Last updated on September 28th, 2026 at 10:52 am
ಸೆ. 28: ಟರ್ಕಿದ ಇಸ್ತಾಂಬುಲ್ ಡ್ ನಡತಿನ ಏಷ್ಯನ್ ಬೆಂಚ್ ಪ್ರೆಸ್ ಪವರ್ ಲಿಫ್ಟಿಂಗ್ ಪಂತೊಡು ಭಾರತದ ಪರವಾದ್ ಗೊಬ್ಬುದು ಬಂಗಾರ್ ಬೊಕ್ಕ ಬೊಲ್ಲಿ ಪದಕೊನ್ ಮೂಜಿ ಜನ ಗೆಂದುದೆರ್.
ಜೂನಿಯರ್ ವಿಭಾಗೊಡು ಜಯಲಕ್ಷೀ ಆಚಾರ್ಯ ಬಂಗಾರ್‌ದ ಪದಕ, ಸಾತ್ವಿ ಪಿ ಸಾಲಿಯಾನ್ ಬೊಲ್ಲಿ ಪದಕ ಪಡೆತೆರ್. ಈ ರಡ್ಡ್ ಜನ ಶ್ರೀ ವೀರಮಾರುತಿ ವ್ಯಾಯಾಮ ಶಾಲೆದ ಈಶ್ವರ್ ಕಟೀಲ್ ಬೊಕ್ಕ ಕೇಶವ ಕರ್ಕೇರ ಅಕುಲೆರ್ಡ್ ತರಬೇತಿ ಪಡೆತೆರ್. ಕುಡೊರಿ ಕೀರ್ತನ್ ಕಟೀಲ್ ಮೇರ್ ಲ ಬೊಲ್ಲಿ ಪದಕ ಪಡೆತೆರ್. ಮೇರ್ ಕಿನ್ನಿಗೋಳಿದ ಎ.ಎಸ್.ಪಿ.ಎ ಫಿಟ್ನೆಸ್ ಜಿಮ್ ಡ್ ತರಬೇತಿ ಪಡೆತೆರ್. ಗೆಂದಿನ ಮೂಜಿ ಜನಲ ಐತಾರ ತುಳುನಾಡ್‌ಗ್ ಪಿರ ಬತ್ತಿನ ಪೊರ್ತುಡು ಕುಡ್ಲ ವಿಮಾನ ಉಂತಡೆಡ್ ಗೆಂದಿನಕ್ಲೆನ್ ಗರ್ದ್‌ಡ್ ಎದ್ಕೊಂಡೆರ್. ಬೊಕ್ಕ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇಲಂತಡೆಗ್ ಬೇಟಿ ಕೊರ್ದು ಪ್ರಾರ್ಥನೆ ಸಂದಾಯೆರ್. ಭಾರತೊರ್ದು ಒಟ್ಟು 20 ಜನ ಈ ಪಂತೊಡು ಪಾಲ್‌ಪಡೆದಿತ್ತೆರ್.
ಈ ಪೊರ್ತುಡು ಕಿನ್ನಿಗೋಳಿ ಪಟ್ಟಣ ಪಂಚಾಯತ್ ಗುರ್ಕಾರ್ಲು ಗುರುರಾಜ್ ಮಲ್ಲಿಗೆಯಂಗಡಿ, ಈಶ್ವರ್ ಕಟೀಲ್, ಪ್ರಭಾಕರ ಶೆಟ್ಟಿ ಕೋಂಜಾಲಗುತ್ತು, ಅನೀಲ್ ಶೆಟ್ಟಿ ಕೋಂಜಾಲಗುತ್ತು, ದಿವಾಕರ ಶೆಟ್ಟಿ ಕೊಂಜಾಲಗುತ್ತು, ಪ್ರವೀಣ್ ಸಾಲಿಯಾನ್, ಅಭಿಲಾಷ್ ಶೆಟ್ಟಿ ಕಟೀಲ್, ದಾಮೋದರ ಶೆಟ್ಟಿ ಕೊಡೆತ್ತೂರು, ಕೇಶವ ಕರ್ಕೇರ ಕೊಡೆತ್ತೂರು, ಸತೀಶ್ ಶೆಟ್ಟಿ ಎಕ್ಕಾರು, ಸಿಂತಿಯಾ ಕುಂಟಿನೋ, ಚಂದ್ರಹಾಸ್, ಲೋಕಯ್ಯ ಸಾಲಿಯಾನ್ ಕೊಂಡೇಲ ಸಾರ್ವಜನಿಕೆರ್ ಅಭಿಮಾನಿಲು ಒತ್ತುಪಾಲ್ ಇತ್ತೆರ್.