Last updated on July 26th, 2025 at 04:12 pm
ಒಡಿಪು, ಜು. 26: ಕಡಿಯಾಳಿ ಮಹಿಷಮರ್ದಿನಿ ದೇಲಕತಡೆದ ಮುಖ್ಯ ದ್ವಾರಡ್ ಇನಿ ಶನಿವಾರ ಪುಲ್ಯ 3 ಗಂಟೆದ ಅಂದಾಜಿಗ್ ಕಂಡ್ಯೆರ ಬತ್ತಿನ ಇರ್ವೆರ್ ಆರೋಪಿಲೆನ್ ಸಾರ್ವಜನಿಕೆರ್ ಪತ್ತ್ದೆರ್.
ಕಲ್ವೆರ್ ದೇಲಕತಡೆದ ಎದುರುದ ಗೇಟ್ದ ಬೀಗ ಪೊಲಿಪುನಗ, ಸೆಕ್ಯೂರಿಟಿ ಗಾರ್ಡ್ ಬತ್ತಿನೆನ್ ತೂದು ಪದ್ರಾಡಾತೆರ್. ಅಕ್ಲೆನಾ ತೂದು ಭದ್ರತಾ ಸಿಬ್ಬಂದಿ ಎಚ್ಚರ್ಗೆದ ಗಂಟೆ ಬೊಟ್ಟುದೆರ್. ಕಲ್ವೆರ್ ಬೀಸತ್ತಿ ತೋಜಾದ್ ಪೋಡಿಕಟ್ಟಾದ್ ಪದ್ರಾಡಾತೆರ್. ಅಪಗನೇ ಭದ್ರತಾ ಸಿಬ್ಬಂದಿ ಮುಟ್ಟದಕ್ಲೆಗ್ ತೆರಿಪಾದೆರ್
ಸಿಸಿಟಿವಿ ದೃಶ್ಯೊಲೆನ್ ತೂನಗ, ಇರ್ವೆರ್ ಕಂಡ್ಯೆರ ತೂಪುನ ಅಂಚೆನೇ ಅಕುಲು ಬಲ್ತಿನ ಸಾದಿ ತೆರಿದ್ಂಡ್. ಈ ಒಲವುದ ಆಧಾರೊಡು, ಐಟೆ ನಾಡ್ನಗ ಕಡಿಯಾಳಿ ಪೆಟ್ರೋಲ್ ಪಂಪ್ದ ಕೈತಲ್ ಇರ್ವೆರ್ಲಾ ತಿಕ್ಕ್ದ್ ಬೂರ್ದೆರ್.
ಬಲಿಪುನಗ ಒರಿ ಕಲ್ವೆ ಕುಸ್ಕ್ದ್ ಬೂರ್ದೆ. ಕುಡೊರಿ ಆಯನ್ ಬುಡ್ದ್ ಬಲ್ತೆಂಡಲಾ ಊರ್ದಕುಲು ಆಯನ್ಲಾ ಪತ್ತ್ ದೆರ್. ಕುಸ್ಕ್ದ್ ಬೂರ್ದಿನ ಕಲ್ವಗ್, ಅಕುಲು ಕಂಡ್ಯೆರ ಕನದಿನ ಕರ್ಬದ ಸೊತ್ತು ಪತ್ತುಡ್ಪಾದ್ ಸಾರ್ವಜನಿಕೆರ್ ಪ್ರಥಮ ಚಿಕಿತ್ಸೆ ಮಲ್ತ್ದೆರ್.
ಒಲವು ತಿಕ್ಕ್ ದ್ ಜಾಗೆಗ್ ಬತ್ತಿನ ಸಮಾಜ ಸೇವಕೆ ನಿತ್ಯಾನಂದ ಒಳಕಾಡು, ಸಾರ್ವಜನಿಕೆರೆ ಸಕಾಯೊಡು ಉಸಾರ್ ತತ್ತಿನ ಕಲ್ವನ್ ಮರ್ದ್ಗ್ ಅಜ್ಜೆರೆಕಾಡ್ ಜಿಲ್ಲಾ ಆಸ್ಪತ್ರೆಗ್ ದಾಕಲ್ತ್ದೆರ್. ಕುಡೊರ್ಯನ್ ಪೊಲೀಸೆರೆಗ್ ಒಪ್ಯಾದೆರ್.
ಇರ್ವೆರ್ ಆರೋಪಿಲುಲಾ ಕೇರಳ ಮೂಲದಕುಲು ಪನ್ದ್ ಪ್ರಾಥಮಿಕ ವರದಿಡ್ ತೆರಿದ್ ಬೈದ್ಂಡ್. ಈ ಬಗೆಟ್ ಎಚ್ಚಿನ ಜಡ್ತೆ ನಡತೊಂದುಂಡು. ದೇಲಂತಡೆದ ಭದ್ರತಾ ಸಿಬ್ಬಂದಿನ ತಂಕೊನು ಮಾತಾ ಪುಗರೊಂದುಲ್ಲೆರ್.