Last updated on August 6th, 2025 at 07:13 pm
ಚಾಮರಾಜನಗರ, ಆ. 06: ಪೂರ್ವಾಶ್ರಮೊದ ಧರ್ಮ ಬೊಲ್ಪುಗು ಬತ್ತಿನೆರ್ದಾವರ ಜಕ್ಕ ಪ್ರಾಯೊದ ಸ್ವಾಮೀಜಿ ಪೀಠ ಬುಡ್ತಿನ ನಡಕೆ ಚಾಮರಾಜನಗರೊದ ಗುಂಡ್ಲುಪೇಟೆ ತಾಲೂಕ್ದ ಚೌಡಹಳ್ಳಿ ಗ್ರಾಮೊಡು ಆಗಸ್ಟ್ 3, ಐತಾರದಾನಿ ನಡತ್ದ್ಂಡ್.
ಚೌಡಹಳ್ಳಿದ ಗುರುಮಲ್ಲೇಶ್ವರ ದಾಸೋಹ ಮಠೊಟು ಕರಿನ ಒಂಜರೆ ತಿಂಗೊಲುರ್ದಿಂಚಿ ಸ್ವಾಮೀಜಿ ಆದಿತ್ತಿನ ನಿಜಲಿಂಗ ಸ್ವಾಮೀಜಿ ಮಠ ಬುಡ್ತಿನ ಜವನೆ ಸನ್ಯಾಸಿ. ಯಾದಗಿರಿ ಜಿಲ್ಲೆದ ಶಹಾಪುರ ಗ್ರಾಮೊದ ನಿಜಲಿಂಗ ಸ್ವಾಮೀಜಿ ಅಲಿಯಾಸ್ ಮಹಮ್ಮದ್ ನಿಸಾರ್(22) ಮೇರ್ ಬಸವ ಕಲ್ಯಾಣೊದ ಸ್ವಾಮೀಜಿ ಒರಿಯನ ಶಿಫಾರಸ್ಸ್ರ್ದಾವರ ಪೀಠಾಧಿಪತಿಯಾದ್ ಬತ್ತಿತ್ತೆರ್. ಬೊಕ್ಕ ಧಾರ್ಮಿಕ ಕಾರ್ಯೊಲು, ಪ್ರವಚನೊಲೆನ್ ಮಲ್ತೊಂದಿತ್ತೆರ್.
ಆ.1 ತಾನಿ ಮಠೊತ ಭಕ್ತೆ ಆಯಿನ ಗ್ರಾಮೊದ ಒರಿ ಜವನಗ್ ಸ್ವಾಮೀಜಿ ಮೊಬೈಲ್ ಕೊರ್ದಿತ್ತ್ದ್, ಮೊಬೈಲ್ಡಿತ್ತಿನ ಆರೆನ ಆಧಾರ್ ಕಾರ್ಡ್ಡ್ ಮಹಮ್ಮದ್ ನಿಸಾರ್ ಪನ್ಪಿನ ಪುದರ್ ಇಪ್ಪುನೆನ್ ಜವನೆ ತೂತೆ. ಸ್ವಾಮೀಜಿ ಮುಸ್ಲಿಂ ಪನ್ದ್ ಊರುದಕಲೆಗ್ ತೆರಿಪಾದೆ.
ಈ ಬಗೆಟ್ ವಿಚಾರಿಪುನಗ, ಯಾನ್ ಬೇತೆ ಧರ್ಮದಾಯೆ ಆಂಡಲಾ ಬಸವ ತತ್ವ ಎನನ್ ಇಂಚಿ ಒಯ್ತ್ದ್ಂಡ್, 2021ಟ್ ಲಿಂಗದೀಕ್ಷೆ ಗೆತೊಂದೆ ಪನ್ದ್ ತೆರಿಪಾದೆ. ಆಂಡ ಬೇತೆ ಧರ್ಮೊರ್ದು ಮತಾಂತರ ಆತಿನೆನ್ ದೆಂಗದ್ ದೀತಿನೆರ್ದಾವರ ಈರ್ ಪೀಠಾಧಿಪತಿ ಆದ್ ಇಪ್ಪುನ ಬೊರ್ಚಿ ಪನ್ದ್ ಗ್ರಾಮಸ್ಥೆರ್ ತಾಕೀತ್ ಮಲ್ತ್ದೆರ್.
ಗುಂಡ್ಲುಪೇಟೆ ಸ್ಟೇಶನ್ದ ಪೊಲೀಸ್ ಇನ್ಸ್ಪೆಕ್ಟರ್ ಜಯಕುಮಾರ್ ಬೊಕ್ಕ ಸಿಬ್ಬಂದಿಲು ಗ್ರಾಮೊಗು ಬತ್ತ್ದ್ ಸ್ವಾಮೀಜಿ ಬೊಕ್ಕ ಗ್ರಾಮಸ್ಥೆರೆನ ಅಭಿಪ್ರಾಯ ಕೇನ್ದೆರ್. ಗ್ರಾಮಸ್ಥೆರೆಗ್ ಇಷ್ಟ ಇಜ್ಜಂಡ ಪೀಠ ತ್ಯಾಗ ಮಲ್ಪುವೆ ಪನ್ದ್ ಮಹಮ್ಮದ್ ನಿಸಾರ್ (22) ಅಲಿಯಾಸ್ ನಿಜಲಿಂಗ ಸ್ವಾಮೀಜಿ ತೆರಿಪಾದಿತ್ತ್ದ್, ಗ್ರಾಮಸ್ಥೆರೆ ವಿರೋಧ ಇತ್ತಿನೆರ್ದಾವರ ಪೊಲೀಸೆರ್ ಸ್ವಗ್ರಾಮೊಗು ಕಡಪುಡ್ದು ಕೊರ್ತೆರ್. ಮಹಮ್ಮದ್ ನಿಸಾರ್ ಲಿಂಗದೀಕ್ಷೆ ಗೆತೊಂದಿನ ಬಗೆಟ್ ಅಂಚೆನೇ ಧಾರ್ಮಿಕ ಸಮಾರಂಭ ಒಂಜೆಟ್ ಬೇತೆ ಸ್ವಾಮಿಲೆನ ಒಟ್ಟುಗು ಮಿತ್ತರ್ಮೆ ಪಟ್ಟೊಂದಿನ ಬೊಕ್ಕ ಪೂರ್ವಾಶ್ರಮೊದ ದಾಖಲೆಲು ತಿಕ್ಕ್ದ.
ಅವೆರ್ದ್ ಬೊಕ್ಕ ಇತ್ತೆ ಮಹಮ್ಮದ್ ನಿಸಾರ್ (22) ಅಲಿಯಾಸ್ ನಿಜಲಿಂಗ ಸ್ವಾಮೀಜಿನ ಮಿತ್ತ್ ಮಠೊಕು ಮುಸ್ಲಿಂ ಟೊಪ್ಪಿ ಆನ್ಲೈನ್ಡ್ ತರ್ಪಾದೀನ, ಗಂಗರ ಪರ್ದ್ ನಲಿಪುನ, ಮಠೊಟು ಅನೈತಿಕ ಬೇಲೆಲು ಇಂಚಿನ ಒಂಜೊಂಜೇ ಆರೋಪ ಕೇನ್ದ್ ಬರೊಂದುಂಡು.