Last updated on September 15th, 2025 at 10:55 am
ಬೈಂದೂರು, ಸೆ. 15: ಪರ್ತಿನ ಅಮಲ್ಡ್ ನಡತಿನ ದೋಸ್ತಿಲೆನ ಲಡಯಿ ಒರಿಯನ್ ಕೆರ್ದ್ ಕೈದಾತಿನ ನಡಕೆ ಬೈಂದೂರ್ಡ್ ನಡತ್ದ್ಂಡ್. ಯಡ್ತರೆ ಗ್ರಾಮೊದ ಕೊಸಳ್ಳಿ ಮುಟ್ಟಡ ದೇವರೆಕಂಡ ಪನ್ಪಿನಲ್ಪ ಈ ನಡಕೆ ನಡತ್ದ್ಂಡ್. ಬಿನು (45) ತೀರ್ದಿನಾಯೆ. ಉದಯೆ (43) ಕೆರ್ತಿನ ಆರೋಪಿ.
ಕೇರಳರ್ದ್ ಬೇಲೆ ನಾಡೊಂದು ಒಟ್ಟುಗು ಬತ್ತಿನ ದೋಸ್ತಿಲು ಬಿನು ಬೊಕ್ಕ ಉದಯೆ ಕರಿನ ರಡ್ಡ್ ವರ್ಸೊರ್ದಿಂಚಿ ಕೊಸಳ್ಳಿದ ಥಾಮಸ್ ಕುಟ್ಟಿ ಪನ್ಪಿನಾರೆನ ತೋಟೊಡು ರಬ್ಬರ್ ಟ್ಯಾಪಿಂಗ್ ಬೇಲೆ ಮಲ್ತೊಂದು ತೋಟದ ಇಲ್ಲಡೆ ಇಪ್ಪೆದೆರ್. ಅಪಗಪಗ ಪರ್ದ್ ಲಡಯಿ ಮಲ್ತೊಂದುಪ್ಪೆದೆರ್. ಆಂಡ ಶನಿವಾರ ನಡೀರ್ ಒಂಜಿ ಗಂಟೆದ ಅಂದಾಜಿಗ್ ಇರ್ವೆರೆ ನಡುಟು ಸುರು ಆತಿನ ಲಡಯಿ ಎಚ್ಚ ಆದ್ ಉದಯೆ ರಬ್ಬರ್ ಟ್ಯಾಪಿಂಗ್ ಮಲ್ಪುನ ಕತ್ತಿಡ್ ಬಿನು ಗು ಕುತ್ತುದೆ. ಗಾತಿದ ಗಡಿ ಆದ್ ಬಿನು ಅಲ್ಪನೇ ಬೂರ್ದ್ ತೀರ್ದೆ.
ದೋಸ್ತಿನ್ ಕೆರ್ದ್, ಉದಯೆ ಅಲ್ಪರ್ದ್ ಪದ್ರಾಡಾತೆ. ಈ ಬಗೆಟ್ ಜಡ್ತೆ ಮಲ್ತ್ದ್ ಪೊಲೀಸೆರ್ ಆರೋಪಿನ್ ಪತ್ತ್ದೆರ್. ಜಾಗೆಗ್ ಕುಂದಾಪುರ ಡಿವೈಎಸ್ಪಿ ಎಚ್.ಡಿ.ಕುಲಕರ್ಣಿ ಬೊಕ್ಕ ಬೈಂದೂರು ಪೊಲೀಸೆರ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್. ಈ ಬಗೆಟ್ ಬೈಂದೂರು ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.