಪದ ಅತ್ತ್; ಅವ್ವು ನಮ ತುಳಕವೆರೆನ ಅಸ್ತಿತ್ವ, ಆತ್ಮಗೌರವ, ಐಕ್ಯತೆ ಬೊಕ್ಕ ತುಳುನಾಡ್ದ ಮಿತ್ತ್ದ ಮೋಕೆದ ಘೋಷ ಆದುಂಡು.
ತುಳುನಾಡಗೀತೆ
ಜಯ ಜಯ ಜಯ ತುಳುವ ಸೀಮೆ ಅಪ್ಪೆನಾಡ್ಗ್
ಜಯತು ನಂಕ್ ಜನ್ಮ ಕೊರ್ತಿ ಪುಣ್ಯಭೂಮಿಗ್
ನೇತ್ರಾವತಿ ಕುಮಾರಧಾರ ಪುಲಲಿ ಫಾಲ್ಗುಣೀ
ಸೀತ ಸ್ವರ್ಣ ಸುದೆಳು ಚಂದ್ರಗಿರಿ ಪಯಸ್ವಿನೀ
ಪುದರ್ ಪೋಯಿ ಈ ಸುದೇಳು ಘಟ್ಟದ ಮುದೆಲ್ಡೇ
ಜತ್ತ್ದ್ ಬರ್ಪಿ ಪೊರ್ಲು ದಾನೆ ಬೈಲ ಸೀಮೆಡೇ
ಮುಡಯಿ ಘಟ್ಟ ಸೀಮೆ ಗಡಿಟ್ ಪುಲ್ಯ ಆಪಿನಾ
ಪಡ್ಡಯಿ ಕಡಲ ಗಡಿತ ಶೋಭೆ ಪೊರ್ತು ಕಂತುನಾ
ಮಧ್ವಚಾರ್ಯ ವಾದಿರಾಜ ವಿಷ್ಣುತೀರ್ಥೆರ್
ತತ್ವಜ್ಞಾನಿಲಾಯಿ ಭಕ್ತ ಸೂರಿ ವಿಜಯೆರ್
ಮಯೂರವರ್ಮೆ ಭೂತ ಪಾಂಡ್ಯೆ ದೇವು ಪಾಂಡಿಲೂ
ಜಯಾಸಿಂಹ ಕೃಷ್ಣರಾಯೆ ವೀರ ಅರಸುಲೂ
ಪೆರೂಮಾಳೆ ಹುಬ್ಬಶೀಕೆ ಆದಿ ಮುಖ್ಯೇರ್
ತುಲುವ ದೇವಿ ಮಟ್ಟೆಲ್ಡ್ ಪುಟುದು ಬುಳೆಯೆರ್
ಕನಡೆ ಕೊಂಕಣೆ ಮರಠಿ ಮಲ್ಯಲಿ ಬಾಲೆಳೇಗ್ಲಾ
ಉನುಪು ನೀರ್ ಕೊರುದು ಸಾಂಕು ಪುಣ್ಯ ಸಾಧ್ವಿಗ್
ಜಲಸಮೃದ್ಧಿ ಫರಸಮೃದ್ಧಿ ಪಚ್ಚೆಪೈರುಳೂ
ತುಳುವ ದೇವಿ ತುತ್ತು ಪೊದೆಪು ಆದ್ ಮೆರೆಪೊಳೂ