ಅಫ್ಗಾನಿಸ್ತಾನೊದ ಕಂದಹಾರ್‌‌ದ ಮಿತ್ತ್ ಪಾಕಿಸ್ತಾನೊದ ವಾಯುದಾಳಿ – ಕುಡೊಂಜಿ ಕೊಲಲದ ಸಾಧ್ಯತೆ

Last updated on October 16th, 2025 at 06:58 am

ಕಾಬುಲ್, ಅ. 16: ಹಮಾಸ್ ಬೊಕ್ಕ ಇಸ್ರೇಲ್‌ದ ನಡುತ ಕೊಲಲ ಉಂತಿನ ಬೆರಿಟೇ ಇತ್ತೆ ಅಪ್ಘಾನಿಸ್ತಾನ ಬೊಕ್ಕ ಪಾಕಿಸ್ತಾನೊದ ನಡುಟು ಕೊಲಲ ಲಕ್ಕುನ ಸಾಧ್ಯತೆ ತೋಜೊಂದುಂಡು. ಎಲ್ಯೆಟ್ ನಡತೊಂದಿತ್ತಿನ ಸಂಘರ್ಷೊಡು, ಕೋಡೆ ಪಾಕಿಸ್ತಾನ ಅಫ್ಗಾನಿಸ್ತಾನೊದ ಕಂದಹಾರ್‌‌ದ ಮಿತ್ತ್ ವಾಯುದಾಳಿ ಮಲ್ತ್‌ದ್ ಮಲ್ಲಮಟ್ಟ್‌ಗ್ ಕೊನೊತುಂಡು. ಈ ದಾಳಿಡ್ ಪಾಕ ಜನ ತೀರ್ದೆರ್ ಪನ್ದ್ ವರದಿ ಆತ್ಂಡ್.

ಪಾಕಿಸ್ತಾನ ಬುಧವಾರ ಅಫ್ಗಾನಿಸ್ತಾನೊದ ಕಂದಹಾರ್ ಪ್ರಾಂತ್ಯೊಡು ವಾಯುದಾಳಿ ಮಲ್ದ್ಂಡ್ ಪನ್ದ್ ಅಫ್ಗಾನ್ ಬೊಕ್ಕ ಪಾಕಿಸ್ತಾನ ಅಧಿಕಾರಿಲು ತೆರಿಪಾದೆರ್. ಅಂಗಾರೆ ಅಫ್ಗಾನ್ ಬೊಕ್ಕ ಪಾಕಿಸ್ತಾನ ದಂಡ್‌ದ ನಡುಟು ನಡತಿನ ಘರ್ಷಣೆಡ್ ಅಫ್ಗಾನಿಸ್ತಾನೊಡು 12ರ್ದ್‌ಲಾ ಎಚ್ಚ ನಾಗರಿಕೆರೆನ ಜೂವ ಪೋತುಂಡು ಪನ್ದ್ ವರದಿ ಆತ್ಂಡ್. ಆಂಡ, ಬುಧವಾರ ಮಧ್ಯಾಹ್ನದ ವರದಿದ ಪ್ರಕಾರ ಪಾಕಿಸ್ತಾನಿ ದಂಡ್ ಕಮ್ಮಿಡ್ 40 ಜನ ಅಫ್ಗಾನಿಸ್ತಾನೊದ ತಾಲಿಬಾನಿಲೆನ್ ಕೆರ್ತ್ಂಡ್ ಪನ್ದ್ ವರದಿ ಆತ್ಂಡ್.

ಪಾಕಿಸ್ತಾನೊಡು ದಾಳಿಲೆನ್ ಎಚ್ಚ ಮಲ್ದಿನ ಭಯೋತ್ಪಾದಕೆರೆ ಮಿತ್ತ್ ಕ್ರಮ ಗೆತೊನೊಡು ಪನ್ದ್ ಅಫ್ಗಾನಿಸ್ತಾನೊದ ತಾಲಿಬಾನ್ ಸರ್ಕಾರೊನು ಪಾಕಿಸ್ತಾನ ಒತ್ತಾಯ ಮಲ್ತಿತ್ತ್ಂಡ್. ಅಫ್ಗಾನಿಸ್ತಾನೊರ್ದೇ ಉಗ್ರೆರ್ ಕಾರ್ಯಾಚರಣೆ ಮಲ್ತೊಂದುಲ್ಲೆರ್ ಪನ್ದ್ ಪಾಕಿಸ್ತಾನ ಪನ್ದಿತ್ತ್ಂಡ್. ಅವಾಯಿಬೊಕ್ಕ ಈ ಬುಲೆಚ್ಚಿಲ್ ನಡತ್‌ದ್ಂಡ್. ಈ ನಡುಟು ಅಪ್ಘಾನಿಸ್ತಾನ ಬೊಕ್ಕ ಪಾಕಿಸ್ತಾನ 48 ಗಂಟೆಲೆನ ಸೀಸ್‌ಫೈರ್ ಘೋಷಣೆ ಮಲ್ತೊಂದೆರ್.