Last updated on October 3rd, 2026 at 01:14 pm
ಕಾರ್ಲ, ಸೆ.29: ಹಿರ್ಗಾನ ಗ್ರಾಮೊದ ಹೆರ್ಮುಂಡೆದ ಸ್ವರ್ಣ ಸುದೆಟ್ ದೋಸ್ತಿಲೆನ ಒಟ್ಟುಗು ಮೀಂದ್ಯೆರೆ ಪೋದಿತ್ತಿನ ಇರ್ವೆರ್ ಜವನೆರ್ ನೀರ್‌ಡ್ ಮುರ್ಕ್‌ದ್ ದಾರುಣವಾದ್ ತೀರ್ದಿನ ನಡಪು ಕೋಡೆ ಅಂಗಾರೆ ಮಧ್ಯಾಹ್ನ ನಡತ್‌ದ್ಂಡ್.
ತೀರ್ದಿನಕಲೆನ್ ಹಿರ್ಗಾನ ಗ್ರಾಮೊದ ಪೈಂಟ್‌ದ ಬೇಲೆ ಮಲ್ತೊಂದಿತ್ತಿನ ಭರತ್ ಪೂಜಾರಿ (29) ಬೊಕ್ಕ ಹರ್ಷನ್ ಅಚಾರ್ಯ (23) ಪನ್ದ್ ಗುರ್ತ ಪತ್ತ್‌ದೆರ್.
ಅಂಗಾರೆ ಬೇಲೆಗ್ ರಜೆ ಇತ್ತಿನೆರ್ದಾವರ ಭರತ್ ಬೊಕ್ಕ ಹರ್ಷನ್ ಸೇರ್ದ್ ಐವೆರ್ ದೋಸ್ತಿಯರ್ಲು ಮಧ್ಯಾಹ್ನ ಮೀಂದ್ಯೆರ ಹೆರ್ಮುಂಡೆ ಸುದೆಕ್ ಪೋತೆರ್. ಹಿರ್ಗಾನದ ಮಂಗಿಲಾರ್ ಪನ್ಪಿನಲ್ಪ ಸುಮಾರ್ 2 ಕಿ.ಮೀ. ಬಂಙದ ಸಾದಿಡೆ ನಡತೊಂದು ಸುದೆಕ್ ಪೋದು ಅಕುಲು ಮೀಂದೊಂದುಪ್ಪುನಗ ಭರತ್ ಬೊಕ್ಕ ಹರ್ಷನ್ ತತ್ತ್‌ದ್ ಸುದೆತ ಗಂತ್‌ದ ಜಾಗೆಗ್ ಪೋತೆರ್. ಈ ಪೊರ್ತುಡು ಮೀಂದ್ಯೆರೆ ಆವಂದೆ ಇರ್ವೆರ್ಲಾ ಮುರ್ಕ್‌ದ್ ತೀರ್ದೆರ್‌ಗೆ.
ಜಾಗೆಗ್ ಗಾಡಿಲು ಬರ್ಯೆರ ಸಮ ಸಾದಿ ದಾಂತಿನೆರ್ದಾವರ ಅಗ್ನಿಶಾಮಕ ದಳೊದ ಸಿಬ್ಬಂದಿಲು ರಕ್ಷಣಾ ಸೊತ್ತುಲೆನ್ ಪತೊಂದು 3 ಕಿ.ಮೀ. ದೂರ ನಡತೊಂದೇ ಬರೊಡಾಂಡ್. ಸಿಬ್ಬಂದಿಲು ಅಡೆ ಎತ್ತ್‌ನಗ ಜವನೆರಿರ್ವೆರೆ ಪುನ ನೀರ್‌ದ ಅಡಿಟ್ ತಿಕೊಂದಾತ್ಂಡ್.
ಅಗ್ನಿಶಾಮಕ ದಳೊದ ಠಾಣಾಧಿಕಾರಿ ಸಂಜೀವ ದೇವಾಡಿಗ ಮೆರೆನ ಮುತಾಲಿಕೆಡ್ ಕೈತಲ್‌ದಕಲೆನ ಸಹಕಾರೊಡು ಮೂಜಿ ಗಂಟೆರ್ದ್‌ಲಾ ಎಚ್ಚ ಪೊರ್ತು ಬುಡಂದೆ ಕಾರ್ಯಾಚರಣೆ ಮಲ್ತ್‌ದ್ ಇರ್ವೆರ್ ಜವನೆರೆ ಪುನೊನು ನೀರ್‌ರ್ದ್ ಮಿತ್ತ್ ಕನತ್‌ದೆರ್.
ಕಾರ್ಯಾಚರಣೆಡ್ ಅಗ್ನಿಶಾಮಕ ದಳೊದ ಸಿಬ್ಬಂದಿ ರೂಪೇಶ್, ಸುರೇಶ್, ನಿತ್ಯಾನಂದ, ದಿನೇಶ್, ಮುಜಾಮಿಲ್ ಬೊಕ್ಕ ಡ್ರೈವರ್ ಶಿವಾನಂದ್ ಪಾಲ್‌ಪಡೆತೆರ್.