Last updated on July 12th, 2025 at 03:14 pm
ಬೊಲ್ತೇರ್, ಜುಲೈ 12: ಬೊಲ್ತೇರ್ ಶಾಸಕೆ ಹರೀಶ್ ಪೂಂಜೆರೆಗ್ ಹೈಕೋರ್ಟ್, ಒವ್ವೇ ರೀತಿದ ಪಗೆತ ಭಾಷಣ ಮಲ್ಪಂದಿ ಲೆಕ ಎಚ್ಚರ್ಗೆ ಕೊರ್ತುಂಡು.
ಧರ್ಮೊಲೆ ನಡುಟು ಲಡಯಿ ಪುಟ್ಟಾವೆರ್, ಮುಸ್ಲಿಂ ಸಮುದಾಯೊನು ಎಲ್ಯೆ ಮಲ್ತ್ದ್ ಭಾಷಣ ಮಲ್ಪುವೆರ್ ಪನ್ದ್ ಬೊಲ್ತೇರ್ ಶಾಸಕೆ ಹರೀಶ್ ಪೂಂಜೆರೆನ ಮಿತ್ತ್ ದಾಕಲಾತಿನ ಎಫ್ಐಆರ್ಗ್ ಹೈಕೋರ್ಟ್ ಕೊರ್ತಿನ ತಡೆಯಾಜ್ಞೆನ್ ದೆಪ್ಪೊಡು ಪನ್ದ್ ದೂರುದಾರೆ ಇಬ್ರಾಹಿಂ ಪರವಾದ್ ಪೆರಿಯ ವಕೀಲೆ ಎಸ್ ಬಾಲನ್ ಹೈಕೋರ್ಟ್ಗ್ ಅರ್ಜಿ ಸಂದಾದಿತ್ತೆರ್. ಇನಿ ಹೈಕೋರ್ಟ್ಡ್ ಹರೀಶ್ ಪೂಂಜೆರ್ ಸಂದಾಯಿನ ಅರ್ಜಿ ವಿಚಾರಣೆಗ್ ಬತ್ತಿತ್ತ್ಂಡ್.
ಸರ್ಕಾರೊದ ವಕೀಲೆರ್ ಬೊಕ್ಕ ಅರ್ಜಿದಾರೆರೆ ವಕೀಲೆರೆ ಬಿನ್ನಪುಗು, ಹರೀಶ್ ಪೂಂಜೆರೆ ಮಿತ್ತ್ ದಾಕಲಾತಿನ ಅಪರಾಧೊಲೆನ್ ದುಂಬರಿಪೆರೆ ಬಲ್ಲಿ ಪನ್ಪಿ ಷರತ್ತ್ಡ್ ಹರೀಶ್ ಪೂಂಜೆರೆ ವಿರುದ್ಧೊದ ಮಧ್ಯಂತರ ಆದೇಶೊನು ವಿಸ್ತರಿತ್ದ್ಂಡ್ ಪನ್ದ್ ನ್ಯಾಯೊತಡೆ ಆದೇಶ ಕೊರ್ತುಂಡು. ವಿಚಾರಣೆ ಸುರು ಆವೊಂದಿತ್ತಿಲೆಕನೆ ಅರ್ಜಿದಾರೆರೆ ಪರ ವಕೀಲೆರ್ ಕಾಲಾವಕಾಶ ಕೇನರೆ ಪತ್ಯೆರ್. ಉಂದೆಕ್ ಆಕ್ಷೇಪ ಮಲ್ತಿನ ದೂರುದಾರೆ ಎಸ್ ಬಿ ಇಬ್ರಾಹಿಂ ಪರ ವಕೀಲೆ ಎಸ್ ಬಾಲನ್ ಮೇರ್ “ಮುಸ್ಲಿಮ್ ಸಮುದಾಯೊನು ಪೀಡೆದ ಲೆಕ ತೋಜಾವುನ ಬೇರೆನ್ ಹರೀಶ್ ಪೂಂಜಾ ಮಲ್ತೊಂದೆ ಉಲ್ಲೆರ್. ಮಧ್ಯಂತರ ಆದೇಶ ಇಪ್ಪುನೆನ್ ಗಲಸೊಂದು ಹರೀಶ್ ಪೂಂಜೆ ಅಕ್ರಮ ಬೇಲೆಲೆನ್ ಮಲ್ತ್ಂದುಲ್ಲೆರ್. ಆರೆನ ಮಿತ್ತ್ ಏಲ್ ಎಫ್ಐಆರ್ ಉಂಡು. ನ್ಯಾಯಕತಡೆ ಉಂದೆನ್ ಪರಿಗಣಿಪೊಡು” ಪನ್ದ್ ಪನ್ಡೆರ್.
ಉಂದೆನ್ ಒಪ್ಪಿನ ನ್ಯಾಯಂತಡೆ “ನನದ ವಿಚಾರಣೆ ಮುಟ್ಟ ಹರೀಶ್ ಪೂಂಜೆರ್ ಒವ್ವೇ ರೀತಿದ ಆರೋಪಿತ ಅಪರಾಧೊಲೆಡ್ ಪಾಲ್ಪಡೆಪುಜೆರ್ ಪನ್ದ್ ಆದೇಶೊಡು ದಾಕಲಿಪ” ಪನ್ದ್ ಪನ್ಡ್ನ್ಡ್.