Last updated on August 12th, 2026 at 05:29 pm
ಬೆಂಗಳೂರ್, ಆ 12: ಆಹಾರ ಸುರಕ್ಷತೆ ಬೊಕ್ಕ ಔಷಧ ಆಡಳಿತ ಇಲಾಖೆ ಕರ್ನಾಟಕಡೊರ್ಮೆ ತೆಟ್ಟ್ ಹೋಟೆಲ್ಲು ಬೊಕ್ಕ ನಿಯಮಬಾಹಿರ ಕಾಸ್ಮೆಟಿಕ್ (ಸೌಂದರ್ಯವರ್ಧಕ) ಉದ್ಯಮೊಲೆನ ಮಿತ್ತ್ ಬೆರಿಬೆರಿ ದಾಳಿ ಮಲ್ತ್ದ್ ಬೆಚ್ಚ ಮುಟ್ಟಾದಿನ ಬೆರಿಟೇ ಸಾರ್ವಜನಿಕೆರೆ ಆರೋಗ್ಯ ರಕ್ಷಣೆ ಬೊಕ್ಕ ವ್ಯಸನಮುಕ್ತ ಕರ್ನಾಟಕ ಕಟ್ಟುನ ದಿಟ್ಟಿಡ್ ರಾಜ್ಯ ಸರ್ಕಾರ ಒಂಜಿ ಮಹತ್ವೊದ ನಿರ್ಧಾರ ಗೆತೊಂದುಂಡು. ತಂಬಾಕ್ ಬೊಕ್ಕ ನಿಕೋಟಿನ್ ಇಪ್ಪುನ ಗುಟ್ಕಾ ಬೊಕ್ಕ ಪಾನ್ ಮಸಾಲಾ ಉತ್ಪನ್ನೊಲೆನ್ ತಯಾರ್ ಮಲ್ಪುನ, ದೆತ್ತ್ ದೀಪುನ, ಕೊನೊಪುನ, ಪಟ್ಟುನ ಬೊಕ್ಕ ಮಾರುನೆನ್ ಕರ್ನಾಟಕೊಡೊರ್ಮೆ ಒಂಜಿ ವರ್ಸೊದ ಮಟ್ಟ್ಗ್ ಅಲಕ್ಕ ನಿಷೇಧ ಮಲ್ತ್ದೆರ್.
ಆಗಸ್ಟ್ 10 ರ್ದೇ ಜಾರಿ
ಆಹಾರ ಸುರಕ್ಷತೆ ಬೊಕ್ಕ ಗುಣಮಟ್ಟ ಕಾಯ್ದೆ-2006ತ ಕಲಂ 30(2)(a) ಸೇರ್ದ್ Food Safety and Standards Regulations, 2011ತ ನಿಯಮ 2.3.4 ಅಡಿಟ್ ಈ ಕಠಿಣ ಕ್ರಮ ಗೆತೊಂದೆರ್. ಆಹಾರ ಸುರಕ್ಷತೆ ಬೊಕ್ಕ ಔಷಧ ಆಡಳಿತ ಇಲಾಖೆ 2026ರ ಆಗಸ್ಟ್ 10 ತಾನಿ ಈ ಬಗೆಟ್ ಅಧಿಕೃತ ಅಧಿಸೂಚನೆ ಪಿದಡ್ಪಾದಿತ್ತ್ದ್, ಅಧಿಸೂಚನೆ ಪಿದಡ್ಪಾದಿನ ದಿನೊರ್ದೇ ಈ ಆದೇಶ ಜಾರಿಗ್ ಬೈದ್ಂಡ್. ಪ್ಯಾಕ್ ಮಲ್ದಿನ ಅತ್ತ್ಂಡ ಚೊರಿ ಮಾರುನ ಮಾತಾ ಬಗೆತ ನಿಷೇಧಿತ ತಂಬಾಕ್ ಉತ್ಪನ್ನೊಲೆನ ಮಿತ್ತ್ಲಾ ಇಲಾಖೆ ಬಾರೀ ಕಣ್ಣ್ ದೀತ್ಂಡ್.
ವಿಶೇಷ ಕಾರ್ಯಾಚರಣೆ ಬೊಕ್ಕ ಕಠಿಣ ಕ್ರಮ
ಕರ್ನಾಟಕೊಡೊರ್ಮೆ ನಿಯಮ ಉಲ್ಲಂಘನೆಲೆನ್ ಉಂತಾವರೆ ಆಹಾರ ಸುರಕ್ಷತಾ ಅಧಿಕಾರಿಲೆನ ಮುತಾಲಿಕೆಡ್ ವಿಶೇಷ ತಪಾಸಣೆ ಬೊಕ್ಕ ಜಾರಿ ಕಾರ್ಯಾಚರಣೆಲೆನ್ ಮಲ್ತೊಂದುಲ್ಲೆರ್. ಮಾರ್ಕೆಟ್ಡ್ ನಿಷೇಧಿತ ಉತ್ಪನ್ನೊಲೆನ್ ತಯಾರ್ ಮಲ್ಪುನ, ಮಾರುನ ಅತ್ತ್ಂಡ ಪಟ್ಟುನ ತೋಜಿದ್ ಬತ್ತ್ಂಡ ಕಾನೂನ್ದ ರೀತಿ ಕಠಿಣ ಕ್ರಮ ಗೆತೊನುವ ಪನ್ದೊ ಇಲಾಖೆ ಎಚ್ಚರ್ಗೆ ಕೊರ್ತುಂಡು
ಇಂದೆತ ಒಟ್ಟುಗು, ಸಾರ್ವಜನಿಕೆರ್ ಅಕಲೆನ ಸುತ್ತಮುತ್ತ ಇಂಚಿನ ನಿಷೇಧಿತ ಉತ್ಪನ್ನೊಲೆನ್ ಅಕ್ರಮವಾದ್ ಮಾರುನ ಅತ್ತ್ಂಡ ದೆತ್ತ್ದ್ ದೀತಿನ ತೋಜಿದ್ ಬತ್ತ್ಂಡ ಅಪಗನೇ ಇಲಾಖೆದ ಅಧಿಕಾರಿಲೆಗ್ ಒಲವು ಕೊರ್ಯೆರ ತೆರಿಪಾದೆರ್. ಆರೋಗ್ಯಕರ ಬೊಕ್ಕ ಸುಸ್ಥಿರ ಸಮಾಜೊದ ನಿರ್ಮಾಣೊಗು ಸಾರ್ವಜನಿಕೆರ್ ಸರ್ಕಾರೊದ ಈ ಮಲ್ಲ ಆಂದೋಲನೊಗು ಪೂರ್ಣ ಸಹಕಾರ ಕೊರೊಡು ಪನ್ದ್ ಆಹಾರ ಸುರಕ್ಷತೆ ಬೊಕ್ಕ ಔಷಧ ಆಡಳಿತ ಇಲಾಖೆ ಪ್ರಕಟಣೆಡ್ ಬಿನ್ನೈತೊಂದುಂಡು.