Last updated on September 14th, 2025 at 02:43 pm
ದೇವನಹಳ್ಳಿ, ಬೆಂಗಳೂರು, ಸೆ. 14: ಕಡ(ಸಾಲ)ತ ಪುದೆರ್ದಾವರ ಇರ್ವೆರ್ ಜೋಕುಲೆನ್ ಬಾಲ್ದಿಡ್ ಮುರ್ಕಾದ್ ಕೆರ್ದ್ ಬೊಕ್ಕ ಅಮ್ಮೆ ತಾನ್ಲಾ ಆತ್ಮಹತ್ಯೆ ಮಲ್ತೊಂದಿನ ನಡಕೆ ಬೆಂಗಳೂರು ಗ್ರಾಮಾಂತರ ಜಿಲ್ಲೆದ ಹೊಸಕೋಟೆ ತಾಲೂಕ್ದ ಗೊಣಕನಹಳ್ಳಿ ಗ್ರಾಮೊಡು ನಡತ್ದ್ಂಡ್.
ಪಿದಯಿ ಪೋದಿತ್ತಿನ ಬೊಡೆದಿ ಇಲ್ಲಗ್ ಬತ್ತ್ದ್ ತೂನಗ ಶಾಕ್ ಆದ್ ತಾನ್ಲಾ ಉರ್ಲು ಪಾಡೊಂದು ಆತ್ಮಹತ್ಯೆ ಮಲ್ತೊನರೆ ತೂವೊಂದುಪ್ಪುನಗ ಮುಟ್ಟದಕುಲು ಬತ್ತ್ದ್ ಜೂವ ಕಾತ್ದೆರ್. ಕಂಡನೆ ಶಿವು ( 32 ) ಮಗಲ್ ಚಂದ್ರಕಲಾ ( 11 ) ಬೊಕ್ಕ ಮಗೆ ಉದಯ್ಸೂರ್ಯ ( 07 ) ತೀರ್ದಿನಕುಲು. ಅಪ್ಪೆ ಮಂಜುಳಾ ಜೂವೊಗು ದಾಲ ಆವಂದೆ ಬಚಾವಾತೆರ್. ಕಂಡನ್ಯಗ್ ವರ್ಸೊಗು ದುಂಬು ನಡತಿನ ಎಡ್ತೆಡ್ ಗಾತಿದ ಗಡಿಕುಲಾದಿತ್ತಿನೆರ್ದಾವರ ಮರ್ದ್ಗ್ ಬೋಡಾದ್ ಮೊಕುಲು ಕಡ ಗೆತೊಂದಿತ್ತೆರ್.
ಶಿವು ಬೊಕ್ಕ ಮಂಜುಳಾ ಮೋಕೆ ಮಲ್ತ್ದ್ ಮದಿಮೆ ಆದಿತ್ತೆರ್. ಬೇಲೆಗ್ ಪೋನಗ ಮೋಕೆ ಮಲ್ತೊಂದಿತ್ತ್ದ್, ಬೇತೆ ಬೇತೆ ಜಾತಿ ಆದಿತ್ತಿನೆರ್ದಾವರ ಇಲ್ಲದಕ್ಲೆನ ವಿರೋಧೊದ ನಡುಟೇ ಮದಿಮೆ ಆದಿತ್ತೆರ್. ಮದಿಮೆ ಆದ್ ಎಡ್ಡೆಡೇ ಇತ್ತಿನ ಕುಟುಮಗ್ ಎಡ್ತೆರ್ದಾವರ ಪೆಟ್ಟ್ ಬೂರ್ಂಡ್. ಎಡ್ತೆಡ್ ಶಿವು ಕಾರ್ ಪೊಲಿದ್ ಆಸ್ಪತ್ರೆ ಸೇರ್ದಿತ್ತೆರ್. ರಡ್ಡ್ ಇಲ್ಲದಕ್ಲೆನಲಾ ಸಕಾಯದಾಂತೆ ಮೊಕುಲು ಆರ್ಥಿಕವಾದ್ ಬಂಙೊಗು ಬೂರೊಡಾಂಡ್. ಇಲ್ಲ್ ತೂವೊನ್ರ ಬೋಡಾದ್ ಬೊಡೆದಿ ಬೇಲೆಗ್ ಪೋವೊಂದಿತ್ತಲ್ನ್ಡ, ಕಂಡನೆ ಇಲ್ಲಡೇ ಇಪ್ಪೆದೆ. ಇಂಚಿಪ ಬೊಡೆದೀನ ಶೀಲದ ಮಿತ್ತ್ಲಾ ಶಿವು ಅನುಮಾನ ಮಲ್ಪೆದೆಗೆ. ಒಟ್ಟುಗು ಕಡ ಎಚ್ಚಾದ್ ಕೈಟ್ ಕಾಸ್ದಾಂತಿನೆರ್ದಾವರ ರಡ್ಡ್ ಮೂಜಿ ತಿಂಗೊಲುಗು ಪಿರವೇ ದಂಪತಿಲು ಸೈಪುನ ನಿರ್ಧಾರ ಮಲ್ತಿತ್ತೆರ್. ತನ್ಕುಲು ಸೈತಂಡ ಜೋಕುಲು ಪರಕ್ಕೊಲಿಲು ಆಪೆರ್ ಪನ್ದ್ ಅಕ್ಲೆನ್ಲಾ ಕೆರ್ಪುನ ನಿರ್ಧಾರ ಮಲ್ತಿತ್ತೆರ್ಗೆ.
ಶನಿವಾರ ತಿಂಡಿ ಕನಯೆರ ಮಂಜುಳಾ ನ್ ರಾತ್ರೆ ಅಂಗಡಿಗ್ ಕಡಪುಡ್ದಿನ ಶಿವು, ಆ ಪೊರ್ತುಡು ಜೋಕುಲಿರ್ವೆರೆನ ಕೆಕ್ಕಿಲ್ಗ್ ಶಾಲ್ ಪಾಡ್ದ್ ಕೈತ್ದೆ, ಆಂಡ ಶಾಲ್ಡ್ ಅಲಕ್ಕ ಜೂವ ಪೋವಂದಿನೆರ್ದಾವರ ಕುಡ ಇರ್ವೆರೆನ್ ಬಾಲ್ದಿಡ್ ಮುರ್ಕಾದ್ ಕೆರ್ತೆ. ಜೋಕುಲಿರ್ವೆರ್ ಸೈತಿಬೊಕ್ಕ ಶಿವು ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆ.
ಅಂಗಡಿಗ್ ಪೋದಿತ್ತಿನ ಮಂಜಳಾ ಇಲ್ಲಗ್ ಬತ್ತ್ ತೂನಗ ಕಂಡನೆ ಬೊಕ್ಕ ಜೋಕುಲೆನ ಜೂವ ಪೋದಿತ್ತ್ಂಡ್. ಕಂಡನೆ ಜೋಕುಲು ಸೈದಿನೆನ್ ತೂದು ಮುರಿಯ ದೀನ ಮಂಜಳಾ, ಬೊಕ್ಕ ತಾನ್ಲಾ ಬಲ್ಲ್ ಪಾಡೊಂದು ಜೂವ ಗೆತ್ತೊನ್ರ ತೂತಲ್. ಆತನಗ ನೆರೆಕರೆತಕುಲು ಬತ್ತ್ದ್ ರಕ್ಷಣೆ ಮಲ್ತ್ ಆಸ್ಪತ್ರೆಗ್ ದಾಕಲ್ತ್ದ್ ಮರ್ದ್ ಮಲ್ತ್ದೆರ್. ಇತ್ತೆ ಮಂಜಳಾ ಹೊಸಕೋಟೆ ಪೊಲೀಸೆರೆ ವಶೊಟು ಉಲ್ಲಲ್.