Last updated on July 14th, 2025 at 03:01 pm
ಮಹಾರಾಷ್ಟ್ರ, ಜು. 14: ಇಂಚಿಪ ಮಹಾರಾಷ್ಟ್ರಡ್ ಶಿವಸೇನಾದ ಶಾಸಕೆ ಸಂಜಯ್ ಗಾಯ್ಕ್ವಾಡ್ ಪನ್ಪಿನಾಯೆ, ತುಳುನಾಡ್ರ್ದ್ ಬೊಂಬೈಗ್ ಪೋದು ಬದ್ಕ್ ಕಟೊಂದು, ಕುಡೊರ್ಯನ ಬದ್ಕ್ ಕಟ್ಟಾವುಲೆಕ ಬುಲೆದ್, ಅಲ್ಪದ ವೈವಾಟ್, ಆರ್ಥಿಕತೆಗ್ ಪಾಕ ಸಕಾಯ ಮಲ್ದಿನ ಶೆಟ್ಟಿ ಸಮುದಾಯೊದ ಬಗೆಟ್, ಮಹಾರಾಷ್ಟ್ರದ ಸಂಸ್ಕೃತಿನ್ ಹಾಳ್ ಮಲ್ದಿನ ಶೆಟ್ಟಿನಕುಲು, ಮಹಾರಾಷ್ಟ್ರದ ಜನೊಕುಲೆನ ಜೂವನೊಡು ಗೊಬ್ಬೊಂದುಲ್ಲೆರ್ ಪನ್ಪಿ ಆರೋಪ ಮಲ್ತೊಂದುಲ್ಲೆರ್.
ಜುಲೈ 9 ದಾನಿ ಆಕಾಶವಾಣಿ ಹೋಟೆಲ್ಡ್ ತೆನಸ್ ಸಮ ಇಜ್ಜಿ ಪನ್ದ್ ಸಿಬ್ಬಂದಿಗ್ ತಾರಾಮರ ಆಕಿನೆತ ಮನದಾನಿ, ಶಾಸಕೆ ಶೆಟ್ಟಿ ಸಮುದಾಯೊದ ಬಗೆಟ್ ಇಂಚ ವಿವಾದೊದ ಪಾತೆರ ಪನ್ತೆರ್. ಮಹಾರಾಷ್ಟ್ರಗ್ ಬತ್ತ್ದ್ ಮುಲ್ಪದ ಸಂಸ್ಕೃತಿನ್ ಹಾಳ್ ಮಲ್ದಿನ ಶೆಟ್ಟಿನಕುಲೆನ ಬಗೆಟ್ ದಾಯೆ ಏರ್ಲಾ ಪಾತೆರುಜರ್? ಡಾನ್ಸ್ ಬಾರ್, ಲೇಡೀಸ್ ಬಾರ್ ಮಾತಾ ನಡಪಾವೊಂದು ಮಹಾರಾಷ್ಟ್ರಡ್ ಭ್ರಷ್ಟಾಚಾರ ಬುಲೆಪಾವೊಂದುಲ್ಲೆರ್. ಬಾಳಾಸಾಹೇಬ್ ಠಾಕ್ರೆಲಾ ಉಂದೆತ ವಿರುದ್ಧ ಇತ್ತೆರ್. ಮುಲ್ಪದ ಜವನೆರೆನ್ ಬೊಕ್ಕ ಜನೊಕ್ಲೆನ ವೈವಾಟ್ನ್ ಶೆಟ್ಟಿನಕುಲು ಹಾಳ್ ಮಲ್ದೆರ್. ಅಕ್ಲೆನ ಬಗೆಟ್ ದಾಯೆ ಏರ್ಲಾ ಪಾತೆರುಜರ್ ಪನ್ದ್ ಪನೊಂದು ತಾನ್ ಮಲ್ದಿನ ತಪ್ಪುನು ಮುಚ್ಚೆರೆ ಶೆಟ್ಟಿ ಸಮುದಾಯೊದ ಮಿತ್ತ್ ಆರೋಪ ಮಲ್ತ್ದೆರ್.
ಇಡೀಯ ಮುಂಬೈ, ಮಹಾರಾಷ್ಟ್ರ ಬುಲೆಯೆರ ತುಳುವೆರೆ ನೆವನ ಅತ್ತಂದೆ ಇಪ್ಪು, ಆಂಡ ಇನಿತ ಮಹಾರಾಷ್ಟ್ರದ ಬುಲೆಚ್ಚಿಲ್ಡ್ ತುಳುವ ಶೆಟ್ಟಿನಕುಲೆನ ಪಾಲ್ಲಾ ಉಂಡು. ಇನಿತ ದಿನೊಟು ಸುಮಾರ್ 10 ಲಕ್ಷರ್ದ್ ಎಚ್ಚ ಜನ ಶೆಟ್ಟಿನಕುಲು ಮುಂಬೈಡೇ ಉಲ್ಲೆರ್. ಮುಂಬೈಡ್ 6000 ರ್ದ್ ಎಚ್ಚಿನ ಹೋಟೆಲ್, ರೆಸ್ಟೋರೆಂಟ್ಲೆನ್ ಶೆಟ್ಟಿನಕುಲು ಪಡಪಾವೊಂದುಲ್ಲೆರ್. ಲಕ್ಷಗಟ್ಲೆ ಬೇಲೆಲೆನ್ ಶೆಟ್ಟಿನಕುಲು ಉಂಡು ಮಲ್ದೆರ್.
ಮಹಾರಾಷ್ಟ್ರದ ರಾಜಕಾರಣೊಡ್ಲಾ ಶೆಟ್ಟಿನಕುಲು ಉಲ್ಲೆರ್. ಶಾಸಕೆರ್, ಸಂಸದೆರಾದ್ ರಾಜ್ಯೊಗು ಬೇಲೆ ಮಲ್ದಿನಕುಲುಲ್ಲೆರ್. ನನ ಚಿತ್ರರಂಗೊದ ವಿಷಯ ಮಾತೆರೆಗ್ಲಾ ತೆರಿನವೇ.
ಇಂಚ ಬೇತೆ ಬೇತೆ ಕ್ಷೇತ್ರೊಲೆಡ್ ಮಹಾರಾಷ್ಟ್ರದ ಸಂಸ್ಕೃತಿ, ಆರ್ಥಿಕತೆಗ್ ಬೆರಿತಾಂಗ್ ಆದ್ ಉಂತುದಿನ ಶೆಟ್ಟಿ ಸಮುದಾಯೊದ ಬಗೆಟ್ ಇಂಚಿನ ಪಾತೆರೊಲೆನ್ ಕೇನ್ದ್ ಇಡೀಯ ಶೆಟ್ಟಿ ಸಮಾಜ ಆಕ್ರೋಶ ತೂಪಾವೊಂದುಲ್ಲೆರ್.