Last updated on September 27th, 2025 at 10:02 am
ಬಹ್ರೈಚ್: ಉತ್ತರ ಪ್ರದೇಶೊದ ಬಹ್ರೈಚ್ಡ್ ರಿಜಿಸ್ಟರ್ ಆವಂದಿನ ಮದರಸಾದ ಶೌಚಾಲಯೊಡು 9 ರ್ದ್ 14 ವರ್ಸ ಪ್ರಾಯೊದ 40 ಪೊಣ್ಣುಲು ಕೈದಾದುಪ್ಪುನ ಗುರುವಾರ ತೆರಿದ್ ಬೈದ್ಂಡ್ ಪನ್ದ್ ಅಧಿಕಾರಿಲು ತೆರಿಪಾದೆರ್.
ಪಯಾಗಪುರ ಉಪವಿಭಾಗೀಯ ಮ್ಯಾಜಿಸ್ಟ್ರೇಟ್ (SDM) ಅಶ್ವಿನಿ ಕುಮಾರ್ ಪಾಂಡೆ ಪಿಟಿಐಗ್ ಈ ಬಗೆಟ್ ಒಲವು ಕೊರ್ದಿತ್ತ್ದ್, ಪಯಾಗಪುರ ತಹಸಿಲ್ ಸೀಮೆದ ಪಹಲ್ವಾರಾ ಗ್ರಾಮೊದ ಮೂಜಿ ಮಾಲಿಗೆದ ಕಟ್ವಾನೊದುಲಯಿ ಅಕ್ರಮ ಮದರಸಾ ನಡಪಾವೊಂದುಪ್ಪುನ ಬಗೆಟ್ ಜಿಲ್ಲಾಡಳಿತೊಗು ಗಡೀ ಗಡಿ ದೂರುಲು ಬರೊಂದಿತ್ತ ಪನ್ದ್ ತೆರಿಪಾದೆರ್.
“ಬುಧವಾರ, ಎಂಕ್ಲ ಪರಿಶೀಲನೆಗ್ ಕಟ್ವಾನೊದಡೆ ಪೋನಗ, ಮದರಸಾ ನಿರ್ವಾಹಕೆರ್ ಸುರುಟು ಎಂಕ್ಲೆನ್ ಮಿತ್ತ್ ಪೋವಂದಿವೆಕ ಉಂತಾಯೆರ ತೂಯೆರ್. ಪೊಲೀಸೆರೆ ಇತ್ತ್ದ್, ಎಂಕ್ಲ ಉಲಯಿ ಪೊಗ್ಗುನಗ, ಟೆರೇಸ್ಡ್ ಇಪ್ಪುನ ಶೌಚಾಲಯೊಗು ಬೀಗ ಪಾಡ್ದಿತ್ತಿನೆನ್ ತೂಯ” ಪನ್ದ್ ಆರ್ ಪನ್ಡೆರ್.
ಮಹಿಳಾ ಪೊಲೀಸ್ ಸಿಬ್ಬಂದಿ ಬಾಕಿಲ್ ದೆಪ್ಪುನಗ, ಶೌಚಾಲಯೊದುಲಯಿ ದೆಂಗ್ದ್ ಕುಲ್ದಿತ್ತಿನ 90ರ್ದ್ 14 ವರ್ಸ ಪ್ರಾಯೊದ 40 ಪೊಣ್ಣುಲು ಒರ್ತಿಒರ್ತಿಯೇ ಪಿದಯಿ ಬತ್ತೆರ್. ಪೊಣ್ಣುಲು ಪೋಡಿದಿತ್ತೆರ್ ಬೊಕ್ಕ ಸ್ಪಷ್ಟವಾದ್ ದಾಲ ಪನ್ಯೆರ ಆಪೆದಿಜಿ ಪನ್ದ್ ಅಶ್ವಿನಿ ಕುಮಾರ್ ಪಾಂಡೆ ಪನ್ಡೆರ್.
ಜಿಲ್ಲಾ ಅಲ್ಪಸಂಖ್ಯಾತ ಕಲ್ಯಾಣ ಅಧಿಕಾರಿ ಮೊಹಮ್ಮದ್ ಖಾಲಿದ್ ಮೆರೆನ್ ಸಂಸ್ಥೆದ ರಿಜಿಸ್ಟರ್ ಬೊಕ್ಕ ಕಾನೂನುಬದ್ಧತೆನ್ ಪರಿಶೀಲಿಪೆರ ಪನ್ತ್ನ್ಡ್ ಪನ್ದ್ SDM ತೆರಿಪಾದೆರ್. ಖಾಲಿದ್ರೆನ ಪ್ರಕಾರ, ಮದರಸಾ ಸುಮಾರ್ ಮೂಜಿ ವರ್ಸೊರ್ದಿಂಚಿ ನೋಂದಣಿದಾಂತೆ ನಡತೊಂದಿತ್ತ್ಂಡ್ ಪನ್ದ್ ಮುಟ್ಟದಕುಲು ಪನ್ತೆರ್.
“ನಿರ್ವಹಣೆ ಬೊಕ್ಕ ಸಿಬ್ಬಂದಿ ನೋಂದಣಿ ಅತ್ತ್ಂಡ ಕಾನೂನುಬದ್ಧತೆಗ್ ಸಂಬಂಧಿತಿನ ಒವ್ವೇ ದಾಕಲೆಲೆನಾ ಕೊರ್ತುಜೆರ್. 2023 ತ ಸರ್ವೇಡ್, ಬಹ್ರೈಚ್ಡ್ 495 ನೋಂದಾವಣೆ ಆವಂದಿನ ಮದರಸಾಲೆನ್ ಗುರ್ತ ಪತ್ತ್ದೆರ್ ಬೊಕ್ಕ ಉಂದು ಸಮೀಕ್ಷಾ ಕೂಟೊದ ಗೇನೊಗು ಬರಂದಿಲೆಕ ನಡತೊಂದಿತ್ತ್ಂಡ್” ಪನ್ದ್ ಆರ್ ಪನ್ಡೆರ್.
ರಾಜ್ಯ ಸರ್ಕಾರ ಇದಮುಟ್ಟ ಇಂಚಿನ ಅಕ್ರಮ ಮದರಸಾಲೆನ ಬಗೆಟ್ ಪತ್ತ ನೀತಿನ್ ಪಿದಡ್ಪಾದಿಜಿ. ಕರಿನ ವರ್ಸ ಕೆಲವುದೆನ್ ಸೀಲ್ ಮಲ್ತಿತ್ತ್ಂಡ್, ಐಕ್ಲೆನ ವ್ಯವಸ್ಥಾಪಕೆರ್ ಹೈಕೋರ್ಟ್ರ್ದ್ ತಡೆಯಾಜ್ಞೆ ಗೆತೊಂದೆರ್ ಪನ್ದ್ ಖಾಲಿದ್ ಪನ್ಡೆರ್. ಸರ್ಕಾರೊರ್ದು ಬೇಗೊಡೇ ಪೊಸ ನಿಯಂತ್ರಕ ಕಾನೂನು ನಿರೀಕ್ಷೆ ಮಲ್ತೊಂದುಲ್ಲ ಪನ್ದ್ ಪನ್ಡೆರ್.
“ಪ್ರಶ್ನೆ ಮಲ್ಪುನಗ, ಮದರಸಾಡ್ ಎಣ್ಮ ಅದೆಕುಲು ಇತ್ತ್ಂಡಲಾ ಪೊಣ್ಣುಲು ಶೌಚಾಲಯೊಡು ದಾಯೆ ದೆಂಗ್ದ್ ಕುಲ್ದೆರ್ ಪನ್ದ್ ಎಂಕ್ಲ ಕೇನ್ದ, ಅವೆಕ್ ಶಿಕ್ಷಕಿ ತಕ್ಸೀಮ್ ಫಾತಿಮಾ ಸದು ಕೊರ್ದು, ಪೊಣ್ಣುಲು ಗದ್ದಲೊಗು ಪೋಡಿದ್ ಉಲಯಿ ಬೀಗ ಪಾಡೊಂದೆರ್” ಪನ್ದ್ ಆರ್ ಪನ್ತೆರ್.
ಮದರಸಾ ದಾಕಲೆಲೆನ್ ಪರಿಶೀಲನೆ ಮಲ್ತೊಂದುಲ್ಲ ಬೊಕ್ಕ ಅವೆನ್ ಮುಚ್ಚೆರೆ ಆದೇಶ ಕೊರ್ತುಂಡು ಪನ್ದ್ ಆರ್ ಪನ್ಡೆರ್.
ಎಚ್ಚಿಗೆದ ಪೊಲೀಸ್ ವರಿಷ್ಠಾಧಿಕಾರಿ (ನಗರ) ರಮಾನಂದ ಪ್ರಸಾದ್ ಕುಶ್ವಾಹ ಮೇರ್ ಇದಮುಟ್ಟ ನಡಕೆದ ಬಗೆಟ್ ಒವ್ವೇ ಎಫ್ಐಆರ್ ದಾಕಲಾತಿಜಿ ಪನ್ದ್ ಪನ್ಡೆರ್. “ಪೋಷಕೆರ್, ಎಸ್ಡಿಎಂ ಅತ್ತ್ಂಡ ಅಲ್ಪಸಂಖ್ಯಾತ ಕಲ್ಯಾಣ ಅಧಿಕಾರಿ ಈತ್ನೇಟ ಪ್ರಕರಣ ದಾಖಲಿಪೆರ ಎಂಕ್ಲೆನಡೆ ಬತ್ತ್ದ್ಜೆರ್. ಏರ್ಲಾ ಒಯಿಲ್ ಬರೆಪಾಯೆರ್ನ್ಡ, ಬೋಡಾಪಿನ ಕಾನೂನು ಕ್ರಮ ಗೆತೊನುವ” ಪನ್ದ್ ಆರ್ ಪನ್ಡೆರ್.