Last updated on November 1st, 2025 at 08:34 am
ಬೆಂಗಳೂರು, ನ. 1: ಬೆಂಗಳೂರ್ಡ್ ನಡತಿನ ಪೊಂಜೊವು ಒರ್ತಿನ ಅಸಹಜ ಸಾವು ಪ್ರಕರಣೊಡು ತಿರ್ಗೆಲ್ ತಿಕ್ಕ್ದಿತ್ತ್ದ್, ತೀರ್ದಿನ ಪೊಂಜೊವುನ ಅಪ್ರಾಪ್ತ ಮಗಲೇ ತನ್ನ ಅಪ್ರಾಪ್ತ ದೋಸ್ತಿಲೆನ ಒಟ್ಟುಗು ಕೂಡೊಂದು ಅಪ್ಪೆನ ಕೆಕ್ಕಿಲ್ ಪೊಜೆಂಕ್ದ್ ಕೆರ್ತಿನ ಜಡ್ತೆದ್ ತೆರಿದ್ ಬೈದ್ಂಡ್. ಸುಬ್ರಹ್ಮಣ್ಯಪುರ ಪೋಲೀಸ್ ಸ್ಟೇಷನ್ ಸೀಮೆದ ಉತ್ತರಹಳ್ಳಿಡಾ ಈ ನಡಕೆ ನಡತ್ದ್ಂಡ್, ತೀರ್ದಿನ ಪೊಂಜೊವುನು ನೇತ್ರಾವತಿ ಪನ್ದ್ ಗುರ್ತ ಪತ್ತ್ದೆರ್.
ನೇತ್ರಾವತಿನ ಮಗಲ್ ಸೇರ್ದ್ ಐವೆರ್ ಅಪ್ರಾಪ್ತೆರೆನ್ ಕೈದ್ ಮಲ್ತ್ದ ಪನ್ದ್ ಸುಬ್ರಹ್ಮಣ್ಯಪುರ ಸ್ಟೇಷನ್ ಪೊಲೀಸೆರ್ ತೆರಿಪಾದೆರ್. ಅಕ್ಟೋಬರ್ 25ತಾನಿ ರಾತ್ರೆ ನೇತ್ರಾವತಿ ಮೇರ್ ಜೆತ್ತುಪ್ಪುನಗ ಆರೆಗ್ ತೆರಿಯಂದಿಲೆಕ ತನ್ನ ನಾಲ್ವೆರ್ ಅಪ್ರಾಪ್ತ ದೋಸ್ತಿಲೆನ್ ಪೊಣ್ಣು ಇಲ್ಲಗ್ ಲೆತೊಂದು ಬತ್ತಿತ್ತಲ್. ಎಚ್ಚರ್ಗೆ ಆಯಿನ ನೇತ್ರಾವತಿ, ಮಗಲ್ ಬೊಕ್ಕ ಆಲೆನ ದೋಸ್ತಿಯರ್ಲೆನ ವರ್ತನೆ ತೂದು ಪಿಸ್ರ್ಡ್ ನೆರ್ದಿತ್ತೆರ್. ಈ ಪೊರ್ತುಡು ರಡಯಿ ಜೋರಾದ್ ಪೊಣ್ಣು ಬೊಕ್ಕ ಆಲೆನ ದೋಸ್ತಿಯರ್ಲು ನೇತ್ರಾವತಿನ ಬಾಯಿ ಮುಚ್ಚಿದ್ ಬೈರಾಸ್ಡ್ ಕೆಕ್ಕಿಲ್ ಕೈತ್ದ್ ಕೆರ್ದಿತ್ತೆರ್. ಬೊಕ್ಕ ಆತ್ಮಹತ್ಯೆ ಪನ್ದ್ ತೋಜಾಯೆರ ನಾಲಿಗ್ ಸೀರೆ ಕಟ್ಟ್ದ್ ಫ್ಯಾನ್ಗ್ ನೇಲ್ಪಾದ್ ಇಲ್ಲ್ ಲಾಕ್ ಮಲ್ತ್ ಅಲ್ಪರ್ದ್ ಪದ್ರಾಡಾತೆರ್ ಪನ್ದ್ ಪೊಲೀಸೆರೆ ಜಡ್ತೆಡ್ ತೆರಿದ್ ಬೈದ್ಂಡ್.