Last updated on July 13th, 2025 at 09:52 am
ಕುಡುಮ, ಜು. 13: ಧರ್ಮಸ್ಥಳ ಪ್ರಕರಣೊಗು ಸಂಬಂಧಿತ್ದ್ ಯೂಟ್ಯೂಬ್ ವಿಡಿಯೋ ಮಲ್ದಿನ ಯೂಟ್ಯೂಬರ್ ಸಮೀರ್ ಎಂ ಡಿ ನ ಮಿತ್ತ್ ಧರ್ಮಸ್ಥಳ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.
ಈ ಪ್ರಕರಣೊಡು ಸಾಕ್ಷಿ ದೂರುದಾರೆರ್ ತನ್ನ ಒಯಿಲ್ಡ್ ಅಂಚೆನೇ ನ್ಯಾಯಂತಡೆದ ಎದುರು ಪನ್ತಿನ ಒಲವುಲೆನ್ ಬುಡ್ದು, ಸಾಕ್ಷಿ ದೂರುದಾರೆರೆ ಬಗೆಟ್ ಅಂಚೆನೇ ಪ್ರಕರಣೊದ ಬಗೆಟ್ ಬೇತೆ ಎಚ್ಚಿನ ಒಲವುಲು ಇತ್ತಿನ ಕಾಲ್ಪನಿಕವಾದ್ (AI) ಉಂಡು ಮಲ್ದಿನ, ಕಲು ಒಲವು ಇತ್ತಿನ ವಿಡಿಯೋನು ಯೂಟ್ಯೂಬ್ ಚಾನೆಲ್ಡ್ ಪ್ರಸಾರ ಮಲ್ತ್ದ್, ಬೋಡು ಬೋಡೂಂದೇ ಸಾರ್ವಜನಿಕೆರ್ ಉದ್ರೇಕ ಆಪಿನಲೆಕ ಮಲ್ದಿನೆರ್ದಾವರ ಸಮೀರ್ ಎಂ.ಡಿ ಪನ್ಪಿನ ಯೂಟ್ಯೂಬರ್ನ ಮಿತ್ತ್ ಧರ್ಮಸ್ಥಳ ಪೊಲೀಸ್ ಸ್ಟೇಶನ್ಡ್ ಅ.ಕ್ರ : 42/2025 ಕಲಂ: 192, 240, 353(1)(b) bNS ದ ಪ್ರಕಾರ ಪ್ರಕರಣ ದಾಕಲಾತ್ಂಡ್ ಪನ್ದ್ ಪೊಲೀಸ್ ಇಲಾಖೆ ಪ್ರಕಟಣೆಡ್ ತೆರಿಪಾದ್ಂಡ್.
ಆತೇ ಅತ್ತಂದೆ ಧರ್ಮಸ್ಥಳ ಪೊಲೀಸ್ ಸ್ಟೇಶನ್ದ 39/2025 ಪ್ರಕರಣೊಗು ಸಂಬಂಧಿತ್ದ್, 11.07.2025 ತಾನಿ ಒಂಜಿ ಪ್ರಕರಣ ದಾಕಲಾದಿತ್ತ್ದ್, ರಡ್ಡ್ ಬೇತೆ ಬೇತೆ ವಿಚಾರಣೆಲೆನ್ಲಾ ಸುರು ಮಲ್ದೆರ್. 11.07.2025 ತಾನಿ ಸಾಕ್ಷಿ ದೂರುದಾರೆರೆ ಪರವಾದ್ ವಕೀಲೆರ್ ಪತ್ರಿಕಾಗೋಷ್ಠಿಡ್ ಪನ್ತಿನ ಕೆಲ ಪಾತೆರೊಲು ವಾಸ್ತವಿಕವಾದ್ ತಪ್ಪಾತ್ಂಡ್ ಪನ್ದ್ ಪೊಲೀಸೆರ್ ತೆರಿಪಾದಿತ್ತ್ದ್, ಈ ಪ್ರಕರಣೊದ ತನಿಖಾಧಿಕಾರಿನ್ ಪಗಪೆರ ಅತ್ತ್ಂಡ ಪ್ರಕರಣೊದ ಜಡ್ತೆಗ್ ವಿಶೇಷ ಜಡ್ತೆ ಕೂಟ (SIT) ಉಂಡುಮಲ್ಪುನ ಸಾರ್ವಜನಿಕ ಹಿತಾಸಕ್ತಿದ ಪುದರ್ಡ್ ಕೆಲ ಕೂಪೆಲೆನ್ ಪ್ರತಿನಿಧಿಪುನಕುಲು ಪಾತೆರೊಂದಿತ್ತ್ದ್, ಈ ಬಗೆಟ್ ಸಾಕ್ಷಿ ದೂರುದಾರೆರೆ ವಕೀಲೆರೆಗ್ ತೆರಿದ್ಂಡಾ ಪನ್ಪಿನೆನ್ ಅಂಚೆನೇ ಈ ಬಗೆಟ್ ಸಾಕ್ಷಿ ದೂರುದಾರೆರ್ ದಾದ ಪನ್ಪೆರ್ ಪನ್ಪಿನೆನ್ ತೆರಿಯೊನೊಡಾಪುಂಡು ಪನ್ದ್ ಪತ್ರಿಕಾ ಪ್ರಕಟಣೆಡ್ ತೆರಿಪಾದ್ಂಡ್.