ನೇಪಾಳೊರ್ದು ತುಳುನಾಡ್‌ದ ಬಸ್ರೂರುಗು ಬರ್ರೆ ಉಂಡು ಬಂಗಾರ್‌ದ ಶ್ರೀಚಕ್ರ!

Last updated on November 13th, 2026 at 10:33 am

ತುಳುನಾಡ್‌ದ ಧಾರ್ಮಿಕ ಇತಿಹಾಸೊಡು ವಿಶೇಷ ಸ್ಥಾನ ಪಡೆತಿನ ಬಸ್ರೂರುದ ಶ್ರೀ ತುಳುವೇಶ್ವರ ತುಳುವೇಶ್ವರಿ ದೇವಸ್ಥಾನೊಡು ಪೊಸ ಬಂಗಾರ್‌ದ ಶ್ರೀಚಕ್ರ ಪ್ರತಿಷ್ಠಾಪನೆಗ್ ಅಟ್ಟನೆ ಆವೊಂದುಂಡು. ಪಾಕ ತರೆಮಾರ್‌ಗ್ ದುಂಬು ದೇವಸ್ಥಾನೊದ ಮೂಲ ಮೇರು ಶ್ರೀಚಕ್ರೊನು ನೇಪಾಳೊಗು ಕೊನೊದಿತ್ತೆರ್, ಇತ್ತೆ ಆ ಐತಿಹಾಸಿಕ ಪರಂಪರೆನ್ ಕುಡ ಪುನರುಜ್ಜೀವನ ಮಲ್ಪೆರೆ ನಿರ್ಧಾರ ಮಲ್ದೆರ್.

ಬಸ್ರೂರುಡು ಪೊಸತಾದ್ ಆವರೆ ಉಪ್ಪುನ ಬಂಗಾರ್‌ದ ಶ್ರೀಚಕ್ರೊನು ನೇಪಾಳೊಡೇ ತಯಾರ್ ಮಲ್ಪುವೆರ್. ಬೊಕ್ಕ ಕಠ್ಮಂಡುದ ಪುಗರ್ತೆದ ಶ್ರೀ ಪಶುಪತಿನಾಥ ದೇವಸ್ಥಾನೊಗು ಕೊನೊದು ಅಭಿಷೇಕ ಸೇರ್ದ್ ಬೇತೆ ಬೇತೆ ಧಾರ್ಮಿಕ ವಿಧಿ ವಿಧಾನೊಲೆನ್ ನಡಪಾವೆರ್. ಅಯಿರ್ದ್ ಬೊಕ್ಕ ಬಸ್ರೂರುಗು ಕನತ್‌ದ್ ವಿಧಿಪ್ರಕಾರ ಪ್ರತಿಷ್ಠಾಪನೆ ಮಲ್ಪುವೆರ್. ಕಠ್ಮಂಡುಡು ನಡತಿನ ಭಾರತ-ನೇಪಾಳ ತುಳುವ ಮಹಾಸಭೆಟ್ ಈ ಬಗೆಟ್ ನಿರ್ಧಾರ ದೆತೊಂದೆರ್ ಪಂದ್ ತುಳು ವರ್ಲ್ಡ್ ಫೌಂಡೇಶನ್‌ದ ಕೇಂದ್ರ ಕಾರ್ಯಾಧ್ಯಕ್ಷೆರ್ ರಾಜೇಶ್ ಆಳ್ವೆರ್ ಒಲವು ಕೊರ್ತೆರ್.

ರಾಜೇಶ್ ಆಳ್ವೆರೆನ ಪ್ರಕಾರ, ಅಷ್ಟ ಮಂಗಳ ಬೊಕ್ಕ ಸ್ಥಳೀಯ ಒಲವುನು ತೆರಿಯೊಂದು ಪಾಕ ತರೆಮಾರ್ಗ್ ದುಂಬು ತುಳುವೇಶ್ವರಿ ದೇವಸ್ಥಾನೊಗು ಸಂಬಂಧಿತಿನ ಮೂಲ ಮೇರು ಶ್ರೀಚಕ್ರೊನು ಪೂಜೆದ ಬ್ರಾಣೆರ್ ನೇಪಾಳೊಗು ಕೊನೊದಿತ್ತೆರ್. ದೇವಸ್ಥಾನ ನಾಶ ಆಯಿನೆರ್ದ್ ಬೊಕ್ಕ ಆ ಕುಟುಂಬ ಅಕ್ಲೆ ಇಲ್ಲಡೇ ಶ್ರೀಚಕ್ರೊಗು ಪೂಜೆ ಮಲ್ತೊಂದಿತ್ತ್ಂಡ್. ಬೊಕ್ಕ ನೇಪಾಳೊಗು ಪೋನಗ ಅಯಿನ್ಲಾ ತನ್ಕುಲೆನ ಒಟ್ಟುಗು ಕೊನೊದಿತ್ತೆರ್. ಇತ್ತೆ ನಡತಿನ ಚರ್ಚೆದ ಸಂದರ್ಭೊಡು ಶ್ರೀಚಕ್ರೊಗುಲಾ ನೇಪಾಳೊಗುಲಾ ಇತ್ತಿನ ಸಂಬಂಧ ಬೊಲ್ಪುಗು ಬೈದ್ಂಡ್.

ಇತ್ತೆ ಈ ಯೋಜನೆಗ್ ನನೊಂಜಿ ವಿಶೇಷತೆಲಾ ಉಂಡು. ತುಳುನಾಡ್‌ಗ್ಲಾ ಕಠ್ಮಂಡುದ ಪಶುಪತಿನಾಥ ದೇವಸ್ಥಾನೊಗುಲಾ 300 ವರ್ಷೊರ್ದುಲಾ ಎಚ್ಚ ಸಮಯೊದ ಧಾರ್ಮಿಕ ಸಂಬಂಧ ಉಂಡು ಪಂದ್ ರಾಜೇಶ್ ಆಳ್ವೆರ್ ತೆರಿಪಾದೆರ್. ಕಠ್ಮಂಡುಡು ನಡತಿನ ಸಮಾವೇಶೊಡು ಪಾಲ್ ಪಡೆಯಿನ ಶ್ರೀ ಪಶುಪತಿನಾಥ ದೇವಸ್ಥಾನೊದ ಪ್ರಧಾನ ಅರ್ಚಕೆರ್ ಬೊಕ್ಕ ಒಡಿಪು ಮೂಲೊದ ರಾವಲ್ ಶ್ರೀ ಗಣೇಶ್ ಭಟ್ ಮೇರ್ ಪೊಸ ಬಂಗಾರ್‌ದ ಶ್ರೀಚಕ್ರೊನು ಸುರುಕು ಪಶುಪತಿನಾಥ ದೇವಸ್ಥಾನೊಗು ಕೊನೊದು ಅಭಿಷೇಕ ಬೊಕ್ಕ ಪೂಜೆ ನಡಪಾವೊಡು ಪಂದ್ ಸಲಹೆ ಕೊರ್ತೆರ್.

ಬಸ್ರೂರುಡು ಆಜೆರ್ದ್ ಏಳ್ ದಿನ ಮುಟ್ಟ ನಡತಿನ ಅಷ್ಟಮಂಗಲ ಪ್ರಶ್ನೆ ಬೊಕ್ಕ ಧಾರ್ಮಿಕ ಚರ್ಚೆರ್ದ್ ಬೊಕ್ಕ ದೇವಸ್ಥಾನೊದ ಪುನರುಜ್ಜೀವನ ಮಲ್ಪೆರೆ ನಿರ್ಧಾರ ಆತ್ಂಡ್. ಸುರುಕು ತುಳುವೇಶ್ವರಿ ದೇವಸ್ಥಾನೊನು ಅಭಿವೃದ್ಧಿ ಮಲ್ತ್‌ದ್, ಅಯಿತ ಪೂಜಾ ವಿಧಾನೊದ ಭಾಗವಾದ್ ಶ್ರೀಚಕ್ರೊನು ಪ್ರತಿಷ್ಠಾಪನೆ ಮಲ್ಪೆರೆ ಯೋಜನೆ ಪಾಡ್ದೆರ್. 2027ನೇ ಇಸವಿದ ಜನವರಿರ್ದ್ ಬೊಕ್ಕ ಬಾಲಾಲಯ ಪ್ರತಿಷ್ಠಾಪನೆ ನಡತಿನೆರ್ದ್ ಬೊಕ್ಕ ಪೊಸ ಶ್ರೀಚಕ್ರೊದ ಪ್ರತಿಷ್ಠಾಪನೆ ನಡಪುನ ಸಾಧ್ಯತೆ ಉಂಡು. ದೇವಸ್ಥಾನೊದ ಅಭಿವೃದ್ಧಿಗಾದ್ ಬೇತೆನೇ ಸಮಿತಿ ಬೊಕ್ಕ ಟ್ರಸ್ಟ್ ರಚನೆ ಮಲ್ಪೆರೆಲಾ ನಿರ್ಧಾರ ಮಲ್ದೆರ್. ದೇವಸ್ಥಾನ ನಿರ್ಮಾಣೊಗು ಬೋಡಾಯಿನ ಜಾಗೆನ್ಲಾ ತೂದು ದೀತೆರ್ ಪನ್ದ್ ತೆರಿದ್ ಬೈದ್ಂಡ್.

Leave a Reply

Your email address will not be published. Required fields are marked *

Share
error: Content is protected !!