Last updated on May 9th, 2025 at 07:15 pm
ಉತ್ತರ ಪ್ರದೇಶ, ಮೇ 09: ಇಂಚಿಪ ಮೇ 7 ತಾನಿ ರಾತ್ರೆ ಭಾರತ ಆಪರೇಶನ್ ಸಿಂಧೂರ್‌ದ ಪುದರ್‌ಡ್ ಪಾಕಿಸ್ತಾನ ಬೊಕ್ಕ ಪಾಕಿಸ್ತಾನ ಆಕ್ರಮಿತ ಕಾಶ್ಮೀರೊಡು 9 ಉಗ್ರ ನಿಲೆಕುಲೆನ್ ಪೊಡಿ ಮಲ್ತಿತ್ತ್‌ದ್, ಅವೆತ ಮನದಾನಿ ದೇಶೊಡೊರ್ಮೆ ಕುಸಿತ ಸಂದರಪ್ಪು ಇತ್ತ್ಂಡ್. ಉಂದೆತ ನಡುಟೇ ಉತ್ತರ ಪ್ರದೇಶೊದ ಶಾಜಹಾನ್‌ಪುರ ಜಿಲ್ಲೆರ್ದ್ ಬಾರೀ ಬೆಸರ್‌ದ ಸುದ್ದಿ ಒಂಜಿ ವರದಿ ಆತ್ಂಡ್.
ಭಾರತ ಮಲ್ದಿನ ಏರ್ ಸ್ಟ್ರೈಕ್‌ದ ಯಶಸ್ವಿ ಆತಿನೆಕ್ ಕುಸಿಟ್ ನಲಿತೊಂದಿತ್ತಿನ 8 ವರ್ಸೊದ ಆಣಗ್ ಇರ್ವೆರ್ ಕೆಂಗುಡೆರ್ ಬೀಸತ್ತಿ ಪಾಡ್ದೆರ್. ಉಂದೆತ ಬೆರಿಟೇ ಪೊಸತೊಂಜಿ ಕೋಮುಕೊಲಲ ಲಕ್ಕುನ ಮಾತಾ ಲಕ್ಷಣೊಲು ತೋಜಿದ.
ದೇಶೊಡೊರ್ಮೆ ಕುಸಿ ಇಪ್ಪುನ ಪೊರ್ತುಡು ಶಾಜಹಾನ್‌ಪುರ ಜಿಲ್ಲೆದ ಧರ್ಮಗಡಪುರ ಗ್ರಾಮೊಡು ಹಿಂಸಾಚಾರ ನಡತ್‌ದ್ಂಡ್. ಕಣ್ಣಾರೆ ತೂತಿನಕ್ಲೆನ ಪ್ರಕಾರ ಸುರ್ಜೀತ್ ಪನ್ಪಿನ ಆಣ್ ಭಾರತೀಯ ಸೇನೆದ ಬೇಲೆಗ್ ಆಪಿನ ತಾಂಗ್ ಕೊರೊಂದು “ಹಿಂದೂಸ್ತಾನ್ ಜಿಂದಾಬಾದ್ ಪಾಕಿಸ್ತಾನ್ ಮುರ್ದಾಬಾದ್” ಪನ್ದ್ ಘೋಷಣೆ ಲೆತ್ತೊಂದುಪ್ಪುನಗ ಮೊಹೀದ್ ಖಾನ್ ಬೊಕ್ಕ ವಸೀಮ್ ಪನ್ಪಿನ ಇರ್ವೆರ್ ಸುರ್ಜೀತ್‌ಗ್ ಬೀಸತ್ತಿ ಪಾಡ್ದೆರ್.
ಎಲ್ಯ ಪ್ರಾಯೊದ ಆಣಗ್ ಬೀಸತ್ತಿ ಪಾಡಿನ ಪಾಕಿಸ್ತಾನೊಗು ಪುಟ್ಟಿನ ಇರ್ವೆರ್ ಕೆಂಗುಡೆರೆನ್ ಊರುದಕುಲು ಅಪಗನೇ ಪತ್ತ್‌ದ್ ಸಮ ಪೊಲಿ ಪಾಡ್ದ್ ಪೋಲೀಸೆರೆಗ್ ಓಪ್ಯಾದೆರ್.
ಸುರ್ಜೀತ್‌ನ್ ಅಪಗನೇ ಮುಟ್ಟದ ಆಸ್ಪತ್ರೆಗ್ ಲೆತೊಂದು ಪೋದಿತ್ತ್‌ದ್, ಇತ್ತೆ ಮರ್ದ್ ನಡತೊಂದುಂಡು. ಪಾಡಾಯಿರ್ದ್ ಪಿದಯಿ ಉಲ್ಲೆ ಪನ್ದ್ ತೆರಿದ್ ಬೈದ್ಂಡ್.
ಪೋಲೀಸೆರ್ ಊರ್‌ಡ್ ಶಾಂತಿ ಒರಿತೊನರೆ ಬೋಡಾಪಿನ ಕ್ರಮ ಗೆತೊಂದು, ಆರೋಪಿಲಿರ್ವೆರೆನ ಜಡ್ತೆ ಮಲ್ತೊಂದುಲ್ಲೆರ್.