Last updated on August 5th, 2026 at 10:36 am
ಮುಂಬೈ ಅಗಸ್ಟ್ 05: ‘ಗಜಿನಿ’, ‘ಸೈ’ ಬೊಕ್ಕ ‘ಛತ್ರಪತಿ’ ದಂಚಿನ ಹಿಟ್ ಸಿನಿಮಾಲೆಡ್ ವಿಲನ್ ಆದ್ ದೇಶೊಡೊರ್ಮೆ ಪಾಕ ಪುದರ್ ಮಲ್ತಿತ್ತಿನ ಪೆರಿಯ ಬಹುಭಾಷಾ ನಟೆ ಪ್ರದೀಪ್ ಸಿಂಗ್ ರಾವತ್ (74) ಮೇರ್ ತೀರ್ಯೆರ್. ಭಾರತೀಯ ಚಿತ್ರರಂಗೊಡು ಖಳನಾಯಕ ಪಾತ್ರೊಲೆನ ಮುಕೇನ ಎಡ್ಡೆ ಪುದರ್ ಮಲ್ತಿತ್ತಿನ ಪೆರಿಯ ನಟೆ ಪ್ರದೀಪ್ ರಾವತ್ (74) ಮೇರ್ ಕ್ಯಾನ್ಸರ್ದ ಎದುರು ಪಾಕ ಸಮೆರ್ದಿಂಚಿ ಪೊರ್ಮ್ಬ್ದ್ ಕೋಡೆ ಅಂಗಾರೆ ಬಯ್ಯಡ್ ತೀರ್ದೆರ್.
1952 ಟ್ ದೆಲ್ಲಿಡ್ ಪುಟ್ಟಿನ ಪ್ರದೀಪ್ ರಾವತ್ ಮೇರ್, 1985 ಟ್ ರಾಜ್ ಬಬ್ಬರ್ ಅಭಿನಯೊದ ‘ಐತ್ಬಾರ್’ ಚಿತ್ರೊದ ಮುಕೇನ ಹಿಂದಿ ಚಿತ್ರರಂಗೊಗು ಕಾರ್ ದೀಯೆರ್. ದೂರದರ್ಶನೊದ ಧಾರಾವಾಹಿಲೆಡ್ಲಾ ನಟನೆ ಮಲ್ದಿನ ಮೇರ್, ರಾಜಮೌಳಿ ನಿರ್ದೇಶನೊದ ನಿತಿನ್ ಅಭಿನಯೊದ ‘ಸೈ’ (2004) ಚಿತ್ರೊದ ‘ಭಿಕ್ಷು ಯಾದವ್’ ಪಾತ್ರೊದ ಮುಕೇನ ಟಾಲಿವುಡ್ಡ್ ಪುದರ್ ಮಲ್ತೆರ್.
ತಮಿಳ್, ತೆಲುಗು, ಹಿಂದಿ, ಕನ್ನಡ ಬೊಕ್ಕ ಮಲಯಾಳಂ ಭಾಷೆಲೆಡ್ ನಟನೆ ಮಲ್ದಿನ ಮೇರ್ ‘ಭದ್ರ’, ‘ಛತ್ರಪತಿ’, ‘ಸ್ಟಾಲಿನ್’, ‘ದೇಶಮುದುರು’, ‘ಗಜಿನಿ’, ‘ಸರೈನೋಡು’, ‘ವಾಲ್ತೇರು ವೀರಯ್ಯ’ ಸೇರ್ದ್ ನೂದೆರ್ದ್ಲಾ ಎಚ್ಚ ಸಿನಿಮಾಲೆಡ್ ರಂಗ್ ಪೂಜಿದೆರ್. ‘ಸೈ’ ಚಿತ್ರೊದ ಅಭಿನಯೊಗು 2004ಟ್ ಅತ್ಯುತ್ತಮ ಖಳನಾಯಕ ಫಿಲ್ಮ್ಫೇರ್, ಸಂತೋಷಂ ಬೊಕ್ಕ ಪ್ರತಿಷ್ಠಿತ ನಂದಿ ಪ್ರಶಸ್ತಿಲೆನ್ ಗೆಂದ್ದೆರ್. ಮೆರೆನ ಅಗಪುಗು ಚಿತ್ರರಂಗೊದ ಗಣ್ಯೆರ್ ಬೊಕ್ಕ ಅಭಿಮಾನಿಲು ಸಂತಾಪ ತೂಪಾದೆರ್.
ನಾಲ್ ವರ್ಸೊಗು ದುಂಬು ಆರ್ ಕ್ಯಾನ್ಸರ್ನ್ ಗೆಂದ್ದಿತ್ತೆರ್. ಆಂಡ ಕರಿನ ಒಂಜರೆ ತಿಂಗೊಲುರ್ದ್ ಕುಡ ಕ್ಯಾನ್ಸರ್ ಬತ್ತ್ದ್ ಆಸ್ಪತ್ರೆಗ್ ದಾಕಲಾದಿತ್ತೆರ್. ಒರರ್ದ್ ಒರಾನೆ ಆರೆನ ನೆತ್ತೆರ್ಡ್ ಪ್ಲೇಟ್ಲೆಟ್ ಕಮ್ಮಿ ಆದ್ ಉಸಾರಾವಂದೆ ತೀರ್ದೆರ್.