Last updated on August 1st, 2026 at 11:11 am
ಕುಡ್ಲ, ಆ. 01: 2018ದ ಸಾಮೂಹಿಕ ಅತ್ಯಾಚಾರ ಪ್ರಕರಣೊಡು ಕುಡ್ಲದ 2ನೇ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ (ವಿಶೇಷ) ನ್ಯಾಯಂತಡೆ ಮಹತ್ವೊದ ತೀರ್ಪು ಕೊರ್ದಿತ್ತ್‌ದ್, ನಾಲ್ವೆರ್ ಅಪರಾಧಿಲೆಗ್ 20 ವರ್ಸ ಕಠಿಣ ಕರ್ಪಿಲ್ಲ ಶಿಕ್ಷೆ ಬೊಕ್ಕ ಒಟ್ಟು 74,000 ರೂಪಾಯಿ ದಂಡ ಪಾಡ್ದ್ಂಡ್.
ಪ್ರಜ್ವಲ್ (33), ಅರುಣ್ ಅಮೀನ್ (34), ಆದಿತ್ಯ ಸಾಲ್ಯಾನ್ (28) ಬೊಕ್ಕ ಅಬ್ದುಲ್ ರಿಯಾಝ್ (40) ಶಿಕ್ಷೆ ಆತಿನ ಅಪರಾಧಿಲು.
ನವೆಂಬರ್ 18, 2018 ತಾನಿ ಒರ್ತಿ ಜವನ್ದಿ ಆಲೆನ ದೋಸ್ತಿನ ಒಟ್ಟುಗು ಬೀಚ್ ಗ್ ಪೋದುಪ್ಪುನಗ ಈ ದಾರುಣ ನಡಪು ನಡತಿತ್ತ್ಂಡ್. ಮೂವೆರ್ ಅಪ್ರಾಪ್ತೆರ್ ಸೇರ್ದ್ ಒಟ್ಟು ಏಳ್ ಜನ ಅಕಲೆನ್ ಅಡ್ಡ ಕಟ್ಟ್‌ದ್ ಉಂತಾದ್, ಪೊಣ್ಣನ ಮಿತ್ತ ಸಾಮೂಹಿಕ ಅತ್ಯಾಚಾರ ಮಲ್ತಿತ್ತೆರ್. ಈ ಬಗೆಟ್ ಕುಡ್ಲ ಮಹಿಳಾ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾದಿತ್ತ್‌ಂಡ್.
ಅಪಗದ ಪೊಲೀಸ್ ಇನ್ಸ್‌ಪೆಕ್ಟರ್ ಕಲಾವತಿ ಕೆ ಬೊಕ್ಕ ಅಪಗದ ಎಸಿಪಿ ಮಂಜುನಾಥ್ ಶೆಟ್ಟಿ ಮೇರ್ ಈ ಪ್ರಕರಣೊದ ಬಗೆಟ್ ಜಡ್ತೆ ಮಲ್ತಿತ್ತೆರ್. ಬೊಕ್ಕ ಅಪಗದ ಎಸಿಪಿ ಶ್ರೀನಿವಾಸ ಗೌಡ ಆರ್ ಮೇರ್ ನ್ಯಾಯಂತಡೆಗ್ ಚಾರ್ಜ್ ಶೀಟ್ ಸಂದಾದಿತ್ತೆರ್.
ವಿಚಾರಣೆ ಮಲ್ತ್‌ದ್ ಸಾಕ್ಷ್ಯಾಧಾರೊಲೆನ್ ಪರಿಶೀಲನೆ ಮಲ್ತಿನ ನ್ಯಾಯಾಧೀಶೆರಾಯಿನ ಜಗದೀಶ ವಿ.ಎನ್., ಮಾತಾ ಆರೋಪಲಾ ಸಾಬೀತಾತ್ಂಡ್ ಪನ್ಪಿ ತೀರ್ಮಾನೊಗು ಬೈದೆರ್. ಇಂದೆತ ಆಧಾರೊಡು ನ್ಯಾಯಂತಡೆ ನಾಲ್ವೆರ್ ಅಪರಾಧಿಲೆಗ್ 20 ವರ್ಸ ಕಠಿಣ ಕರ್ಪಿಲ್ಲ ಶಿಕ್ಷೆ ಬೊಕ್ಕ ದಂಡ ಪಾಡ್ದ್ ತೀರ್ಪು ಕೊರ್ತುಂಡು .
ಸರ್ಕಾರಿ ಅಭಿಯೋಜಕಿ ಜ್ಯೋತಿ ಪ್ರಮೋದ್ ನಾಯಕ್ ಮೇರ್ ಸಾಕ್ಷಿಲೆನ್ ವಿಚಾರಣೆ ಮಲ್ತ್‌ದ್, ಸರ್ಕಾರೊದ ಪರವಾದ್ ವಾದ ಮಂಡನೆ ಮಲ್ತೆರ್.
ಈ ಕೃತ್ಯೊಡು ಪಾಲ್‌ಪಡೆತಿನ ಮೂವೆರ್ ಅಪ್ರಾಪ್ತ ಆಣುಲೆನ ವಿಚಾರಣೆ ಇತ್ತೆ ಬಾಲ ನ್ಯಾಯ ಮಂಡಳಿಡ್ ನಡತೊಂದುಂಡು.