Last updated on September 24th, 2025 at 12:41 pm
ದೆಲ್ಲಿ, ಸೆ. 24: ದೆಲ್ಲಿದ ಪಾಶ್ ಜಾಗೆ, ವಸಂತ್ ಕುಂಜ್ಡ್ ಇಪ್ಪುನ ಪುದರ್ ಪೋತಿನ ಆಶ್ರಮ ಒಂಜೆತ ನಿರ್ದೇಶಕನ ಮಿತ್ತ್ ಪಾಕ ಜನ ಪೊಂಜೊವುನಕುಲೆಗ್, ಜವನ್ದಿ ಪೊಣ್ಣುಲೆಗ್ ಲೈಂಗಿಕ ಕಿರುಕುಳ ಕೊರ್ತಿನ ಆರೋಪ ಕೇನ್ದ್ ಬೈದ್ಂಡ್ ಪನ್ದ್ ಪೊಲೀಸೆರ್ ತೆರಿಪಾದೆರ್.
ಶ್ರೀ ಶಾರದಾ ಇನ್ಟಿಟ್ಯೂಟ್ ಆಫ್ ಇಂಡಿನ್ ಮ್ಯಾನೇಜ್ಮೆಂಟ್ದ ಸ್ವಾಮಿ ಚೈತನ್ಯಾನಂದ ಸರಸ್ವತಿ ಅಲಿಯಾಸ್ ಪಾರ್ಥ ಸಾರಥಿ, ಆರ್ಥಿಕವಾದ್ ಪಿರವು ಒರಿದಿತ್ತಿನ ವರ್ಗೊಲೆನ (EWS) ವಿಭಾಗೊಡು ಸ್ಕಾಲರ್ಶಿಪ್ಡ್ ಸ್ನಾತಕೋತ್ತರ ಡಿಪ್ಲೊಮಾ ಕೋರ್ಸ್ಲೆನ್ ಕಲ್ತೊಂದುಪ್ಪುನ ಪೊಣ್ಣುಲೆಗ್ ಕಿರುಕುಳ ಕೊರ್ತಿನೆಕ್ ಆರೆನ ಮಿತ್ತ್ ಪೊಲೀಸ್ ಪ್ರಕರಣ ಬೂರ್ದ್ಂಡ್.
ಪೊಲೀಸೆರ್ ಸ್ಟೇಟ್ಮೆಂಟ್ಲೆನ್ ದಾಕಲ್ತೊಂದಿನ 32 ಪೊಣ್ಣುಲೆಡ್ ಕಮ್ಮಿಡ್ 17 ಪೊಣ್ಣುಲು ಸ್ವಾಮಿ ಚೈತನ್ಯಾನಂದೆ ಅಶ್ಲೀಲ ಪಾತೆರ ಪಾತೆರೊಂದು, ಅಶ್ಲೀಲ ಮೆಸೇಜ್ ಕಡಪುಡ್ದೆರ್ ಅಂಚೆನೇ ಒತ್ತಾಯೊಡು ದೈಹಿಕ ಸಂಪರ್ಕ ಮಲ್ತ್ದೆರ್ ಪನ್ದ್ ಆರೋಪ ಮಲ್ತ್ದೆರ್. ಮಹಿಳಾ ಅಧ್ಯಾಪಕೆರ್ ಬೊಕ್ಕ ಆಡಳಿತ ಸಿಬ್ಬಂದಿಲಾ ಆಯೆ ಪನ್ಡಿಲೆಕ ಮನ್ಪೆರ ಈ ಪೊಣ್ಣುಲೆನ ಮಿತ್ತ್ ಒತ್ತಡ ಪಾಡ್ದೆರ್ ಪನ್ದ್ ಆರೋಪ ಮಲ್ದೆರ್.
ಆಶ್ರಮೊಡು ಬೇಲೆ ಮಲ್ತೊಂದಿತ್ತಿನ ಕೆಲ ವಾರ್ಡನ್ನಕುಲು ಎಂಕ್ಲೆನ್ ಆರೋಪಿಗ್ ಗುರ್ತ ಮಲ್ತ್ ಕೊರ್ತೆರ್ ಪನ್ದ್ ವಿದ್ಯಾರ್ಥಿಲು ಪನ್ತೆರ್.
ಅಕ್ಲೆನ ಪಾತೆರೊದ ಆಧಾರೊಡು, ಪೊಲೀಸೆರ್ ಸ್ವಾಮಿ ಚೈತನ್ಯಾನಂದನ ಮಿತ್ತ್ ಲೈಂಗಿಕ ಕಿರುಕುಳ ಬೊಕ್ಕ ಬೇತೆ ಆರೋಪೊಲೆಗಾದ್ ಪ್ರಕರಣ ದಾಕಲ್ತೊಂದೆರ್ ಪನ್ದ್ ದೆಲ್ಲಿ ನೈಋತ್ಯ ಜಿಲ್ಲೆದ ಉಪ ಪೊಲೀಸ್ ಆಯುಕ್ತೆ ಅಮಿತ್ ಗೋಯಲ್ ತೆರಿಪಾದೆರ್.
ಪೊಲೀಸೆರ್ ಸಿಸಿಟಿವಿ ಫೂಟೇಜ್ಲೆನ್ ತೂದು, ಅಪರಾಧ ನಡತಿನ ಜಾಗೆ ಬೊಕ್ಕ ಆರೋಪಿನ ಇಲ್ಲದ ಮಿತ್ತ್ ದಾಳಿ ಮಲ್ತ್ದೆರ್. ಆರೋಪಿ ಇತ್ತೆ ದೆಂಗ್ತಪ್ಪಾದ್ ಕುಲ್ದೆ. ಮೂಲೊಲೆರ್ದ್ ತೆರಿದ್ ಬತ್ತಿಲೆಕ ಆಯೆ ಅಕೇರಿಗ್ ಆಗ್ರಾದ ಕೈತಲ್ ತೂಯೆರ ತಿಕ್ಕ್ದಿತ್ತೆ. ಪಾಕ ಪೊಲೀಸ್ ಕೂಟೊಲು ಆಯನ್ ನಾಡೊಂದುಲ್ಲ.
ಜಡ್ತೆದ ಪೊರ್ತುಡು, ಪೊಲೀಸೆರ್ ಸಂಸ್ಥೆದ ನೆಲಮಾಳಿಗೆಡ್ ಸ್ವಾಮಿ ಚೈತನ್ಯಾನಂದೆ ಗಲಸೊಂದಿತ್ತಿನ ವೋಲ್ವೋ ಕಾರ್ನ್ ವಶೊಕು ಗೆತೊಂದೆರ್. ಪರಿಶೀಲನೆರ್ದ್ ಬೊಕ್ಕ, ಕಾರ್ಗ್ ಡುಪ್ಲಿಕೇಟ್ ರಾಜತಾಂತ್ರಿಕ ನಂಬರ್ ಪ್ಲೇಟ್ (39 UN 1) ನ್ ಪಾಡ್ದಿನ ತೆರಿದ್ ಬೈದ್ಂಡ್.
ಆರೋಪೊಲು ಪಿದಯಿ ತೆರಿಬೊಕ್ಕ, ಆಶ್ರಮೊದ ಆಡಳಿತ ಆಯನ್ ಆ ಹುದ್ದೆರ್ದ್ ದೆತ್ತ್ದ್ಂಡ್. ಆರೋಪಿನ ಮುತಾಲಿಕೆಡ್ ಇತ್ತಿನ ಆಶ್ರಮ ಘಟಕ ದಕ್ಷಿಣ ಭಾರತೊದ ಪುದರ್ ಪೋತಿನ ಆಶ್ರಮೊದ ಶಾಖೆ ಆದುಂಡು.
ದೆಲ್ಲಿದ ಈ ಘಟಕೊನು ನಡಪಾವೊಂದುಪ್ಪುನ ಶೃಂಗೇರಿದ ದಕ್ಷಿಣಾಮ್ನಾಯ ಶ್ರೀ ಶಾರದಾ ಪೀಠೊ, ಸ್ವಾಮಿ ಚೈತ್ಯಾನಂದನ ನಡಕೆಲು ಬೊಕ್ಕ ಆಯನ ಬೇಲೆಲು ಕಾನೂನುಬಾಹಿರ, ಅನುಚಿತ ಅಂಚೆನೇ ಪೀಠೊದ ಹಿತಾಸಕ್ತಿಗ್ ವಿರುದ್ಧವಾದುಂಡು ಪನ್ದ್ ಪಾತೆರ ಪನ್ತ್ಂಡ್. ಈ ಮುಕೇನ, ಆರೋಪಿನ ಒಟ್ಟುಗು ಮಾತಾ ಸಂಬಂಧೊಲೆನ್ ಕಡಿತೊಂದುಂಡು.