Last updated on August 12th, 2026 at 06:22 pm
ತುಲುನಾಡ್ ಪನ್ನಗ ಪರಪೋಕುದ ತಿರ್ಲ್, ಪೊಸತಿರಿತ ಪೊರ್ಲು ದಿಂಜಿನ ನಾಡ್. ಮೂಲು ಸಂಕ್ರಾಂದಿರ್ದ್ ಸಿಂಗುಡೆಗ್ ತಿಂಗೊಲು ಪಗರುಂಡು. ಸೂರ್ಯನ ನಡೆಟ್ ನಡಪುನಕುಲು ತುಲುವೆರ್. ಪಗ್ಗುರ್ದ್ ಸುಗ್ಗಿ ಮುಟ್ಟಲಾ ಒಂಜತ್ತ್ ಒಂಜಿ ಎಡ್ಡೆ ದಿನೊಕುಲು, ವರ್ಷ ಇಡೀ ಬೆನ್ನಿ ಬದ್ಕ್ ಬದ್ಕುನ ತುಲುವಗ್ ಆಟಿ ಒಂಜಿ ಮಿನಕೆಡ್ ಪಂಡ ರಜೆ. ಪ್ರತೀಯೊಂಜೆಟ್ಲಾ ಇಂಚೆನೇ ಉಪ್ಪೊಡೂಂದು ಒಂಜಾತ್ ಕಟ್ಟ್ ಕಟ್ಟಲೆಲೆನ್ ಮಂತೊಂದು, ಅಯಿನ್ ತಪ್ಪಾಂದೆ ನಡಪಾವೊಂದು ಬೈದಿನ ಹಿರಿಯಕ್ಲೆನ ಕಾಲ ಒಂಜಾಂಡ್. ಬರವು ಸರವು ಕಲ್ತೊಂದು ಬೆನ್ನಿಗ್ ಬೆರಿಪಾಡ್ದ್ ಪೇಂಟೆ ಸೇರಿನ ಇತ್ತೆದ ತುಲುವನ ನಡೆ ಎಂಚವುಂಡು…?
ದುಂಬು ಹಿರಿಯಕ್ಲೆನ ಕಾರ್ ಪತ್ತ್ಂಡಾ ಅಕ್ಲೆ ಬಾಯಿಡ್ ಬರೊಂದಿತ್ತಿನ ಪಾತೆರ ‘ಎಡ್ಡೇಲೆ ಮಗಾ’, ಅಂದ್ ಕಿರಿಯಕುಲು ಎಡ್ಡೆ ಆತೆರ್!! ಓಡೆ ಮುಟ್ಟ ಎಡ್ಡೆ ಆತೆರ್…? ಎಡ್ಡೆ ಒವ್ವು ಹಾಳ್ ಒವ್ವೂಂದು ತೆರಿಯಂದಿನಾತ್ ಎಡ್ಡೆ ಆತೆರಾ…? ಪನ್ಡ್ಂಡ ಕೇನೊನುನಾತ್ ತಾಮೆಸ ಇಜ್ಯಂದಿನಾತ್ ಎಡ್ಡೆ ಆತೆರಾ…? ಆಚಿರ ಆಪುಂಡು! ದಾಯೆ ಪಂಡ ಆಟಿ ಆಮಸೆದಾನಿ ಕಾಂಡೆ ಮೊಬೈಲ್ ದೆತ್ತ್ಂಡ ಯಾವು, ಆಟಿ ಅಮಸೆದ ಎಡ್ಡೆಪ್ಪುಲು, ಪನೊಂದು ಒಂಜಾತ್ ಎಡ್ಡೆಪ್ಪು ಬಯಕುನ ಪಟ ಬರೊಂದುಪ್ಪುಂಡು. ಅಯಿನ್ ತೂನಗ ಅಮಸೆ ನಂಕ್ ಎಡ್ಡೆಪ್ಪು ಬಯಕುನಾತ್ ಎಡ್ಡೆ ದಿನನಾ…? ಆಟಿಡಾಂಡಲಾ ಅಮಸೆ ಅಮಸೆನೇ ಅತ್ತಾ….?
ದುಂಬು ಅಮಾಸೆ ಪಂಡ ಆ ದಿನ ಎಡ್ಡೆತ್ತ್. ಇಲ್ಲಡ್ ಒರ್ತಿ ಪೊರ್ತೆಲ್ದ ಬಂಜಿನಾಲ್ ಇತ್ತಲ್ಂಡ ಪೆದ್ಯೆರೆ ಅಮಸೆ ಒಂಜಿ ತಪ್ಪಡ್ಂದ್ ದೈವ ದೇವೆರೆಗ್ ಕೈ ಮುಗಿಯೊಂದಿತ್ತೆರ್ಗೆ ಹಿರಿಯಕುಲು. ದಾಯೆ ಪಂಡ ಅಮಾಸೆ ಪುಟ್ಟುಗು ಎಡ್ಡೆತ್ತ್, ಅಮಾಸೆ ಪಂಡ ಕಪ್ಪು,ಕತ್ತಲೆ. ನಮ ಯಾಪಲಾ ಬೊಲಿಕೆಗ್ ಮೋನೆ ಪಾಡುನಕುಲು. ಅಮಸೆಗ್ ಸೈತ್ಂಡ ಎಡ್ಡೆ ಪನ್ಪೆದೆರ್. ಅಮಸೆದಾನಿ ಮದಿಮೆ ಮಸಿರಿ ಆವಂದ್ ಆಂಡ ಸಾವು ಆವೊಲಿ, ಅಮಸೆ ಸೈತಿನಕ್ಲೆಗ್ ಬಲಸುನ ಕ್ರಮ ಉಂಡು, ಆಂಡ ಅನಿ ಜೂವಡಿತ್ತಿನಕ್ಲೆಗ್ ಸಮ್ಮನ ಬಲ್ಮನ ನಡಪಂದ್, ಅಯಿಟ್ಲಾ ಆಟಿ ಅನಿಷ್ಟದ ತಿಂಗೊಲುಂದೇ ಪನೊಂದಿತ್ತಿನ ತಿಂಗೊಲು. ಬಡಪತ್ತ್ದ ಕಾಲೊಡು ಬಂಜಿಗಿಜ್ಯಂದೆ ಬರೆಲ್ನಗ ಕಂಡೆ, ತಪ್ಪು ತಜಂಕ್ ತಿಂದಿನ ದಿನೊಕುಲು. ಕೀರಿಕುಟ್ಟುನ ಬರ್ಸೊಗು ಸೀಕ್ ಸಂಕೊಡೊಡು ನರಕಬರ್ಪೆದಿನ ತಿಂಗೊಲು. ಅಪಗನೇ ಪನ್ನೈನ್ ದಿನ ಕೊಡಿ ಮರ್ದ್ದ ಕಸಾಯ ಪನ್ನೈನ್ ದಿನ ಮರ್ದ್ ಗಂಜಿ ಉನೊಂದಿತ್ತಿನಿ. ಅಪಗನೇ ಆಟಿಡೊಂಜಿ ಅಮಾಸೆ ಪಾಲೆದ ಪೇರ್ ಪರ್ಯೆರೆ ನಿಗಾಂಟ್ ಮಂತಿನ ದಿನ. ಆನಿ ಮುನ್ನೂತ ಅಜಿಪ್ಪ ಬಗೆತ ಮರ್ದ್ ಪಾಲೆದ ಪೇರ್ಡ್ ಉಂಡೂಂದು ನಂಬಿಕೆ, ಆ ಮರ್ದ್ ಪರ್ಂಡ ಬೊಕ್ಕ ವರ್ಷ ಇಡೀ ಬೇತೆ ಮರ್ದೇ ಬೋಡೂಂದು ಇಜ್ಯಂಡ್ ದುಂಬುದಕ್ಲೆಗ್. ಆತೇ ಅತ್ತಂದೆ ದುಂಬುದಕುಲು ಮರ್ದ್ರ್ದ್ ಒಂತೆ ಪಿರನೇ ಉಂತುನಕುಲು, ಮರ್ದ್ ದೆತೊನುಲೆಕ ಆಯೆರೆ ಬಲ್ಲಿ, ಸೋಮಾರ, ಸಿಂಗುಡೆದಾನಿಮಾತ ಮರ್ದ್ಗ್ ಪೋಯೆರೆ ಬಲ್ಲಿ ಪನ್ಪುನವೇ ಅಕ್ಲೆನ ನಂಬಿಕೆ. ಅಯಿಕಾದ್ ಆಟಿಡೊಂಜಿ ಮರ್ದ್ ಪಾಲೆದ ಮರತ ಕೆತ್ತೆ ಕನತ್ದ್ ಕಡೆಪ್ಯಲ್ಲ್ಡ್ ಕಡೆದ್ ಅಯಿನ್ ಪುಂಟುಂಡ ಬರ್ಪುನ ಪೇರ್ಗ್ ಬೊಲ್ಲುಕಲ್ಲ್ ಕಾಯಾದ್ ಪಾಡ್ದ್ ಪರ್ಪುನಿ. ಕಾಂಡೆ ಬಜಿ ಬಂಜಿಗ್ ಪರ್ಂಡ ಬೊಕ್ಕ ಮಧ್ಯಾಹ್ನ ಮೆತ್ತೆದ ಗಂಜಿ. ಪಾಲೆದ ಪೇರ್ ಶರ್ರಗ್ ಬಾರೀ ಉಷ್ಣ ಗುಣತ ಆ ಉಷ್ಣಗ್ ಪಿರಿ ಮರ್ದೇ ಮೆತ್ತೆದ ಗಂಜಿ. ಆಂಡ ಇನಿ ಎಂಚಾತ್ಂಡ್…!!??
ಪಾಲೆದ ಪೇರ್ ಕಸಾಯ ಆತ್ಂಡ್, ಒರಿಯೊರಿ ಒಂಜೊಂಜಿ ಕೂಟು ಮರ್ದ್ ಲೆನ್ ಸೇರ್ಪಾದ್ ಕಡೆಯೊಡು ಪನೊಂದುಲ್ಲೆರ್, ಕೆಲವೆರ್ ಎಡ್ಡೆ ಮುಂಚಿ, ಬೊಳ್ಳುಳ್ಳಿ ಪಾಡ್ಂಡ ಪಾಕದಕುಲು ಜೀರಿಗೆ ಪಾಡ್ದ್ ಕಡೆಪುನೀಂದ್ ಪನ್ಪೆರ್. ಕೇನ್ನಗ ಆಚಿರ ಆಪುಂಡು!! ಆಟಿ ಅಮಸೆದಾನಿ ಸಾರತೊಂಜಿ ಬಗೆ ಮರ್ದ್ ಪಾಲೆದ ಮರಟುಂಡು ಪನ್ಪುನಕುಲು ಅಯಿಕ್ ಕುಡಾ ಬೆಳ್ಳುಳ್ಳಿ, ಜೀರ್ದರಿ, ಎಡ್ಡೆಮುಂಚಿ ದಾಯೆ ಬಿರೆವೊಡು…? ಅಂಚಂಡ ಅಯಿಟಿತ್ತಿನ ಮರ್ದ್ ಸತ್ವೊದ ಮಿತ್ತ್ ನಂಬಿಕೆ ಇಜ್ಜಾ….? ನಂಬಿಕೆ ಇಜ್ಯಂದಿನಕ್ಲೆಗ್ ಈ ಗಾಂಡ್ ಗೌಜಿ ಬೋಡಾ…? ಉಂದು ಒಂಜಿ ಚೋದ್ಯ ಆಂಡ, ಪಾಲೆದ ಮರ್ದ್ ಪರಿನ ಮೇಲ್ಗೇ ಮೆತ್ತೆದ ಗಂಜಿ ಉಂಡುದು ದಾದ ಪಲವುಂಡೂಂದು ತೆರಿಯುಜಿ. ಪರ್ನ ಮರ್ದ್ ಜೂವಗ್ ಒಯಿತೊನೆರೆ ದುಂಬೇ ಪಿರಿಮರ್ದ್ ಕೊರುಂಡ ಸಮಾಪುಂಡಾ…? ದುಂಬುಪೂರ ಕಾಂಡೆ ಬೊಲ್ಪೊಲ್ಪುಗು ಮರ್ದ್ ಪರ್ಂಡ ಆನಿ ಮಧ್ಯಾಹ್ನ ಅತ್ತ್ಂಡ ರಾತ್ರೆಗ್ ಮೆತ್ತೆದ ಗಂಜಿ ಕೊರ್ಪೆದೆರ್. ಬಂಜಿಗ್ ಪೋಯಿನ ಕೈಪೆ ಒರ ರಡ್ಡ್ ಸರ್ತಿ ಪಿದಯಿಕುಲ್ಲುದಾನಗ ಬಂಜಿ ಗೌಲಸ ಆವೊಂದಿತ್ತ್ಂಡ್. ಅಪಗ ಮೆತ್ತೆದ ಗಂಜಿ ಬೂರುಂಡ ಉಲ್ಲಸ.
ಇತ್ತಿತ್ತೆ ನಮ್ಮ ಬಡಪತ್ತ್ ಮಾಜಿದ್ಂಡ್. ಮಾತೆನ್ಲಾ ನಮ ಗರ್ದ್ ಮನ್ತೊಂದು ಮನ್ತೊಂದು ಆಟಿ ಇತ್ತೆ ಒಂಜಿ ತಿಂಗೊಲುದ ಪರ್ಬನೇ ಆದ್ ಪೋಂಡು. ಇಲ್ಲಿಲ್ಲ್ ಸೀಕ್ ಸಂಕಡ ಕಲೆಯೆರೆ ಬರೊಂದಿತ್ತಿನ ಕಲೆಂಜೆ ಆಟಿದ ಲೇಸ್ದ ಮಿತ್ತರ್ಮೆಡ್ ನಲಿತೊಂದುಲ್ಲೆ. ಸಂಘ ಕೂಟೊಲೆಡ್ ಪಾಲೆದ ಕಸಾಯಲ ಮೆತ್ತೆದ ಗಂಜಿಲ ಪಟ್ಟುನ ಇಡೀ ದಿನ ನಡಪುಂಡು. ದೊಂಬಾಯೆರೆ ದುಂಬು ಪರೊಡಾಯಿನ ಮರ್ದ್ನ್ ಮಧ್ಯಾಹ್ನ ಮುಟ್ಟಲಾ ಪರ್ಪುನ ಏತ್ ಸಮನಾ ತೆರಿಯಂದ್. ಅಂತು ನಮ್ಮ ಆಚರಣೆ ಒರಿಯುನ ಒಟ್ಟಿಗೆ ಒರು ಪಗರೊಂದುಂಡು, ನನದಕ್ಲೆಗ್ ವಾ ಇದೊಟು ಒರಿಯೂಂದು ದೇವೆರೆಗ್ ಗೊತ್ತು. ಅಯಿತ ಒಟ್ಟಿಗೆ ಆಟಿಡ್ ಆಪೆದಿನ ಕುಲೆ ಮದಿಮೆದ ವಿಡಿಯೋಲು ಬಾರೀ ತಿರ್ಗೊಂದುಂಡು. ನನ ದುಂಬಗಾನಗ ಆಟಿದ ಲೇಸ್ ದ ಮಿತ್ತ್ರ್ಮೆಡ್ ಕುಲೆ ಮದಿಮೆದ ತೂಪರಿಕೆ ನಡಪಂದ್ಂದ್ ಪನಿಯೆರೇಪುಜಿ. ನಮಕಿತ್ತೆ ಲೈಕ್ಸ್, ಸಬ್ಸ್ಕ್ರೈಬ್ ಬೋಡಾಯಿನತ್ತಂದೆ ನಮ್ಮ ಆಚೆರಿಪುಲೆನ ಪೊರ್ಲು ತಿರ್ಲತ್ತ್. ಅಂಚತ್ತ್ ಇಂಚಾಂದ್ ಪನೊಡಾಯಿನಕ್ಲೆನ ಬಾಯಿಕಟ್ಟ್ದ್ಂಡ್, ಇತ್ತೆ ಮಾದಿನಂಚಿ ದೇರುನೆನ್ ನಮ್ಮ ಹಿರಿಯಕುಲು ಒತ್ತೊಂದಾತ್ಂಡ್. ಪೊರಿ ತತ್ತ್ದ್ಂಡ್, ಬುಲೆ ಎಂಚ ಬರೂಂದು ಗೊತ್ತಿಜ್ಜಿ , ಎಲ್ಲೆಗಾನಗ ದಡ್ಡ್ ತಿನ್ಪುನೆನ್ಲಾ ಕಲ್ಪೊಡಾವು.