Last updated on June 23rd, 2025 at 06:51 pm
ಬೆದ್ರ: ಮತಿ ಸಮದಾಂತೆ ಕರಿನ 36 ವರ್ಸೊಗು ದುಂಬು ಇಲ್ಲ್, ಊರ್ ಬುಡ್ದ್ ದೂರ ಪೋದಿತ್ತಿನ ಇಲ್ಲದ ಮಲ್ಲ ಮಗೆ ಕಡೇಕ್ಲಾ ಇಲ್ಲ್ ಸೇರ್ದಿತ್ತ್ದ್, ಮಗಕ್ ಕಾತ್ದ್ ಕುಲ್ದಿತ್ತಿನ ಅಪ್ಪೆನ ಮಟ್ಟೆಲ್ ಸೇರ್ದೆರ್.
ಇರುವೈಲ್ ಗ್ರಾಮೊದ ಕೊನ್ನೆಪದವು ಮುಟ್ಟದ ಮಧುವನಗಿರಿತ ಚಂದ್ರಶೇಖರ್ (ಚಂದ್ರು) 36 ವರ್ಸೊಗು ದುಂಬು ಬೇಲೆಗ್ ಪನ್ದ್ ದೂರೊದ ಮುಂಬೈಗ್ ಪೋದಿತ್ತೆರ್. ಸುಮಾರ್ 7 ತಿಂಗೊಲು ಓಲೆ ಬರೆಯೊಂದು, ಇಲ್ಲದಕಲೆನ ಸಂಪರ್ಕೊಡು ಇತ್ತಿನ ಆರ್, ಅವೆರ್ದ್ ಬೊಕ್ಕ ಏರೆನಲಾ ಸಂಪರ್ಕೊಗು ತಿಕ್ಕಂದೆ ದೂರ ಆದಿತ್ತೆರ್. ಮುಂಬೈಡ್ 6 ತಿಂಗೊಳು ಅಂಚಿಂಚಿ ಬೇಲೆ ಮಲ್ತೊಂದಿತ್ತಿನ ಚಂದ್ರಶೇಖರ್ ಮಾನಸಿಕ ಅನಾರೋಗ್ಯರ್ದಾವರ, ದೇಲಂತಡೆ ಮಂದಿರೊಲೆನ ಕೈತಲೆ ತಿರ್ಗೊಂದಿತ್ತೆರ್. ಇಲ್ಲದಕುಲೆನ್, ಊರ್ನ್ ಮದತ್ ಪೋಪಿನಾತ್ ಆರೆನ ಮಾನಸಿಕ ಆರೋಗ್ಯ ತೆಟ್ಟ್ದಿತ್ತ್ಂಡ್.
ಮರಾಠಿ ಇಲ್ಲದಕಲೆನ ಆಶ್ರಯ:
ಚಂದ್ರು ಮುಂಬೈದ ಮಂದಿರ, ಊರ್ ಕೇರಿಲೆಡ್ ತಿರ್ಗೊಂದು 10 ವರ್ಸ ಕರಿತೆರ್. ಕರಿನ 25 ವರ್ಸೊಗು ದುಂಬು ಚಂದ್ರಶೇಖರ್ರೆನ ಪರಿಸ್ಥಿತಿನ್ ತೂದು ಬಾಲು ಕಾಂಬ್ಳೆ ಪನ್ಪಿನ ಮರಾಠಿ ಇಲ್ಲದಕುಲು, ಆರೆನ್ ತನ್ಕುಲೆ ಇಲ್ಲಗ್ ಲೆತೊಂದು ಪೋದು, ಬೋಡಾಪಿನ ಮರ್ದ್ ಮಲ್ತೆರ್. ಅವೆರ್ದ್ ಬೊಕ್ಕ ಆರೆನ ಮಾನಸಿಕ ಆರೋಗ್ಯ ಒಂಜಿ ಮಟ್ಟ್ಗ್ ಸಮ ಆವೊಂದು ಬನ್ನಗ, ಹೊಟೇಲ್ಡ್ ಬೇಲೆಗ್ ಸೇರೊಂಡೆರ್. ಬೇಲೆದ ಒಟ್ಟುಗು ರಾತ್ರೆ ಶಾಲೆಗ್ ಪೋದು ಬರವು ಕಲ್ಪೆರ ಪತ್ಯೆರ್. ಆರೆಗ್ ಇಲ್ಲದ ಒವ್ವೇ ನೆಂಪುದಾಂತಿನೆರ್ದಾವರ ಇಂಚಿ ಇರುವೈಲ್ಡ್ ಇಲ್ಲದಕುಲು ಇಲ್ಲದ ಮಲ್ಲಮಗನ್ ನಾಡುನ ಪಾಕ ಪುನೆಪು ಬತ್ತ್ಂಡಲಾ, ನಾಡ್ಯೆರಾದಿಜ್ಜಂಡ್.
ಪಲಿತ್ಂಡ್ ದೈವ ಕೊರ್ನ ನುಡಿ
ಗೋಪಿ ಪನ್ಪಿನಾರೆನ ಮೂವೆರ್ ಆಣ್ಜೋಕುಲು, ಇರ್ವೆರ್ ಪೊಣ್ಣು ಜೋಕುಲೆಡ್ ಮಲ್ಲಾರ್ ಚಂದ್ರಶೇಖರ್. ಆರ್, ಇಲ್ಲದಕಲೆನೊಟ್ಟುಗು ಪಾತೆರಗ್ ತಿಕ್ಕಂದಿ ಬೊಕ್ಕ ಇಲ್ಲದಕುಲು ಪಾಕ ಪರಕೆಲೆನ್ ಪನ್ದಿತ್ತೆರ್. ಕೆಲ ತಿಂಗೊಲುಗು ದುಂಬು ನಡತಿನ ಮಂತ್ರಜಾವದೆನ ದರ್ಶನೊದ ಪೊರ್ತುಡು ಮಗೆ ಬದ್ಕ್ದುಲ್ಲೆ. ನನ ನಡಪಿನ ದರ್ಶನೊಡು ದೈವದ ಚಾಕಿರಿ ಮಲ್ಲ ಮಗನ ಕೈರ್ದೇ ನಡಪುಂಡು ಪನ್ದ್ ಅಪ್ಪೆ ಮಂತ್ರಜಾವದೆನ ಅಭಯ ಆದಿತ್ತ್ಂಡ್. ಅವೆರ್ದ್ ಬೊಕ್ಕ ಇರುವೈಲ್ ಮುಟ್ಟದ ಕುಪ್ಪೆಟ್ಟುಡ್ ನಡತಿನ ಬ್ರಹ್ಮಕಲಶದ ಪೊರ್ತುಡು ಮುಂಬೈಡ್ ಇಪ್ಪುನ ಊರ್ದಾರ್ ಒರಿ ಚಂದ್ರಶೇಖರ್ರೆನ ಬಗೆಟ್ ಒಲವು ಕೊರ್ದಿತ್ತ್ದ್, ಅವೆರ್ದ್ ಬೊಕ್ಕ ಆರೆನ್ ಸಂಪರ್ಕ ಮಲ್ಪೆರ ಊರುದಕುಲು, ಮುಂಬೈಡ್ ಇಪ್ಪುನ ಗುರ್ತದಕುಲು ಮಾತ ಪುನೆಪು ಬೈದೆರ್. ಎಂಚಲಾ ಕಡೆಕ್ ಆರೆಗ್ ಆಶ್ರಯ ಕೊರ್ತಿನ ಇಲ್ಲದಕ್ಲೆನ ಫೋನ್ ನಂಬರ್ ತಿಕ್ಕ್ದ್, ಅಕ್ಲೆಡ ಪಾತೆರ್ದೆರ್. ಆರೆನ ಇಲ್ಲದಕ್ಲೆನ ಒಟ್ಟುಗು ಆರೆನ್ ಗೋಡ್ಯಾಯೆರೆ ಕಾಂಬ್ಳೆ ಕುಟುಮದಕುಲು ಪಾಕ ಸರ್ತಿ ವ್ಯವಸ್ಥೆ ಮಲ್ತಿತ್ತ್ಂಡಲಾ, ಚಂದ್ರಶೇಖರ್ ಊರ್ಗ್ ಬರ್ಯೆರ ಸಾಧ್ಯ ಆದಿತ್ತಿಜಿ. ಆಂಡ ಕಡೆಕ್ಲಾ ಈ ಸರ್ತಿ ಮೇ 29 ದಾನಿ ನಡತಿನ ದೈವ ದರ್ಶನೊದ ಮೂಜಿ ದಿನೊಕು ದುಂಬು ಇಲ್ಲಗ್ ಎತ್ತ್ದೆರ್. ಇಡೆ ಬರ್ಪಿನೇಟಲಾ ಆರೆನ ಮಾನಸಿಕ ಆರೋಗ್ಯಡ್ ಒಂತೆ ಎಚ್ಚಿಕಮ್ಮಿ ಇತ್ತ್ದ್, ಇತ್ತೆ ಇಲ್ಲಗ್ ಬತ್ತಿ ಬೊಕ್ಕ ಉಷಾರಾವೊಂದುಲ್ಲೆರ್.