Last updated on June 21st, 2025 at 04:05 pm
ಸುಳ್ಯ, ಜೂನ್ 21: “ಕರಿನ ಕೆಲ ತಿಂಗೊಳುಗು ದುಂಬು ಮಡಿಕೇರಿಡ್ ನಡತಿನ ಒಂಜಿ ಕೊರಗಜ್ಜ ದೈವದ ಕೋಲ ಬಿರಿಪುನ ಪೊರ್ತುಡು ಅಡೆ ಬತ್ತಿನ ಜೋಕುಲೆನೊಟ್ಟುಗು ಯಾನ್ ನಲಿತ್ದಿತ್ತೆ, ಬೊಕ್ಕ ಸಾಮಾಜಿಕ ಬಲೆತ್ತಾನೊಡು ವೀಡಿಯೋ ವೈರಲ್ ಆದ್ ಎನ್ನ ಬಗೆಟ್ ಬೇತೆ ಬೇತೆ ರೀತಿದ ಚರ್ಚೆಲೆಗ್ ನೆವನ ಆತಿನ ವಿಷಯೊಡು ಯಾನ್ ಸಮುದಾಯೊದ ಮಾತಾ ಭಾಂಧವೆರೆಡ ಅಂಚೆನೇ ಭಕ್ತೆರೆಡ ಎನರ್ದ್ ಆತಿನ ತಪ್ಪುಗು ಮಾಪು ನಟ್ಟುವೆ ಪನ್ದ್ ದೈವ ನರ್ತಕೆ ಜಯರಾಮ ಬೊಳಿಯಮಜಲ್ ಇನಿ, ಜೂ. 21 ಕ್ ಸುಳ್ಯಡ್ ನಡತಿನ ಪತ್ರಿಕಾಗೋಷ್ಠಿಡ್ ಪನ್ಡೆರ್.
ಈ ಪೊರ್ತುಡು ಪಾತೆರ್ನ ಆರ್ ಯಾನ್ ನಲಿಕೆ ಸಮುದಾಯೊದಾಯೆ, ಯಾನ್ ಪಾಕ ವರ್ಸೊರ್ದಿಂಚಿ ಬೂತ ಕಟ್ಟುನ ಚಾಕಿರಿ ಮಲ್ತೊಂದುಲ್ಲೆ, ಉಂದು ದುಂಬುದ ಕಟ್ಟ್ ಪ್ರಕಾರ ನಡತ್ ಬೈದ್ಂಡ್.
ಕೆಲ ತಿಂಗೊಲುಗು ದುಂಬು ಮಡಿಕೇರಿಡ್ ಯಾನ್ ಒಂಜಿ ಕೊರಗಜ್ಜ ಸಾನಿಧ್ಯೊಡು ಕೊರಗಜ್ಜಗ್ ನೇಮ ಕಟ್ಟ್ದಿತ್ತ್ದ್ ಮಾತಾ ಕಟ್ಟ್ ಕಟ್ಲೆಲೆನ ಪ್ರಕಾರ ನೇಮ ನಡತ್ದ್ಂಡ್. ಆಂಡ ದೈವೊದ ವಿರಾಮೊದ ನಲಿಕೆಡ್ ಅಲ್ಪದ ಕೆಲ ದೈವ ಭಕ್ತ ಜೋಕುಲು ಎನ್ನೊಟ್ಟುಗು ಪಜ್ಜೆ ಪಾಡ್ದೆರ್. ಕಟ್ಟ್ ಕಟ್ಲೆಲೆನ ಪ್ರಕಾರ ಈ ನಡಕೆ ತಪ್ಪಾದಿತ್ತ್ಂಡಲಾ, ಅಕುಲು ಮಲ್ತಿನ ಎಂಕ್ ಸಮ ತೋಜಿಜಿಂಡಲಾ, ಅಲ್ಪದ ಮುಖ್ಯಸ್ಥೆರ್, ಮಧ್ಯಸ್ಥೆರ್ ಈ ಬಗೆಟ್ ದಾಲ ಅಡ್ಡ ಬರಂದಿನೆರ್ದಾವರ, ಯಾನ್ಲಾ ಜೋಕುಲೆನ ಮನಸ್ಸ್ಗ್ ಬೇನೆ ಮಲ್ಪುನು ಸಮ ಅತ್ತ್ ಪನ್ದ್ ಅಕುಲು ಎನ್ನ ಒಟ್ಟುಗು ನಲಿಪುನಗ ಮನಿಪಂದೆ ಇತ್ತೆ.
ಆ ದಿನೊತ ಪರಿಸ್ಥಿತಿಡ್ ಕೊರಗಜ್ಜನ್ ಆವಾಹನೆ ಮಲ್ತೊಂದಿನ ಎಂಕ್ ಪುಲ್ಲಿಯರ್ಲೆ ಪ್ರಾಯೊದ ಜೋಕುಲು ಎನ್ನೊಟ್ಟುಗು ಪಜ್ಜೆ ಪಾಡ್ನಗ ಉಂದು ತಪ್ಪು ಪನ್ದ್ ಪನ್ಯೆರ ದೈವಿಚ್ಛೆನಾ ದಾದನಾ ಪನ್ಪಿಲೆಕ ಪನ್ಯೆರಾಯಿಜಿ.
ಆಂಡ ಈ ಒಂಜಿ ಅಚಾತುರ್ಯ ನಡತಿಬೊಕ್ಕ ಸಾಮಾಜಿಕ ಬಲೆತ್ತಾನೊಡು ದಿನೋಲಾ ಎನ್ನ ತೇಜೋವಧೆ ಮಲ್ತೊಂದುಲ್ಲೆರ್. ಎನ್ನ ಖಾಸಗಿ ಬದ್ಕ್, ಬಂಜಿದ ಪಡಿನೇ ಟಾರ್ಗೆಟ್ ಮಲ್ತ್ದ್ ಇಂಟರ್ನೆಟ್ಡ್ ವೈರಲ್ ಮಲ್ತೊಂದುಲ್ಲೆರ್.
ಎನ್ನ ಸಮುದಾಯೊದ ಜನೊಕುಲು, ದೈವೊದ ಚಾಕಿರಿ ಮಲ್ಪುನ ಬೇತೆ ಸಮುದಾಯೊದಕುಲು, ದೈವಭಕ್ತೆರ್ ಎನ್ನ ಮಿತ್ತ್ ಇಜ್ಜಂದಿನ ಆರೋಪೊಲೆನ್ ಮಲ್ತೊಂದುಲ್ಲೆರ್. ಉಂದೆರ್ದಾವರ ಎಂಕ್ ಈ ಬೇಲೆನೇ ಬೊರ್ಚಿ ಪನ್ದ್ ಎನ್ನೊಂದುಂಡು. ಒಂಜಿ ಕಡೆಟ್ ಕಟ್ಟ್ಕಟ್ಲೆಲು, ಒಂಜಿ ಕಡೆಟ್ ದೈವ ಭಕ್ತ ಸಮಾಜ, ಕುಡೊಂಜಿ ಕಡೆಟ್ ಪಾಪದ ಜೋಕುಲು, ಎರೆನಗ್ಲಾ ಬೇನೆ ಆವಂದಿಲೆಕ ಮಲ್ಪೆರ ಪೋದು ಬಂಙ ಬರೊಂದುಲ್ಲೆ. ಈ ಬಗೆಟ್ ಎಂಕ್ ಬೋಡಾಪಿನಕ್ಲೆಡ ಯಾನ್ ಚರ್ಚೆ ಮಲ್ತಿತ್ತ್ದ್, ಮಾಧ್ಯಮೊಲೆನ ಮುಕೇನ ಸಮಾಜೊದ, ಸಮುದಾಯೊದ ಜನಟ ಮಾಪು ನಟ್ಟ್ದ್ ಎನ್ನ ಉಡಲ್ ಹಗುರ ಮಲ್ತೊನರೆ ಪನ್ದಿತ್ತ್ದ್, ಎನ್ನ ಈತ್ ವರ್ಸೊದ ವೃತ್ತಿ ಜೀವನೊಡು ಒವ್ವೇ ಕಪ್ಪು ಚುಕ್ಕೆ ಇಜ್ಜಂದೆ ಇತ್ತ್ದ್, ಮುರಾನಿದ ನಡಕೆರ್ದಾವರ ದೈವೊಲೆನ ಕಟ್ಟ್ಕಟ್ಲೆಲೆಗ್, ದೈವಸಾನೊಲೆನ ಗಾಂಭೀರ್ಯತೆಗ್, ದೈವಾಭಿಮಾನಿಲೆನ ಗೌರವೊಗು ಕುಂದೆಲ್ ಬತ್ತಿತ್ತ್ಂಡ ಅವೆಕ್ ಯಾನ್ ಎದುರುಪಿರ ಪಾತೆರಂದೆ ಸಮಾಜೊದ, ಸಮುದಾಯೊದ ಮಾಪು ನಟ್ಟೊಂದುಲ್ಲೆ. ನನ ದುಂಬಗ್ ಕಟ್ಟ್ಕಟ್ಲೆಲೆನ್ ದಂಟಂದೆ, ದೈವೊಲೆನ ಘನತೆ ಗೌರವೊನು ಒರಿತೊನರೆ ಜೀವನ ಪೂರ್ತಿ ಪುನೆಪೆ ಪನ್ದ್ ಪನ್ಡೆರ್.
ಪತ್ರಿಕಾಗೋಷ್ಠಿಡ್ ಅನಿಲ್ ಕನಕಮಜಲ್ ಒತ್ತುಪಾಲ್ ಇತ್ತೆರ್.